Vulo vue ku pua vusoko vua vuha. Vutuhu mu tualelelaho ku lema na ku singimika visemi venu, mukua ndzivo yenu ikeye honi muntu ua seho cikuma kuli enu hano ha mavu. Vavusoko vuenu ci hasa ku va kaluuila ku tava ngoco. Vunoni vitume via Mbimbiliya vi ka mi kuasa ku puisamo viose vivali, ku yoya mu ciyulo na vavusoko vuenu na ku kolesa vakua ndzivo yenu.

MBIMBILIYA NGUAYO: ‘Singimika iso na noko.’ (Efeso 6:2) Ambe mu kole vati, mua pande ku singimika visemi venu. Tantekeyenu ngecize mukua ndzivo yenu mu ku pua muana neni na pande ku singimika va ise na naye. “Cilemo ka ce ku liveya,” ngeci mukemuo kati mu lisosomue nga mu mona ku likata ca mukua ndzivo yenu na visemi veni.​—1 Kolintu 13:4; Ngalata 5:26.

VI MUA PANDE KU LINGA:

• Litengenu ku mezi ngeci mua: “Vavusoko vuove ve ku nji sembulula ntsimbu yose” ni “Na vimo vi nje ku linga vi va lema vanoko viahi”

• Setekenu ku mona viuma mu njila ye ku vi muenamo mukua ndzivo yenu

MBIMBILIYA NGUAYO: “Ngoco vene yala a ka seza ise na naye na ku kakatela mpuevo yeni: kaha va ka pua ntsitu imo lika.” (Njenisisi 2:24) Ambe nga mua ambata ni mua somboka kasi visemi venu va hasa ku ivua ngue mu ci li mu mavoko avo, kaha va ka tonda ku lihaka cikumakuma mu vulo vuenu.

Yenu na mukua ndzivo yenu, mua pande ku livuasiana vi nginga vi mu ka va hakela kaha na ku va lekavio mu cilemo. Citava ku handeka viuma ngue mu vi nayi na kasingimiko. (Visimo 15:1) Ku likehesa, ku konkama na ntsintsa ya ngozi, ci ka mi kuasa ku yoya mu ndzolela na vavusoko vuenu na ku liyandela “umo na mukuavo na cilemo.”​—Efeso 4:2.

VI MU HASA KU LINGA:

• Nga mu nomu mutima muomu vavusoko vuenu vali na ku likovelesa cikuma mu muono uenu, hangulenu ntsimbu ya cili mu simutuile ha cimpande caco na mukua ndzivo yenu

• Livuasianenu vati mu linga ha citanga caco