KAPITULU 15
Njila ya Cili ya ku Lemeselamo Njambi
1. Iya na pande ku tu leka vati tua pande ku lemesa Njambi?
CINGI ca vakua malombelo ve ku handeka nguavo ve ku longesa vusunga ku tuala hali Njambi. Vunoni kati vusunga, muomu vakua malombelo ve ku longesa viuma via ku liseza-seza ku tuala hali Njambi na vati tua pande ku mu lemesa. Vati tu hasa ku tantekeya njila ya cili ya ku lemeselamo Njambi? Yehova ikeye lika na pande ku tu leka vati tua pande ku mu lemesa.
2. Vati mu hasa ku lilongesa njila ya cili ya ku lemeselamo Njambi?
2 Yehova ua tu hana Mbimbiliya linga tu lilongese njila ya cili i tua pande ku mu lemeselamo. Ngeci mukemuo, lilongesenu Mbimbiliya kaha Yehova a ka mi vezikisa ku uana vukuasi mu vilongesa vieni muomu ua mi haka seho ya kama.—Isaya 48:17.
3. Njambi a tonda tu linge vika?
3 Vamo vantu ve ku handeka nguavo Njambi ue ku tava malombelo ose, vunoni kati vikevio via tu longesa Yesu. Muomu ua handekele ngueni: “Kati uose a handeka nange, ngueni, Muangana, Muangana, a kengila mu vuangana vua muilu, cahi; ku vanga uze ue ku linga cizango ca Tata u li muilu.” Ngeci mukemuo ca pua ca seho ku lilongesa cizango ca Njambi na ku ci linga. Eci ca pua cimpande ca seho muomu Yesu ua tumbuile vakua lisino kuli Njambi ngue “vakua ku linga vupi.”—Mateo 7:21-23.
4. Vika ua handekele Yesu ku tuala ha ku linga cizango ca Njambi?
4 Yesu ua tu mamuna ngueni nga tu tonda ku linga cizango ca Njambi, tu ka hita mu visoti. Ua handekele ngueni: “Kovelenu mu mbelo ya indende, muomu mbelo ya kama na njila ya zandzavala ya ya ku ku-nonga, kaha va vengi va li na ku kovelamo. Muomu mbelo ya indende na njila ya lisuata, ya ya ku muono, kaha va vandende lika va i uana.” (Mateo 7:13, 14) Njila ya lisuata, ni nguetu njila ya cili ya ku lemeselamo Njambi, i tuala ku muono ka ue ku hua. Njila ya zandzavala, ni njila ya ku pihia ya ku lemeselamo Njambi i tuala ku ku nonga. Vunoni Yehova ka tondo linga tu ka nonge. Ngeci ua hana vantu vose ntsimbu ya ku lilongesa vieni.—2 Petulu 3:9.
NJILA YA CILI YA KU LEMESELAMO NJAMBI
5. Vati mu hasa ku nongonona vakua ku lemesa Njambi mu njila ya cili?
5 Yesu ua handekele ngueni citava tu tantekeye vakua ku lemesa Njambi mu njila ya cili. Tu hasa ku lingamo mu ku hilula ha viuma vi va tsiliela na vilinga viavo. Yesu ngueni: “Ku mihako yavo mu ka va tantekeya.” Kaha ua vuezeleko naua ngueni: “Muti uose ua cili u ima mihako ya cili.” (Mateo 7:16, 17) Eci ka ca lombolokele ngecize vakua ku lemesa Njambi va pua va ku tantuluka houe. Vunoni vangamba va Njambi ve ku tonda ku linga via cili ntsimbu yose. Vuovuno tu talenu vika vi hasa ku tu kuasa ku nongonona vakua ku lemesa Njambi mu njila ya cili.
6, 7. Omo lia vika ku lemesa ca vusunga ca pande ku tunda muMbimbiliya? Vika tu hasa ku lilongesa ku lungano lua Yesu?
6 Ku lemesa cetu ca pande ku mana ha Mbimbiliya. Mbimbiliya nguayo: “Visoneka viose via na tumbula Njambi na muku ueni, vi silivila ku longesa, ku handekela, ku sungamesa, ku longesa vize via vuviuke: linga muntu ua Njambi a pue ua mutuntu, na vuino ku panga vipanga viose via ku viuka.” (2 Timoteo 3:16, 17) Kaha kapostolo Paulu ua lekele Vakua Kilistu ngueni: “Omo yenu mua tambuile kuli etu lizi lia luhande luze, likelio lizi lia Njambi vene, mua li tambuile kati ngue lize lia vantu, vunoni ngue omo lia pua mua vusunga vene, lizi lia Njambi.” (1 Tesalonika 2:13) Ku lemesa ca vusunga cemana ha Mbimbiliya, Lizi lia Njambi. Ka cemanene ha visinganieka via vantu visemua viavo ni vikuavo houe.
7 Viose via longesele Yesu ua vi tundisile mu Lizi lia Njambi. (Tandenu Yoano 17:17.) Ua tumbuile Visoneka ntsimbu yose. (Mateo 4:4, 7, 10) Vangamba va Njambi va vusunga ve ku kava lungano lua Yesu, mu ku tundisa vilongesa viavo viose mu Mbimbiliya.
8. Vika ua tu longesa Yesu ku tuala ha ku lemesa Yehova?
8 Tua pande ku lemesa lika Yehova. Visamo 83:18 nguayo: “Yove lika lizina liove Yehova, yove Mukua ku Hiana viose hose ha mavu.” Yesu ua tondele vantu va tantekeye iya mpundu Njambi ua vusunga kaha ua va longesele lizina lieni. (Tandenu Yoano 17:6.) Yesu ua handekele ngueni: “U ka lemesa Muangana Njambi Yove, Ikeye lika u ka singimika.” (Mateo 4:10) Ngeci mukemuo mu ku pua vangamba va Njambi, tue ku kava lungano lua Yesu. Tue ku lemesa lika Yehova, ku pangesa lizina lieni na ku lekako vakuetu via lizina lieni na cizango ceni kuli etu.
9, 10. Vati tue ku muesa cilemo ku umo na mukuavo?
9 Tua pande ku lema vantu mu vusunga. Yesu ua longesele vandongesi veni ku lilema umo na mukuavo. (Tandenu Yoano 13:35.) Ka tue ku tala kua tunda muanetu, ni cisemua ceni, cipue nga mpite ni cihutu. Ku lilema umo na mukuavo ca pande ku tu lingisa ku likuata kumo na vamuanetu. (Kolose 3:14) Ngeci ka tue kuya ku ndzita na ku tsiha vantu. Mbimbiliya nguayo: “Mukemuo vana va Njambi va soloka, na vana va Satana: uose ke ku linga vuviuke, kati ua Njambi, cipue ou ke ku lema muanaye.” Kaha ya vuezako nguayo: “Tu lileme umo na mukuavo: Kati ngue omo Kaini ua puile . . . mukua vupi, kaha ua tsihile ntsongo yeni.”—1 Yoano 3:10-12; 4:20, 21.
10 Tue ku pangesa ntsimbu, ngolo, na vupite vuetu mu ku kuasa na ku likaniamesa umo na mukuavo. (VaHevelu 10:24, 25) Kaha tue ku linga “vize via viuka kuli vantu vose.”—Ngalata 6:10.
11. Vika tua tavela Yesu ku pua njila i tuala kuli Njambi?
11 Tua pande ku ononoka Yesu muomu ikeye njila i tuala kuli Njambi. Mbimbiliya nguayo: “Muli ueka ka muesi vuovole: muomu muintsi lia lilu ka muesi lizina lieka, lia ku hana ha kati ka vantu, li tua pande ku ovoka nalio.” (Vilinga 4:12) Mu Kapitulu 5 ka lino livulu, tua lilongesele ngecize Yehova ua tumine Yesu mu ku hana muono ueni ku pua cikombelo ca ku ovola vakua ku ononoka. (Mateo 20:28) Yehova ua hangula Yesu ku pua Muangana ua mavu. Ngeci Mbimbiliya ya tu leka nguayo tua pande ku ononoka Yesu, nga tu tonda ku ka yoya miaka yose.—Tandenu Yoano 3:36.
12. Vika ka tue ku lihakela mu pulitika?
12 Ka tua pandele ku lihaka mu via pulitika. Yesu ka lihakele mu pulitika. Mu va mu sompesele kuli Pilato, muangana ua Loma, Yesu ua mu lekele ngueni: “Vuangana vuange kati vua hano ha mavu.” (Tandenu Yoano 18:36.) Ngeci mua Yesu, tue ku kakatela ku Vuangana vua Njambi vua muilu, ngeci mukemuo, nkala ku cihela ci tua kala ka tue ku lihaka mu pulitika. Vutuhu ngoco, Mbimbiliya ya tu tuma ku ‘ononoka vakua ku suana,’ ni nguetu vanguvulu. (Loma 13:1) Tue ku ononoka masiko a mu cifuti ci tua kala. Vunoni nga limo lisiko li liluisa na masiko a Njambi, tue ku tambuluisa vapostolo, vaze va handekele nguavo: “Tua pande ku ononoka kuli Njambi ku hiana ku vantu.”—Vilinga 5:29; Mako 12:17.
13. Vika tue ku ambulula ku tuala ha Vuangana vua Njambi?
13 Tua tsiliela nguetu Vuangana vua Njambi vukevuo lika vu ka manusula visoti via vantu. Yesu ua handekele ngueni ‘muzimbu ua cili ua Vuangana’ va ka u ambulula mu mavu ose. (Tandenu Mateo 24:14.) Ka kuesi vuangana vueka vuahi vu hasa ku linga viuma vi vu ka tu lingila Vuangana vua Njambi. (Visamo 146:3) Yesu ua tu longesele ku vundila Vuangana vua Njambi ngueni: “Vuangana vuove vu ize. Cizango cove va ci linge, ngue muilu, ngecize ha mavu.” (Mateo 6:10) Mbimbiliya nguayo tangua Vuangana vua Njambi vu ka nongesa mavuangana ose a mavu kaha “vu ka mana ku miaka yose ya ya-ye.”—Ndaniele 2:44.
14. Mu ku mona cenu veya ve ku lemesa Njambi mu vusunga?
14 Mu nima ya ku lilongesa evi vintsina, lihulenu nguenu: ‘Veya ve ku tundisa vilongesa viavo mu Mbimbiliya? Veya ve ku leka vakuavo via lizina lia Njambi? Veya ve ku limuesa cilemo ca vusunga na ku tsiliela ngecize Njambi ua tumine Yesu a ku tu ovole? Veya ka ve ku lihaka mu pulitika? Veya ve ku ambulula nguavo Vuangana vua Njambi vukevuo lika vu ka manusula visoti via vantu?’ Mua vusunga Vakaleho va Yehova lika ve ku lingamo.—Isaya 43:10-12.
VIKA MUA PANDE KU LINGA?
15. Vika tua pande ku linga nga tu tonda Njambi a tave ku lemesa cetu?
15 Ku tsiliela nguetu Njambi kua kala kati cikeco lika ci tondeka. Muomu vandemone navo va tsiliela nguavo Njambi kua kala, vunoni ka ve ku mu ononoka. (Tiango 2:19) Nga tu tonda Njambi a tave ku lemesa cetu, ka tua pandele lika ku mu tsiliela vunoni tua pande naua ku mu ononoka.
16. Vika tua pande ku vianena vulombelo vua makuli?
16 Linga Njambi a tave ku lemesa cetu, tua pande ku viana vulombelo vua makuli. Kapolofeto Isaya ua sonekele ngueni: “Fumenu ha kati keni, livukisienu.” (Isaya 52:11; 2 Kolintu 6:17) Tua pande ku viana viose via likuata na vulombelo vua makuli.
17, 18. “Mbambilone ya Kama” ya pua ika, kaha vika tua pande ku tundilamo vuasi-vuasi?
17 Vulombelo vua makuli vuka? Vua pua nkala vulombelo vue ku longesa vantu ku lemesa Njambi mu njila ka ya litombuele na Lizi lieni. Mbimbiliya ya luka malombelo ose a makuli nguayo “Mbambilone ya Kama.” (Ku-Solola 17:5) Omo lia vika? Muomu mu nima ya Livazi lia Noa, cingi ca vilongesa via malombelo a makuli via putukilile mu mbonge ya Mbambilone. Kaha vilongesa viaco via lisanduokele mu mavu ose. Ca ku muenako, vakua Mbambilone va lemesele vivunga via Vanjambi Vatatu. Na lelo lino, malombelo a engi eku longesa nguayo Njambi ua pua Vanjambi Vatatu, vunoni Mbimbiliya ya longesa nguayo kua kala lika Njambi umo lika ua vusunga, Yehova, kaha Yesu ua pua Muaneni. (Yoano 17:3) Vakua Mbambilone va tsilielele ngecize kua kala umo mutamba ua muntu ue ku tualelelaho ku yoya nga muntu uaco na tsi, kaha ou mutamba uaco u hasa ku yanda mu ngehena ya tuhia. Vunoni kati vusunga.—Talenu Matota 14, 17 na 18.
18 Njambi ua handeka ngueni vuovuno a ku nongesa malombelo ose a makuli. (Ku-Solola 18:8) Mua mono vika vantu va na pande ku tundila mu vulombelo vua makuli vuasi-vuasi ni? Yehova Njambi a tonda nenu mu lingemo omo ku ci li ntsimbu.—Ku-Solola 18:4.
Mu ku pangela Yehova hamo lika na vantu veni, mu ka kovela mu civunga ca vusoko vueni mu mavu ose
19. Omo mu hangula ku pangela Yehova, vati a ka mi niunga?
19 Omo mu hangula ku tunda mu vulombelo vua makuli linga mu ka lemese Yehova, cingi ca vavusamba na vavusoko vuenu ka ci ka va lomboloka kaha va ka seteka ku mi pindisa. Vunoni Yehova a ka kala nenu. Mu ka kovela ku vusoko vua vantu va lilema umo na mukuavo mu vusunga, kaha naua mu ka kala na lulavelelo lua ku ka yoya miaka yose mu mavu a aha a Njambi. (Mako 10:28-30) Kaha naua halumo vamo vavusamba ni vavusoko vuenu vakua ku mi luisa omo lia ku pangela Yehova, va ka tava ku lilongesa Mbimbiliya.
20. Vika ca puila ca seho ku lemesa Njambi mu njila ya cili?
20 Vuovuno Njambi a ka manusula vupi vuose kaha Vuangana vueni vu ka sika mavu. (2 Petulu 3:9, 13) Ntsimbu yaco i ka pua ya cili cikuma! Vantu vose va ka lemesa Njambi mu njila ya tonda ku mu lemesa. Ngeci mukemuo mua pande ku lingako mumo ntsimbu ino vene, na ku lemesa Njambi mu njila ya cili..
