Aci singanieke ha cimueso eci: Tomasi ka tondo kuya ku sikola lelo. Ni mene. Ambe tangua lieka, a tonda ku likela mpundu. Visoti vieni vi na putukile vingonde vitatu ku nima, omo vakuavo ku sikola va mu vangeyele viuma via ku pihia. Kaha va mu lundumuna mazina a ku pihia. Vintsimbu vimo vakuavo ve ku uisila mikanda ya Tomasi ha mavu na ku likuisa ngue va na sevuka, ni umo ha kati kavo ue ku mu nakula, omo a tenguluka ka mono muntu uaco. Zau ni vi na ka ila mueka, vakuavo va na ka mu tuma mesaje i vuisa vuoma . . .

Nga yove Tomasi, vati u ne ku linga?

Kati u ivue ngue ka uesi na ngolo, kuli vimo vi u hasa ku linga! U hasa ku tingula mukua ku ku pakesa ca ku hona nkome. Mu njila ika?

•   LIKELE LIKA KULU. Mbimbiliya nguayo: “Ciheve a ambulula [ni ku tuhula] matoto eni ose; vunoni mukua mangana a a vindika na ku a holuesa.” (Visimo 29:11) Nga u holoka​—vutuhu mukati u na niengua​—Vakua ku ku pakesa va hasa ku hona na ku likela.

• KATI U HILUISE VUPI KU VUPI. Mbimbiliya nguayo: “Kati mu lingule  . . .ca cipi neci ca cipi.” (Loma 12:17) Ku hiluisa vupi ku vupi ci hasa ku lika ku vueza ku vusonde.

• KATI UENDELE KUZE KULI VUSONDE. Mbimbiliya nguayo: “Mukua liano a mona vupi, kaha a vanda.” (Visimo 22:3) Linga cose mu ku tina ku vantu vakua mbuanja na vakua ku ku pakesa.

• KUMBULULA MU CIFUA KA VA LAVELELELE. Mbimbiliya nguayo: “Ku-kuania civotsi ci tengesa vukalu.” (Visimo 15:1) U hasa ku vi tuala mu ku liseseka. Ca ku muenako, nga mukua ku ku pakesa a handeka ngueni “tala lize livila vukama,” u hasa ku handeka nguove “cili, nja pande ku tepulula ku mutupu, ni vati?!”

• TUNDAHO. Nora ua miaka 19, ua handekele ngueni: “Ku holoka ce ku muesa ngecize u ua ku-hia kaha ua kaniama ku hiana uze a ku pakesa, muomu ce ku muesa ngecize ue ku kuata mutima​—cifua ca cili ca kambela mukua ku ku pakesa.”​—2 Timoteo 2:24.

• MUESA NGECIZE UA LIHAKA SEHO. Vakua ku pakesa ve ku kava vaze ka va lilemene vakevo vavene, muomu vantu va cifua caco ka ve ku liohiela vavene. Vunoni, cingi ca vakua ku pakesa ve ku likela, nga ka u va hana ngolo hali ove.

• LEKAKO MUNTU. Umo ua puile mulongisi ku sikola, ngueni: “Nja kele na ku leka uose ndongesi u vali na ku pakesa a ambulule. Ca pua ca cili ku lingamo, muomu ci hasa ku ohiela muntu ueka ku ku mu pakesa.”