1. Ku tuala ha ku lemesa, kapandi kaka vali nako vantu vose?

YESU ngueni: “Ou ka lipandakana nange ikeye mukua nkole yange.” (Mateo 12:30) Kua kala lika mitamba ivali, nga ka tuesi kuli Yehova tuli kuli Satana. Vantu va vengi ve ku singanieka nguavo ve ku pangela Njambi mu njila ya mu ya ku mutima, vunoni Mbimbiliya ya handeka nguayo Satana ali “ku onga mavu ose.” (Ku-Solola 12:9) Makulukazi na makulukazi a vantu va tsiliela nguavo vali na ku lemesa Njambi, vunoni vali mpundu na ku pangela Satana Ndiavu! Vantu vose va na pande ku li hanguila: Nga va pangela Yehova “Njambi ua vusunga” ni ‘ise ya makuli’ Satana. ​—Visamo 31:5; Yoano 8:44.

2. Tumbulenu imo njila ye ku pangesa Satana mu ku lingisa vantu kati va lemese Yehova.

² Ku hangula ku pangela Yehova, cikeco ku hangula na mana, muomu cikeco ca ya Njambi ku mutima. Vunoni uose ue ku pangela Njambi, Satana ka mu lemene; kaha ue ku kokela lamba na visoti ku vose ve ku lingamo. Njila imo ye ku linga ngoco ya pua ku lingisa vantu va tsope na ku luisa muntu uaco, halumo vavusamba ni vavusoko vueni vene. Yesu ua mamuine ngueni: “Vakua ndzivo ya muntu vakevo va ka pua vakua nkole yeni.”​—Mateo 10:36.

3. Nga vavusoko ni vavusamba venu va mi luisa omo lia ku lemesa Njambi, vati mu linga?

³ Nga evi vi ka mi solokela, vati mu ka linga? Vantu vavengi va tantekeya nguavo ku  lemesa cavo, kati ca vusunga, vunoni ka ve ku tundamo. Ve ku singanieka nguavo, ku tundamo ca pua ku alulukila vavusoko. Mukemuo ni? Nga mu nongonona ngecize vamo vavusoko vuenu va na kala na ku pangesa vihemba vie ku liana, ka mu va mamuna nguenu vihemba viaco vie ku liana ni? Mu tava ku lipandakana navo mu ku pangesa vihemba viaco, ni kuahi?

4. Vika Yehosua ua lekele vaIsaleli ku tuala ha ku lemesa?

⁴ Yehosua ua lekele vaIsaleli va likele ku lemesa ca cipi na vilika vikuavo vi va kele na ku linga vaiseavo. Ua va lekele ngueni: “Vuovuno ngoco vene ivuilenu Yehova vuoma, na ku mu pangela na vucili na vusunga; kaha fumisenu vanjambi vaze va va pangelele vaisuenu mu sinia lia ndonga, na mu Ingito; kaha pangelenu Yehova.” (Yehosua 24:14) Yehosua ua kakatelele kuli Yehova, kaha Yehova mu vezikisile. Nga tu kakatela kuli Yehova, netu a ka tu vezikisa.​—2 Samuele 22:26.

5. Vika tua pande ku nongesela vikumba via ku likikiya navio?

⁵ Linga muntu a patuke ku vulombelo vua makuli, na pande ku naua ku nongesa nkala vikumba via vulozi via kala navio, ngeci mua mikalo, vimpelo, tundzeya na maseka a ku likikiya na vikumba vieka ngeci muevi. Ca pua ca seho ku linga evi, muomu ce ku muesa ngecize tua tsiliela Yehova mu vutuntu.

6. Vati Vakua Kilistu va ku livanga va lingile mikanda yavo ya vulozi?

⁶ Tu ci talenu vi va lingile vamo Vakua Kilistu va ku livanga mu va hanguile ku tava vulombelo vua vusunga. Mbimbiliya nguayo: “Kati va vandende va vaze va lingile via vulozi va nehele mikanda yavo hamo lika, na ku i tsimika ku meso a vose.”​—Vilinga 19:19.

7. Vika tua pande ku linga nga vandemone va tu yandesa?

⁷ Vamo va putukile ku pangela Yehova, omo ku laza va kele na vulozi , mahesi ni tufuta, vandemone va va yandesele. Nga nenu vi mi solokela, tambakanenu Yehova na lizi lia kama mu civundilo, oku mu tumbula lizina lieni. Kaha Yehova a ka mi kuasa.​—Visimo 18:10; Tiango 4:7.

8. Vati Vakua Kilistu ve ku mona tumponia, vifikula na vikupulo via mu ku lemesa ca makuli?

⁸ Vose vaze va tonda ku pangela Yehova ka va pandele ku niunga ni ku pangesa tumponia, vifikula ni vikupulo via mu ku lemesa ca makuli. Vakua Kilistu va vusunga ve ku “enda na ku tsiliela kati na ku mona.” (2 Kolintu 5:7) Ve ku singimika lisiko lia Njambi lize lia vindika ku pangesa nkala fikula ni cifua mu ku lemesa.​—Ezundu 20:4, 5.

9. Cimamuna cika ya hana Mbimbiliya ku tuala ha ku pua mukua mangana?

⁹ Mbimbiliya nguayo: “Liendele na vakua mangana, kaha u ka pua mukua mangana.” (Visimo 13:20) Nga tu tonda ku pua vakua mangana, tua pande ku enda ni likuatasana na Vakaleho va Yehova. Muomu vakevo vali na ku endela mu njila i tuala ku muono.​—Mateo 7:14.

10. Vati Vakaleho va Yehova va hasa ku mi kuasa ku pangela Njambi?

¹⁰ Vakaleho va haka seho mpundu ku vantu. Cipanga cavo ca pua ku kuasa vantu vakua vucili vevuisise vusunga vua mu Mbimbiliya vuze vu tuala ku muono ka ue ku hua. Va hasa ku mi kuasa mu ku mi longesa Mbimbiliya vuana. Va ka kumbulula vihula vienu na ku mi lekesa vati mu hasa ku pangesa mana a mu Mbimbiliya mu ku yoya cenu.​—Yoano 17:3.

11. Vati viuano via Vakua Kilistu vi ka mi kuasa?

¹¹ Ku viuano viavo, cikumakuma vie ku hitila ku Vindzivo via Vuangana, mu ka lilongesa via vinjila via Yehova. Mu ku yako mu ka kaniamesa cizango cenu ca ku lemesa Njambi mu vulombelo vua vusunga. Kaha mu ka lilongesa naua mua ku kuasela vakuenu va lilongese vusunga vua mu Mbimbiliya.​—VaHevelu 10:24, 25.

12. Vati civundilo ci hasa ku mi kuasa ku pangela Njambi?

¹² Omo mu tualelelaho ku lilongesa via cizango na vutumbe vua Yehova, mu kevuisisa na ku lema cikuma vinjila vieni via cilemo. Kaha na cizango cenu ca ku linga vize via mu ya ku mutima na ku viana vize ka via mu ile ku  mutima, ci ka kola. Vulukenu ngecize mu hasa ku avundila kuli Yehova a mi kuase ku linga via cili na ku viana via vipi.​—1 Kolintu 6:9, 10; Filipu 4:6.

13. Vati mu hasa ku vuisa Yehova ndzolela ku mutima?

¹³ Mu ku hita ca ntsimbu, omo lutsilielo luenu lu ka kola, mua vusunga mu ka mona seho ya ku-lihana na ku mi mbatiza ku pua Mukaleho ua Yehova. Mu ku kovela ha civunga ca vangamba va Yehova, mu ka vuisa Yehova ndzolela ku mutima. (Visimo 27:11) Mu ka kala ha kati ka vantu va ku vezika va tumbula Njambi ngueni: “Nji ka kala muli vakevo, kaha nji kenda muli vakevo; Nange nji ka pua Njambi yavo, Navo va ka pua vantu vange.”​—2 Kolintu 6:16.