Aci singanieke ha cimueso eci: Kashimbi a tantekeya Kameya mu vingonde vivali lika, vunoni ali na ku ivua ngue ua mu tantekeya miaka yose. Ntsimbu yose ve ku lituma vimesaje, ku simutuila ku telefone, kaha nkala muntu a hasa ku manusula vi a na tondele ku handeka mukuavo! Vunoni Kameya a tonda honi vieka kati ku simutuila lika.

Mu nima ya vingonde vivali, Kameya na Kashimbi ve ku likuata lika ku mavoko na ku litsuemba lika kamandende. Kashimbi ka tondo ku tuvakana oho. Vunoni ka tondo Kameya a mu seze. Muomu Kameya ikeye lika ue ku mu vuisa ndzolela na ku mu mona ku vuaha ku hiana vose. Cikuavo naua Kashimbi a lisimpisa ivene ngueni: “Tua lilema umo na mukuavo . . . ”

Nga uli na miaka ya ku puamo mu ku litantekeya na muntu kaha uli mu visoti ngeci via Kashimbi, vati u linga?

Nga u londa kuilu kaha u seteka ku pulula, u vulumuka, muomu uli na ku sembulula lisiko lia mavu. Na vuno vene, nga u sembulula masiko a Njambi, ngeci mua eli: ‘Zilenu ku vupangala,’ u ka uila mu luvinda lua kama.​—1 Tesalonika 4:3.

Vika vie ku iza mu ku sembulula eli lisiko lia vupangala? Mbimbiliya nguayo: “Mukua ku linga vupangala a livulumuna ku muvila ueni ivene.” (1 Kolintu 6:18) Cili vene ni?

 Vakua ku tondesesa va uana ngecize cingi ca vakuendze na vahumbe va linga vupangala ve ku hita mu visoti evi:

• CITAKU-TAKU. Cingi ca vakuendze na vahumbe va linga vupangala ve ku liveya cikuma mu nima yaco.

• KU LIKELA KU LIKULAHELA UMO NA MUKUAVO. Mu nima ya ku limona ku mivila, nkala muntu ha kati kavo ue ku lihula ngueni: ‘Neya naua ou mukuetu ua limona neni ku mivila?’

• KU LIVEYA. Mua vusunga, cingi ca vahumbe va lema muntu uze a va niunga, kati ku va pihisa ngoco. Kaha cingi ca vakuendze ve ku mbila kuti mpuevo ua tavele ku mu sindiya ku limona neni ku mivila.

• Ku tsiha mpanga: Nga u tava ku linga vupangala, u lipuisa cilinge ca ngoco mu ku yengula cuma ca seho ya kama. (Loma 1:24) Muvila uove ua kala na seho ya kama, kati ua ku hana ngoco!

  Muesa ngecize u ua ku kaniama mu ku ‘zila ku vupangala.’ (1 Tesalonika 4:⁠3) Kaha omo u ka ambata ni ku somboka, mu ka limona ku mivila. Kaha u ka hasa ku lingamo na mutima umo lika, ca ku hona cisoti ca mutima, ku liveya na liova, vi ve ku hita vaze ve ku limona ku mivila ca ku hona ku liambata.​—Visimo 7:22, 23; 1 Kolintu 7:3.

Ku limona ku mivila ca pua vuana vua hana Njambi kuli vaze lika va liambata. Vose ve ku lingamo ca ku hona ku liambata ve ku pihisa ovu vuana. Ca pua ngue ku nona vuzalo vua cili vu va na ku hana, na ku vu hundisa mazilo

• Nga muntu ua ku lema mpundu a hasa ku haka muvila ni cihindu cove mu vusonde ni?

• Nga muntu ua ku haka seho mpundu a ka seteka ku haka vusamba vuove na Njambi mu vusonde ni?—VaHevelu 13:4.