1. Vika tua pande ku linga amba tuye Njambi ku mutima?

LINGA tu likuate vusamba vua cili na Njambi, tua pande ku litepa mu viose na vulombelo vua makuli. Tua pande ku lemesa mu vusunga. Vantu vavengi mu mavu ose vali na ku lingamo matangua ano.

2. Kulihi va kala Vakaleho va Yehova, kaha vipanga vika ve ku linga?

² Ngue mu ya handekele laza Mbimbiliya, vakua ku lemesa mu vusunga va pua “civunga ca kama” ca ku tunda mu “vifuti viose, na miyati yose, na vantu vose na malimi ose.” (Ku-Solola 7:9) Mu vifuti via ku pua 239, Vakaleho va Yehova vali na ku kuasa vakuavo va lilongese via tonda Yehova na vinjila vieni via cilemo.

3. Iya ve ku lemesa Vakaleho va Yehova, kaha ve ku viana ku lemesa vika?

³ Vakaleho va tava mpundu nguavo Yehova ikeye lika ua fuila ku mu lemesa. Ve ku viana ku tsikamena tumponia ni ku vikupulo via mu vulombelo vua makuli. (1 Yoano 5:21) Ka ve ku lemesa vatsi mu ku zuamena ku miala ni vilika vieka vie ku tuala ku lutue vulombelo vua makuli ni ‘vilongesa via vandemone.’ (1 Timoteo 4:1) Vunoni ve ku lembezieka vaze va na tsisa mu ku va lomboluela cikulaheso ca Njambi ngecize tangua ku ka kala cisangukilo ca vatsi linga va ka yoye mu palandaizi ha mavu.​—Yoano 5:28, 29; Vilinga 24:15.

4. Vika va tsiliela vangamba va Njambi ku tuala ha vulozi?

⁴ Vakaleho ka va lihakele ku mahesi, tufuta ni vulozi, muomu va tantekeya ngecize evi viuma via tunda kuli Satana. Va tsiliela nguavo Yehova lika ikeye a hasa ku va niunga kati vulozi houe.​—Visimo 18:10.

5. Mu njila ika Vakaleho va Yehova “kati vakua mavu”?

⁵ Yesu ua handekele ngueni vandongesi veni “kati vakua mavu.” (Yoano 17:16) Yesu ua vianene ku likovelesa mu pulitika ya ku matangua aze. (Yoano 6:15) Na lelo lino, Vakaleho ka ve ku likovelesa mu pulitika, ku halesa vifuti ni mu ku liluisa ca miyati hano ha mavu. Vunoni, ve ku fueta lisimu na ku ononoka masiko a mu vifuti vi va kala.​—Yoano 15:19; Loma 13:1, 7.

6. Vitume vika ve ku niunga vangamba va Njambi ku tuala ha vulo na ku-tsiha vulo?

⁶ Omo lia ku ononoka vinguvulu, Vakaleho ve ku linga cose mu ku sonekesa malo avo ku nguvulu. (Tito 3:1) Ve ku ononoka ku lisiko lia Njambi lia ku viana ku haleka. (1 Timoteo 3:2) Cikuavo naua, malo a vangamba va Njambi ka e ku tsa cikuma muomu ve ku niunga vitume via mu Mbimbiliya.

7. Vati Vakaleho ve ku muesa cilemo ku umo na mukuavo?

⁷ Vakaleho va lilema umo na mukuavo. Omo lia ku lilema umo na mukuavo na ku lema Yehova, Vakaleho va likuata kumo na vamuanaye mu vusunga, vutuhu va tunda ku miyati na vifuti via ku liseza-seza. Mu kue ku soloka mandunduma ni visoti vieka, Vakaleho ve kuli kuasa vuasi-vuasi umo na mukuavo. Vakaleho ve ku muesa cilemo mu ku yoya cavo.​—Yoano 13:35.

8. Vilinga vika via vipi ve ku viana vangamba va Njambi?

⁸ Vangamba va Yehova ve ku lihakela kapandi ka ku pua vakua vusunga mu vihandeka na vilinga. Ve ku viana vuizi, makuli, vupangala, ku penda, na ku-onga mu mingoso. Vamala ka ve ku pupa vampuevo vavo. Vavengi tele kanda va pue Vakaleho, va kele nevi vilinga, vunoni na vukuasi vua Yehova va likelavio. Kaha “va na litanesa” ku meso a Njambi.​—1 Kolintu 6:9-11.

9. Vika lia handeka limo livulu ku tuala ha viIgreja via mu Afrika?

⁹ Vakua malombelo a engi ve ku litumbula nguavo va tantekeya vusunga. Linga vantu va tsiliele mezi avo vamo ve ku linga vikomoueso. Ngeci mua, ku tuala ha viIgreja via mu Afrika, Livulu limo lia handeka ngualio: “Vilinga via mahesi na vumbanda vali na ku vilinga honi ku [vivunga via viha via Vakua Kilistu] . . . Vantu vaco ve ku litumbula nguavo va kala na ngolo ya ku taha na ku linga vikomoueso. Vapolofeto vavo ve ku hana vindzozi na ku langulula vilota. Ve ku pangesa mema a ku lela, mazi a ku lela, muto, vindeya na insensu mu ku saka vantu na ku niunga ku mavezi.”

10, 11. Omo lia vika vikomoueso via matangua ano ka via muesele ngecize vulombelo vuaco va vu tava kuli Njambi?

¹⁰ Vakua malombelo aco ve ku handeka nguavo vikomoueso viavo via muesa ngecize vulombelo vuavo va vu vezikisa kuli Njambi. Vunoni vikomoueso ka vie ku muesa ngecize Yehova ua tava vulombelo vuaco houe. Muomu Satana ue ku hana ngolo ku vakua ku lemesa va makuli va linge “vikomoueso via makuli.” (2 Tesalonika 2:9) Cikuavo naua, Mbimbiliya ya handekele laza nguayo vikomoueso via kuli Njambi, ngeci mua vupolofeto, ku handeka malimi, na mana a ku hiana “va ka vi nongesa.”​—1 Kolintu 13:8.

¹¹ Yesu ua tu mamuine ngueni: “Kati uose a handeka nange, ngueni, Muangana, Muangana, a kengila mu vuangana vua muilu, cahi; ku vanga uze ue ku linga cizango ca Tata u li muilu. Va vengi va ka handeka ku litangua lize, nguavo, Muangana, Muangana, ka tua zimbuile vupolofeto mu lizina liove, na vandemone ka tua va fumisile na lizina liove, na vipupu via kama via ngolo ka tua vi lingile na lizina liove, ni? Kaha ange nji ka va kuania, nguange, Ka nja mi tantekeyele na ntsimbu na imo yahi: fumenu kuli ange enu vakua ku linga vupi.”​—Mateo 7:21-23.

12. Veya va ka kovela mu Vuangana vua muilu?

¹² Kaha veya va ka kovela mu Vuangana vua muilu? Vaze ve ku linga cizango ca Yehova.

13. Cipanga cika Njambi na tumu vangamba veni lelo, kaha veya vali na ku ci linga?

¹³ Cika cizango ca Njambi ku vangamba veni lelo? Yesu ua handekele ngueni: “Kaha zimpande ezi vene zia cili zia vuangana va ka zi ambulula ku vifuti viose, zi ka pua vukaleho vua kuli vakua vifuti viose.” (Mateo 24:14) Vakaleho va Yehova ve ku linga eci cipanga na ntuima ya kama.

14. Vika Vuangana vua Njambi, kaha veya va ka sika mu Vuangana vuaco?

¹⁴ Mu “vifuti viose,” Vakaleho va Yehova ve ku ambulula muzimbu ua Vuangana vua Njambi, nguvulu ya muilu ize i ka sika mavu ose mu vuviuke. Ve ku longesa nguavo Yehova ua hangula Yesu Kilistu ku pua Muangana vua Vuangana vua Njambi, hamo lika na vantu 144.000 va va hangula ha mavu.​—Ndaniele 7:14, 18; Ku-Solola 14:1, 4.

15. Vuangana vua Njambi vu ka nongesa vika?

¹⁵ Vakaleho ve ku muesa ku vantu mu Mbimbiliya ngecize Vuangana vua Njambi vu ka nongesa mavu a Satana ose. Vu ka nongesa vulombelo vua Makuli na vilongesa viavuo vize vie ku sahula Njambi na ku singimika Ndiavu! (Ku-Solola 18:8) Mavuangana a vantu ose nao va ku a nongesa, muomu a kala mu vutozi na Njambi!​—Ndaniele 2:44.

16. Veya va ka pua vasuana va Yesu Kilistu, kaha kulihi va ka yoyela?

¹⁶ Cikuavo naua, Vakaleho va Yehova ve ku ambulula nguavo Yesu Kilistu a ka neha vivezikiso kuli vose ve ku linga vize via tonda Njambi. Va ka pua vasuana veni ha mavu. Mbimbiliya nguayo: “A kohiela mukua ku zela omo a tambeka, na muhutu uze kesi na mukuasi. A ka tetela vahutu na vakua ku zela na miono ya vakua ku zela a ka i ohiela.”​—Visamo 72:12, 13.

17. Veya lika ve ku ambulula Vuangana vua Njambi?

¹⁷ Ka kuesi civunga ceka ca vantu ce ku linga cizango ca Njambi mu ku ambulula muzimbu ua cili ua Vuangana. Vakaleho va Yehova vakevo lika ve ku ambulula Vuangana vua Njambi mu mavu ose.