1, 2. Cimueso cika ci muesa ngecize kua pande ku kala na cisetekeso ku tuala ha malombelo?

VATI tu hasa ku tantekeya Njambi? Vuno citondeka ku konka ha vilongesa via malombelo ose ni? Ca ci kalu ku lingamo. Ambe nga tu hasa, vati tu ka nongonona vilongesa via vusunga?

² Mua vusunga, omo tua tantekeya nguetu vantu va kala na visinganieka via ku liseza-seza ku tuala hali Njambi, tua pande ku uana njila mpundu ya ku tantekeya vusunga vu va litombola navuo vantu. Aci singaniekenu: Nga mu uana mukua ku landesa vintanga na mukua ku landa va linga vimpata ku tuala ha ku laha ca ntanga. Mukua ku landesa ngueni vulaha vuayo vimbandua vitatu vunoni mukua ku landa ngueni kuahi ya ihi cikuma. Vati va hasa ku manesa vimpata viavo? Noho va pangese cisetekeso.

3. Vika va sonekela Mbimbiliya?

³ Vuno kua kala cisetekeso ha ku muena vilongesa via malombelo ni? Eyo ca pua Mbimbiliya. Njambi ua tu hana Mbimbiliya linga tu vose tu lilongese vusunga ku tuala hali ikeye. Va tuhula makulukazi na makulukazi a vi Mbimbiliya. Va i langulula mu mitamba ni ya mutuntu mu malimi a tuvakana 2.600. Cili vene nkala muntu a hasa ku tantekeya vusunga ku tuala hali Njambi mu lilimi lia cisemua ceni.

4. Mizimbu ika ya kala mu Mbimbiliya?

⁴ Mbimbiliya ya pua vuana vua seho ya kama vua ku fuma kuli Njambi. Mbimbiliya ya tu kuasa ku tantekeya viuma vize ka tu hasa ku tantekeya mu njila yeka. Ya tu longesa veya va kala mu melu. Ye ku solola visinganieka via Njambi, vifua vueni na  vutumbe vueni. Ye ku tu muesa naua vusamba vua kele navuo na vantu mu makulukazi a miaka ya ku nima. Mbimbiliya ya tu muesa naua vati tu hasa ku uana njila i tuala ku muono ka ue ku hua.

5. Cimueso cika ca solola ngecize Mbimbiliya ya litombola na siensia?

⁵ Kua kala vusunga vua vuingi vu tu kuasa ku tsiliela Mbimbiliya ku pua mpundu Lizi lia Njambi. Ca ku livanga Mbimbiliya ya litombola na siensia. Ku laza vantu mu mavu ose va tsilielele nguavo ano mavu a tumama ha cuma cimo. Ku mavanda a Afrika vantu laza va tsilielele nguavo kua kala linoka ua lizenga-zenga vinkata 3.500 kuintsi lia mavu kaha naua 3.500 helu lia mavu. Vunoni Mbimbiliya ya litombola laza na siensia, muomu miaka 3.500 ku nima, umo mukua ku soneka Mbimbiliya ua sonekele ngueni Njambi ua “sukika mavu na hamo hahi.”​—Yombi 26:7.

6. Vusunga vuka vu muesa ngecize Mbimbiliya ya fuma kuli Njambi?

⁶ Vunoni vusunga vua kama vua muesa ngecize Mbimbiliya ya fuma mpundu kuli Njambi, vua pua ku tantuluka cayo mu ku handeka ha viuma vi ka soloka ku lutue. Njambi ka fuile ngeci mua vantu ve ku taha via ku lutue, ikeye a tantekeya mpundu via ku lutue, viose vie ku handeka vie ku lipuisamo.

7. Vupolofeto vuka vua Mbimbiliya vua lipuisilemo ku laza?

⁷ Vupolofeto vua Mbimbiliya vua vuingi vua lipuisilemo ku laza. Ca ku muenako, miaka 700 tele Yesu kanda a semuke ha mavu Mbimbiliya ya muesele laza nguayo a ka semukila ku mbonge ya Mbetelema kaha via lipuisilemo vene. (Mika 5:2; Mateo 2:3-9) Ku vueza ku vupolofeto vukuavo ku tuala hali Yesu, Mbimbiliya ya handekele naua laza nguayo a ka semuka kuli umo muana mpuevo kanda a limona na Yala kaha va ka muenda vungungu na vimbongo 30 via palata. Mua vusunga na umo muntu uahi ue ku hasele ku handeka evi viuma ntsimbu kanda vi soloke!​—Isaya 7:14; Zakaliya 11:12, 13; Mateo 1:22, 23; 27:3-5.

8. Tumbulenu vumo vupolofeto vuli na ku lipuisamo matangua ano, na vika vua muesa?

⁸ Kuli naua vupolofeto vua vuingi vua mu Mbimbiliya vuli na ku lipuisamo matangua ano. Tu ci talenu vumo vua vundende:

• “Cifuti ci ka katukila cifuti [mu ndzita], na vuangana ku vuangana: Kaha ku ka kala mandunduma a kama a mavu, na ndzala na misongo ya ku litambuisa, kueka na kueka; kaha ku ka kala via ku zuzuisa na vitantekeyeso via kama via ku fuma muilu.”​—Luka 21:10, 11. 

• “Vupi vu ka likulisa.”​—Mateo 24:12.

• “Ku matangua aze a ku kotokela. . . vantu va ka pua vakua ku lilema vavene, vakua ku lema zimbongo,  . . vakua lisino ku visemi vavo,  . . ka ve ku lipokuesa, vakua ku kaluua, ka va leme ngozi,  . . vakua ku futunuka, vakua ku lema ku viukilila via ha mavu, na Njambi intsa ka va leme.”​—2 Timoteo 3:1-5.

Nenu mua tava ngecize evi viuma vili na ku soloka ntsimbu ino? Vusunga na ku lipuisamo ca vupolofeto vua Mbimbiliya ca muesa ngecize Mbimbiliya ka ya puile ngeci mua mavulu akuavo. Ya pua Lizi lia tumbula Njambi na muku ueni!​—2 Timoteo 3:16.

9, 10. Vika via muesa ngecize Njambi ka tavesele vantu ku alulula Mbimbiliya?

⁹ Aci singaniekenu nga muli na impreza kaha mu sonekela masiko ku vantu ve ku pangako. Nga umo citozi cenu eza a ku alulula masiko a mua sonekele, vati mu linga? Mu ka sungamesa lueka aze masiko a na hengesa, ni vati? Na vuno vene, Njambi ke ku tavesa vantu ku alulula vusunga vua kala mu Lizi lieni, Mbimbiliya.

¹⁰ Vaze va setekele ku alulula vilongesa via mu Lizi lia Njambi, ka va hasele ku lingamo. Nga tu setekesa Mbimbiliya i tuli nayo lelo ku Visoneka via Mbimbiliya via ku ntsenkulu ka via lisezele na hamo hahi. Eci ca muesa ngecize Mbimbiliya ka va i aluluile mu ku hita ca miaka.