Omo mu putuka ku yoya hamo na mukua ndzivo yenu, mu ka mona vitanga via ku liseza-seza. Halumo vi hasa ku iza omo lia ku litepa cenu mu visinganieka na cifua ci mue ku muenamo muono. Ntsimbu imo visoti vie ku tungumuna.

Halumo mu hasa ku ivua ntsindiye ya ku tina visoti vie ku soloka, vunoni Mbimbiliya ya tu mamuna ku lua  na visoti vietu. (Mateo 5:23, 24) Mu ka hasa lika ku lua na visoti vienu nga mu kava vitume via Mbimbiliya.

MBIMBILIYA NGUAYO: “Ku i li ntsimbu . . . ya ku handeka.” (Ekelesiaste 3:1, 7) Tondenu ntsimbu ya ku kala hamo, linga mu simutuile ha visoti vienu. Lekenu mukua ndzivo yenu visinganieka vienu na vati muli na ku ivua ku tuala ha visoti viaco. Ntsimbu yose ‘handekenu vusunga’ na mukua ndzivo yenu. (Efeso 4:25) Kati mu livete ambe nga mu ivua vutenu vua kama. Ku likumbulula mu ku konkama, ci ka lingisa ku simutuila cenu kati ci katule luozi.​—Visimo 15:4; 26:20.

Ambe nga ka mua litombuele ha cimpande, kati mu lihandeke mezi a api, cipue ku suva ku muesa cilemo na kasingimiko kuli umo na mukuavo. (Kolose 4:6) Setekenu ku manusula vuasi cimpande, kati mu hitisemo ntunda ya kama, kaha kati mu likele ku lihandekesa.​—Efeso 4:26.

VI MUA PANDE KU LINGA:

• Hangulenu ntsimbu ya cili ya ku simutuila ha visoti viaco

• Nga mukuenu ali na ku handeka, kati mu mu kuate ku lizi. Ntsimbu yenu ya ku handeka amba i heta

MBIMBILIYA NGUAYO: “Lilemienu na mutima uvotsi umo na mukuavo; ku kasingimiko tuamekenu vakuenu ku lutue.” (Loma 12:10) Ku halakana vuino ca pua ca seho. Ivuisisenu vi ali na ku handeka mukua ndzivo yenu na “mutima umo lika . . . na ku konkama.” (1 Petulu 3:8; Tiango 1:19) Kati mu lionge ku halakana. Nga citava hakenu ku mukulo vi muli na ku linga kaha halakanenu vuino via handeka mukua ndzivo yenu, ni mu vundilenu linga mu vi simutuile ntsimbu yeka. Nga mu puisa mukua ndzivo yenu ngue mukuenu kati citozi ka mu ka ‘zangula mu cimbembesi cenu mu ku tenuka.’​—Ekelesiaste 7:9.

VI MUA PANDE KU LINGA:

• Setekenu ku ivuisisa via li na ku handeka mpundu mukuenu, ambe nga vi va mi leka ka via mi ile ku mutima

• Halakanenu muzimbu uli ku nima ya mezi eni. Mu talenu mu mone mpundu cifua ca na u handekelamo na cifua ca lizi lieni

MBIMBILIYA NGUAYO: “Mu vipanga viose mua kala nganio; vunoni vihandeka via milungu vi tuala ku vuhutu lika.” (Visimo 14:23) Ku litombola ha njila ya ku tetelamo cimpande, kati cikeco lika ci tondeka. Mua pande ku puisamo vi mua likuminia. Ku linga ngoco ci ka tondeka ndzili na ku fuitangana cikuma, vunoni mu ka uana vivezikiso. (Visimo 10:4) Nga mu pangela hamo, mu ka tambula “cilunguiso  ca cili” mu ku fuitangana cenu.​—Ekelesiaste 4:9.

VI MUA PANDE KU LINGA:

• Hangulenu viuma vi mu linga muntu ku muntu mu ku manusula cisoti ca mi solokela

• Puenu na ku tala haka mu endela mu ku puisamo vize vi mua likuminia