Omo Yehova ua tumbikile vusoko, ua kundikile vana mu mavoko a visemi. (Kolose 3:20) Mu ku pua cisemi, muli na kapandi ka ku longesa vana venu ku lema Yehova na ku pua vantu va cili omo va kola. (2 Timoteo 1:5; 3:15) Mua pande naua ku nongonona vika vili mu mitima yavo. Mua vusunga, lungano luenu lua pua lua seho ya kama. Mu hasa lika ku longesa vuino Mezi a Yehova ku vana, nga ha katete a kala mpundu mu mutima uenu.​—Visamo 40:8.

MBIMBILIYA NGUAYO: “Zangulenu mu ku ivua, na ku livandeka mu ku handeka.” (Tiango 1:19) Mua vusunga mua tonda vana veni va livue ku zituka omo va handeka nenu. Vana venu va na pande ku tantekeya ngecize mua lema ku va halakana nga va tonda ku handeka nenu. Uanenu ntsimbu ya ku handeka navo mu ciyulo linga ci va asiuile ku handeka visinganieka viavo. (Tiango 3:18) Nga va mona nguavo mue ku tenuka vuasi va ka kala na vuoma ku handeka nenu. Kalenu na lukakatela ku vana venu kaha ntsimbu yose va muesenu ngecize mua va lema.​—Mateo 3:17; 1 Kolintu 8:1.

VI MUA PANDE KU LINGA:

• Uanenu ntsimbu ya ku halakana vana venu nga va tonda ku handeka nenu

• Handekenu na vana venu ntsimbu yose, kati lika nga kua soloka vimo

MBIMBILIYA NGUAYO: “Uze evuilila lizi a ka uana via cili.” (Visimo 16:20) Vintsimbu vimo ce ku tondeka mu konke vuino mezi vana venu linga mu hase ku ivuisisa vi li mpundu mu mitima yavo. “Uze a kuania te kanda evua, cikeco vuheve na ntsoni kuli ikeye.” (Visimo 18:13) Kati mu kale na vuasi vua ku tenuka.​—Visimo 19:11.

VI MUA PANDE KU LINGA:

• Nkala viuma vi va mi leka vana venu kati mu tenuke ci pue ku va vatuisila

• Vulukenu vika mua hakele seho cikuma mu mua kele ha citso cavo na vati mua kele na ku ivua ku mutima

MBIMBILIYA NGUAYO: ‘‘Muanange, ivuilila ku-longesa ca iso, kaha kati u seze lisiko lia noko.’’ (Visimo 1:8) Yehova ua hana ngolo ya ku sika vana ku cisemi ua yala na ua mpuevo. Mua pande ku longesa vana venu va pue na ku mi singimika na ku mi ononoka. (Efeso 6:1-3) Vana va hasa ku nongonona nga enu visemi ka muesi na “Mutima umo, na cizango cimo.” (1 Kolintu 1:10) Kati mu likanduile zimpata ha meso a vana venu ku tina va likela ku mi ononoka.

VI MUA PANDE KU LINGA:

• Simutuilenu na ku likuminia vati mu longesa vana venu

• Nga ka muesi na ku litombola na mukua ndzivo yenu ku tuala ha cifua ci mua pande ku longeselamo vana aci setekenu ku mona viuma mu njila ya na vi muenamo ikeye

VI YA HANDEKA MBIMBILIYA: ‘Longesa kanike njila i a na pande ku endela.’ (Visimo 22:6) Ku longesa vuino vana ka ce ku lizila ngoco houe. Mua pande ku kala na vutumbe vua ku longesa vana venu. (Visamo 127:4; Visimo 29:17) Ku longesa ka ca lombolokele lika ku hana kasitiku, vunoni ca pua ku kuasa vana vevuisise seho ya masiko aco. (Visimo 28:7) Va longesenu naua ku lema Lizi lia Yehova na ku nongonona vitume vieni. (Visamo 1:2) Eci ci ka va kuasa ku tepesa via cili ku via vipi.​—VaHevelu 5:14.

VI MUA PANDE KU LINGA:

• Kuasenu vana venu va mone Yehova ku pua Njambi ua vusunga uze u va hasa ku tsiliela mpundu

• Va longesenu ku nongonona na ku litenga ku viuma via ku pihia, cikuma-kuma omo va kovela mu internete. Va longesenu ku liniunga ku vaze ve ku tonda ku limona ku mivila na vanike