Ku semuka ca kakeke ce ku neha ndzolela, vunoni ce ku pua naua ca cikalu ku visemi. Mu ku pua visemi vandongesa, mu ka komoka mu ku mona ngecize ntsimbu na ndzili yenu ya ingi i ka huila ku ku lela muana. Ku zuama na muana na ku aluluka ca muvila ci ka hasa ku kaluuisa vulo vuenu. Ci ka tondeka nenu na mukua ndzivo yenu ku alulula vimo, linga mu niunge vuino muanenu na vulo vuenu. Vati vimamuna via mu Mbimbiliya vi hasa ku mi kuasa ku lua nevi vitanga?

VI YA HANDEKA MBIMBILIYA: ‘Cilemo ca kala na lukakatela.’ Kaha naua cilemo “ka ce ku lilengeyela viuma via civene, ka ce ku tenuka.” (1 Kolintu 13:4, 5) Tua tantekeya nguetu mu ku pua niakake ua ndongesa, mu ka tuala cikuma mana ku ku lela kakeke. Vunoni, yalienu a kevua ngue ka mua mu hakele seho naua, ngeci mukemuo kati mu suve nguenu neni a tonda mu mu tuale mana. Na lukakatela na ngozi, mu kuasenu evue ngecize neni ali na seho kuli enu na ku ku lela muana.

“Enu vamala, tumamenu na vampuevo venu na mana.” (1 Petulu 3:7) Tantekeyenu ngecize mpueyenu a ka pangesa ngolo ya ingi ku ku lela muana. Vipanga ha ndzivo vi livuezelela kaha eci ci hasa ku mu futula ku mbunge na ku mu zeyesa ni ku mu kokela vusiua. Vintsimbu vimo, halumo nenu a ka mi vuila matoto, vunoni huimenu mbunge, muomu “uze a livandeka ku vutenu na hiana mukua ngolo.” (Visimo 16:32) Kalenu na liano, kaha mu kuasenu ku viose vize vi tondeka.

—Visimo 14:29.

VI MU HASA KU LINGA:

• Visemi va vamala: Kuasenu mpueyenu ku lela muana, cipue vutsiki. Tepululenu ku ntsimbu i mue ku panga vieka linga mu hase ku uana ntsimbu ya ku kala na mpueyenu na muana

• Visemi va vampuevo: Omo yalienu a tonda ku mi kuasa ku tala muana tavenu. Nga ka vi hasele vuino, kati mu mu paye, vunoni mu longesenu na ngozi vati ve ku vi linga

MBIMBILIYA NGUAYO: “Va ka pua ntsitu imo lika.” (Njenisisi 2:24) Vutuhu mu na tambula muntu ua muha ha kati kenu, kasi mua pua “ntsitu imo lika.” Lingenu cose linga mu kolese vusamba vuenu.

Enu vampuevo, puenu na ku santsela ku vukuasi vu ve ku mi hana vamala venu. Mezi a ku santsela cenu a hasa ku pua “cihindu” kuli vakevo. (Visimo 12:18) Vamala, lekenu vampuevo venu nguenu mua va haka seho na ku va lema cikuma. Va sangalenu omo lia ku niunga vuino vakua ndzivo.—Visimo 31:10, 28.

“Na umo uahi a lengeye ceni ivene vunoni ku-vezika ca mukuavo.” (1 Kolintu 10:24) Ntsimbu yose lingilenu mukua ndzivo yenu via cili. Uanenu ntsimbu ya ku handeka na mukua vulo vuenu, mu zumbangeyenu, na ku mu halakana. Kati mu kale na vusa ku tuala ha ku limona ku mivila na mukua vulo vuenu. Hakenu seho ku vizango via mukua vulo vuenu. Mbimbiliya nguayo: “Kati mu lihangunune umo ku mukuavo, ku vanga mu ku litaviasiana.” (1 Kolintu 7:3-5) Uanenu Ntsimbu ya ku simutuila vuino ha kati kenu. Nga mu muesa lukakatela na ku ivuisisa mu ka kaniamesa cikuma vulo vuenu.

VI MU HASA KU LINGA:

• Kati mu suve ku tonda ntsimbu yenu lika mu vavali

• Lingenu vimo vi ka kuasa mukuenu ku mona ngecize mua mu lema, ngeci mua ku mu hana vuana na ku mu sonekela kamukanda

MBIMBILIYA NGUAYO: “Fume ku vukeke u na tantekeya visoneka vize via ku lela, vikevio vi hasa ku hia mana linga u ovoke.” (2 Timoteo 3:15) Liviukisilenu vua lumo, vi mu ka longesa kakeke kenu. Kakeke ua kala na vuhasi vua ku komouesa mu ku lilongesa viuma, ambe ntsimbu kanda a semuke. Oku a ci li muzimo, muanenu a hasa ku nongonona lizi lienu na ku kala mu cifua ci muli, nga ndzolela ni vusiua. Puenu na ku mu tandela omo a ci li kakeke. Vutuhu vize vi mu mu tandela ka vi mu lomboloka mu ntsimbu ize, vi ka mu kuasa ku lema ku tanda mua kola.

Ku via Njambi ka kua kele kakeke, muanenu na pande ku mi ivua mu handeka via Njambi na ku vundila. (Ndeutelonomi 11:19) Nomo mu heha neni, puenu na ku handeka ha viuma via tangele Njambi. (Visamo 78:3, 4) Muanenu omo kola, a ka mona cilemo cenu kuli Yehova kaha neni a ka lilongesa ku mu lema.

VI MUA PANDE KU LINGA:

• Vundilenu mana a ku niunga na ku longesa muana

• Puenu na ku hilukila hilukila mezi linga muanenu a lilongesa vuasi