Aci singanieke ha cimueso eci: Maliya a litala ha katalelo, kaha a mona ngecize ua ku lava cikuma. Kaha ngueni: “Nja pande ku venga.” Vunoni visemi veni na vavusamba va mu leka nguavo “ua ku venga.”

Matangua ano Maliya na kala na ku singanieka ha ku tonda njila ya ikalu “ya ku venga cikuma.” Ka tondo ku likuita naua mazi vunoni a tonda ku nua vihemba linga a venge vuasi . . .

Nga yove Maliya, vati u ne ku linga?

Ka ca puile vupi ku lisosomua na cifua ca muvila uove. Muomu Mbimbiliya nayo ya sangala vantu vavengi va vamala na vampuevo omo lia ku sungama ca mivila yavo. Vamo mazina avo, Sala, Lakele, Avingaile, Yosefe na Ndaviti. Mbimbiliya nguayo mpuevo ua lizina Avisange “ua lelemene cikuma.”​—1 Vamiangana 1:4.

Vunoni, vakuendze na vahumbe vavengi ve ku uma cikuma mitima ku cifua cavo. Kaha eci ci hasa ku koka visoti via vingi. Tu ci talenu:

• Vakua ku tondesesa va uana ngecize cingi ca vampuevo ve ku singanieka nguavo va ku pihia muomu va ku lava, vunoni cingi cavo ka va puile mpundu va ku lava.

• Civunga ceka ca vakua ku tondesesa va uana ngecize vampuevo va vengi va vikanda via ku venga, va handekele nguavo va ku lava!

• Mu ku tonda ku venga, vavengi va na uanamo mavezi a vikanda a ku linga na ha meso vui.

 Nga u li na ku ivua cimo ku vavala ha cikanda ngeci mua kuzua omo lia ku likuita ni ku nua vihemba via ku vengesa, tonda vukuasi. Putuka mu ku lekako visemi vove ni umo mukuluntu u ua tsiliela. Mbimbiliya nguayo: “Kavusamba a lema ntsimbu yose; na muanetu na semuuila mu ku kuasa ku lamba.”​—Visimo 17:17.

Mua vusunga, vuntu vua mukati vukevuo vue ku lingisa muntu ku mu lema ku vakuavo ni kuahi. Aci singanieke hali Avisalome, muana Muangana Ndaviti. Mbimbiliya nguayo:

“Ka kua kele umo ua ku sangala cikuma ngue Avisalome omo ku lelema ceni. . . ka kua kele cipenga kuli ikeye.”​—2 Samuele 14:⁠25.

Vunoni mukuendze uaco ua puile mukua ku lihalesa, mukua cipululu na cingungu! Ngeci mukemuo, Mbimbiliya ka ya mu tumbuilile vuntu vua cili; vunoni nguayo mukua vungungu na vizindo.

Ngeci mukemuo, Mbimbiliya ya tu mamuna nguayo:

‘Zalenu vuntu vua vuha.’​—Kolose 3:10.

Vutuhu ka ca puile vupi ku tonda ku sungama ku muvila, vunoni ca kala na seho ya kama kati cifua ca muvila vunoni vuntu. Mu ku hita ca ntsimbu vifua via cili vikevio vi ka lingisa vakuenu va ku leme kati ku sungama muvila ni cihanga houe. Umo muana mpuevo ua lizina Filicia ngueni “Ku vuaha ce ku koka vuasi vantu, vunoni vi ve ku vuluka cikuma vifua viove na vuntu vuove, kati ku vuaha.”

Vuno vintsimbu via vingi ue ku liveya cifua ca muvila uove ni?

Ua singaniekaho laza ku nua ni ku tambula vinguya ni vikuavo vieka mu ku sungamesa muvila ni?

Vika ua tonda ku sungamesa ha muvila uove? (Tua cipalo ha vize vi ua tonda ku alulula.)

• VULAHA

• VUKAMA

• VINKAMBU

• CIFUA CA MUVILA

• CIHANGA

• CIKANDA

Nga u na tavele eyo ku vihula vivali via katete kaha u na tu cipalo ha viuma vitatu ni viuana mu cihula ca mu citatu, tantekeya nguove: Citava vakuenu ka ve ku ku mona ku pihia ngue mu ue ku limona ove ivene. Ca casi ku hianesamo ku lisosomua na cifua ca muvila uove kaha na ku linga viuma via vikalu mu ku u sungamesa.—1 Samuele 16:7.