Yehova * Njambi ikeye ua tumbikile vulo vua katete. Mbimbiliya nguayo Njambi ua tangele mpuevo ua katete “kaha ua mu nehele kuli yala.” Andama ua vuile ndzolela ya kama cikuma ngeci ua handekele ngueni: “Ou citsiha ca vitsiha viange, na ntsitu ya ntsitu yange.” (Njenisisi 2:22, 23) Yehova na lelo lino kasi ua tonda vose va liambata va yoye mu ndzolela. Nga tu tumbula vulo mu mukanda uno tuli na ku handeka ha vulo vu va tavesa ku masiko.

Nga vantu va liambata ve ku singanieka nguavo viose vi ka pua lika via ku tantuluka. Vunoni ce ku lisolola ha toma ngecize cipue yala na mpuevo va lilema mpundu kasi ve ku mona vimo visoti. (1 Kolintu 7:28.) Mu mukanda uno, mu ka uana vitume via Mbimbiliya, nga mu vi niunga vi ka mi kuasa ku kala na ndzolela ya kama mu vulo vuenu.​—Visamo 19:8-11.

MBIMBILIYA NGUAYO: ‘Yala ikeye mutue ua ndzivo.’​—Efeso 5:23.

Nga mua ambata, Yehova a tonda ngueni mu niunge mpueyenu na ngozi. (1 Petulu 3:7) Mukonda Yehova ua tangele mpuevo ku pua mukuasi uenu, ngeci ikeye ua tonda mu singimike mpueyenu na ku mu lema. (Njenisisi 2:18) Mua pande ku lema mpueyenu cikuma na ku tuameka vizango vieni ku lutue.​—Efeso 5:25-29.

Nga mua somboka, Yehova a tonda ngueni mu singimike  yalienu na mutima uose na ku mu kuasa ku puisamo kapandi keni. (1 Kolintu 11:3; Efeso 5:33.) Mua pande ku kuasa yalieni mu viuma via hangula na ku panga neni na mutima uose. (Kolose 3:18) Nga mu vi puisamo mu ka pua va cili ku meso a yalienu na kuli Yehova.​—1 Petulu 3:1-6.

VI MUA PANDE KU LINGA:

• Hulenu mukua ndzivo yenu, vati mu hasa ku pua yala ni mpuevo ua cili. Mu halakanenu vuino, kaha pangenu na ngolo yose linga mu vi puisemo

• Kalenu na ntsintsa. Mu ka hita ntsimbu, linga mu lilongese vati mu hasa ku livuisa ndzolela umo na mukuavo

MBIMBILIYA NGUAYO: Mua pande ku lengeya vizango via mukua ndzivo yenu. (Filipu 2:3, 4) Hakenu seho ya kama kuli mukua ndzivo yenu, muomu Yehova ua tonda vangamba veni va muese “ngozi ku vose.” (2 Timoteo 2:24) Hangulenu vuino mezi enu muomu ku handeka ngoco ce ku “tuva ngue mukuale; vunoni lilimi lia vakua mangana likelio cihindu.” (Visimo 12:18) Sipilitu ya Yehova i ka mi kuasa ku handeka na ngozi na cilemo.​—Ngalata 5:22, 23; Kolose 4:6.

VI MUA PANDE KU LINGA:

• Vundilenu linga kati mu ivue matoto na cisulila nga mu lihandeka ha vimpande via vikalu na mukua ndzivo yenu

• Singaniekenu vuino ha mezi a mu ka handeka na vati mu ka a handeka

MBIMBILIYA NGUAYO: Nga mua liambata, mu na pu “ntsitu imo lika” na mukua ndzivo yenu. (Mateo 19:5) Vunoni  ka mu ka litombola mu viose, muomu nkala muntu na visinganieka vieni. Ngeci mukemuo mua pande ku lilongesa ku singaniekela hamo linga mu litombole. (Filipu 2:2) Mua pande ku litavasiana nga mu tonda ku linga vimo. Mbimbiliya nguayo: “Ku-likanuuela cose ci kaniama ha zinguli.” (Visimo 20:18) Tavenu vitume via Mbimbiliya vi mi tuamenene omo mu heta ha ku likuminia vimo.​—Visimo 8:32, 33.

VI MUA PANDE KU LINGA:

• Lekenuko mukua ndzivo yenu viose kati mizimbu lika, vunoni na vati mu li na ku ivua ku mutima

• Kati mu likuminie viuma, ntsimbu kanda mu hule mukua ndzivo yenu