Aci singanieke cimueso eci: Kakuhu ali ku cilika vunoni vuovuno na hete kaha evua lizi lia muntu ua tantekeya ngualio:

Kakuhu a taleko a mona kavusamba keni Masela na vingalafua vivali via ku sokolola. Na tantekeya ngueni vuala vulimo. Masela a suenesa ngalafua imo kuli Kakuhu na ku handeka ngueni: “Mukuetu u napuho ha ku livuisa senga, citava u makeleko tumo?”

Kakuhu tele a tonda ku viana vunoni Masela kavusamba keni. Kakuhu ka tondo kavusamba keni a mone ngueni ali na ku mu yengula. Cikuavo naua, Masela ua pua muntu ua cili. Nga neni ali na ku nua kaha ku nuako tumo kati mulonga. Kaha mutima ua Kakuhu u mu leka nguauo: ‘Tua ku makela lika, kati ngue ku nua vidroga.’

Nga yove Kakuhu, vati u linga?

Linga u hase ku hangula viuma via cili mu ceseko eci, ua pande ku litantekeya. Ku litantekeya ove ivene ca pua ku tantekeya vuntu vuove ni nguetu ku tantekeya yove iya na viuma vi ua tsiliela. Ku kala na mana aco ci ka ku hana ngolo ya ku endesa muono uove ivene, kati ku ecelela vakuenu vendese muono uove.​—1 Kolintu 9:​26, 27.

Vati u hasa ku kala na ngolo ya cifua eci? Ku kumbulula vihula vi na hatako ca pua vuputukilo vua cili.

Nga u litantekeya vuino, u ka pua ngue muti ua mizi ya ku kaniama, ka ue kuua ambe ku niondzi ya kama

Ku tantekeya vutongue ni nguetu vuana vu ua kala navuo ci hasa ku ku kaniamesa.

LUNGANO LUA MU MBIMBILIYA: Kapostolo Paulu ua handekele ngueni: “Vutuhu nji na sahuka ku  lizi, ku mana ni, katimo.” (2 Kolintu 11:⁠6) Omo lia ku tantekeya vuino Visoneka, Paulu ua hasele ku kaniama ambe mu va mu pindisile vakuavo. Ka tavesele vihandeka via ku pihia via vakuavo vi mu hiluisile mu nima.​—2 Kolintu 10:10; 11:5.

LIHILULE OVE IVENE: Soneka muintsi, vutongue ni vuana vu ua kala navuo.

Vuovuno honi soneka cifua ca kama ci ua kala naco. (Ca ku muenako, ua kala na ngozi? vuhuanga? citava ku ku kulahela? ue ku niunga ntsimbu ni?

Ngeci mua mukole ka ue ku kola ngo, nga haze ha va u zitikila ka ha kuatele vuino, nove u hasa ku zeya nga uecelela vuzeye vuove vu ku tuamenene.

LUNGANO LUA MU MBIMBILIYA: Paulu ua tantekeya vuzeye vueni. Ua sonekele ngueni: “Nji viukilila mu mezi a lisiko a Njambi na vuntu vua mu kati: Vunoni nji mona mezi eka a lisiko mu vilio viange, akeo a li na ku lua ndzita na mezi a lisiko a mu mutima uange, na akeo ali na ku nji ku kutiliya ku vundzinda vua mezi a lisiko a vupi.”​—Loma 7:22, 23.

LIHILULE OVE IVENE.Vuzeye vuka ua pande ku lilongesa ku yoya navuo?

Vuno u hasa ku londa mu likalu lia muntu na ku mu leka a zinguluke limbo noho mazi a hua mu likalu lieni ni? Ku lingamo ci ka pua vuheve​—⁠na ku pihisa vimbongo!

Vika tu lilongesaho? Vizango vie ku kuasa muntu ku kala na vutumbe kaha ku lingamo ce ku mu niunga ku ku lipakesa ngoco. Muomu u ka tantekeya cihela ci u tonda kuya na vati u hasa ku hetako.

LUNGANO LUA MU MBIMBILIYA: Paulu ua sonekele ngueni: “Yange nji tunta cili, kati ngue ngoco, houe.” (1 Kolintu 9:26) Paulu ka yoyele lika ngoco, vunoni ua kele na vizango via tondele ku puisamo kaha ua yoyele muaya vizango viaco.​—Filipu 3:​12-14.

LIHILULE OVE IVENE. Soneka vizango vitatu vi u tonda ku puisamo muaka uizaho.

Nga ka ua kele na viuma vi ua tsiliela, u ka kala na mitima ivali mu ku hangula viuma. Ngeci mua congono, u ka alulula mavala ove linga mu litombole na vakuenu​—kaha ku lingamo ci ka muesa ngecize ka u litantekeya ove ivene.

Vunoni nga vilinga viove vi kemana ha viuma vi ua tsiliela, u ka muesa ngecize ua lifuila vene​—ka ue ku kava vi ve ku linga vakuenu.

LUNGANO LUA MU MBIMBILIYA: Kapolofeto Ndaniele, halumo mua puile mukuendze, ua likuminyine ni nguetu “ua kanene mu mutima ueni” ku ononoka masiko a Njambi, vutuhu va mu tundisile ku vavusoko vueni. (Ndaniele 1:⁠8) Ku lingamo, ca mu kuasele ku liimanena ikeye ivene. Ndaniele ua kavele vize via tsilielele.

LIHILULE OVE IVENE. Viuma vika ua tsiliela? Ca ku muenako: Ua tsiliela muli Njambi ni? Nga mukemuo, omo lia vika? Vika via ku lingisa ku kala na vusunga ngecize Njambi kua kala?

Ua tsiliela ngecize masiko a Njambi va a pangela ku ku niunga ni? Nga mukemuo, omo lia vika?

IMu ku manusula, u tonda ku fua ngue vika​—ngue lifo lize lie ku pekumuka ngoco ku luhundzi ni ngue muti ka ue kuua ambe ku niondzi ya kama? Litantekeye vuino, kaha u ka pua ngue muti u tu na tumbula. Kaha u ka hasa ku kumbulula cihula, Yange iya?