CILONGESA 01

Vati Mbimbiliya i Hasa ku mi Kuasa?

ZIKULENU

Tu vose, tua tonda ku tantekeya vusunga ku tuala ha muono, lamba, ku-tsa, kaha na viuma vi ka soloka ku lutue. Tue ku lisosomua naua na visoti via tangua na tangua, ngeci mua vati tu hasa ku uana vimbongo via ku likuasa navio, kaha na vati tu hasa ku yoya mu ndzolela mu vusoko. Vantu vavengi, ka ve ku uana lika vikumbululo ku vihula viavo, vunoni Mbimbiliya ye ku va hana naua vimamuna via cili vie ku va kuasa mu muono uavo ua tangua na tangua. Vuno mu tantekeyako umo a hasa ku uana vukuasi mu ku lilongesa Mbimbiliya ni?

1. Mbimbiliya ya kumbulula vihula vika?

Mbimbiliya ya kumbulula evi vihula via seho: Kulihi tua tunda? Omo lia vika va tu tangele? Omo lia vika vakua ku linga via cili navo ve ku yanda? Vika vie ku lingika ku muntu nga na tsi? Nga vantu vose va tonda ciyulo, omo lia vika honi kue ku kela vindzita? Vati a ka fua ano mavu ku lutue? Mbimbiliya ya tu kaniamesa ku tonda vikumbululo via vihula ngeci muevi. Kaha cifua ci ya vi kumbuluilamo ikeyo, ce kuya ku mitima ya makulukazi na makulukazi a vantu.

2. Vati Mbimbiliya i hasa ku tu kuasa ku yoya mu ndzolela tangua na tangua?

Mbimbiliya ye ku tu hana vimamuna via cili. Ca ku muenako, ya longesa vati vantu va hasa ku yoya mu ndzolela ya vusunga mu vusoko. Ya tu leka naua, vika tu hasa ku linga nga tua sakalala mutima na vati tu hasa ku viukilila na vipanga vietu. Mu tantekeya vi ya longesa Mbimbiliya ku tuala ha vimpande evi na vikuavo via vingi ni? Omo tu lilongesa hamo lika lino livulu, mu ka hasa ku tava nguenu nkuma cili vene “Visoneka viose [via kala mu Mbimbiliya] . . . vi silivila.”—2 Timoteo 3:16.

Lino livulu ka lia hingile mu cihela ca Mbimbiliya. Vunoni li mi kuasa ku hilula Mbimbiliya enu vavene. Ngeci mukemuo, tandenu mikanda yose ya mu Mbimbiliya ili muno mu livulu kaha i setekesenu na viuma vi muli na ku lilongesa.

TANTEKEYENU VIKUAVO

Tantekeyenu vati Mbimbiliya ye ku kuasa vantu, vati mu hasa ku lema ku i tanda, kaha vika ca puila ca cili ku tonda vukuasi linga mu ivuisise vi muli na ku tanda.

3. Mbimbiliya i hasa ku tu tuamenena

Mbimbiliya ya pua ngue ceke ca ku temuna cikuma. Tu hasa ku pangesa Mbimbiliya i tu tuamenene mu ku linga vihangula via cili kaha na ku tu leka vika vi ka soloka ku lutue.

Tandenu Visamo 119:105, kaha simutuilenu ha vihula vi na hatako:

Vati mukua visamo ua kele na ku muenamo Mbimbiliya?
Vika mue ku singanieka ku tuala ha Mbimbiliya?

4. Mbimbiliya i hasa ku kumbulula vihula vietu

Umo mpuevo ua nongonona ngecize, Mbimbiliya ya kala na vikumbululo ku vihula via kele na ku mu pindisa mu miaka ya yingi. Talenu VIDEO, kaha simutuilenu ha vihula vi na hatako.

VIDEO: Kati mu Zimbalese Lulavelelo Luenu! (1:48)

Mu video i tu na tala, vihula vika ua kele navio ou mpuevo?
Vati ku lilongesa Mbimbiliya ca mu kuasele?

Mbimbiliya ya tu kaniamesa tu pue na ku linga vihula. Tandenu Mateo 7:7, kaha simutuilenu ha cihula ci na hatako:

Vihula vika mua kala navio vi i hasa ku kumbulula Mbimbiliya?

5. Ku tanda Mbimbiliya ci hasa ku mi tovala

Vantu vavengi, ve ku ivua ndzolela mu ku tanda Mbimbiliya kaha va uanamo vukuasi vua vuingi. Talenu VIDEO, kaha simutuilenu ha vihula vi na hatako.

VIDEO: Ku Tanda Mbimbiliya (2:05)

Mu video i tu na tala, vati va kele na ku livua vakuendze ku tuala ha ku tanda?
Vutuhu ka va lemene cikuma via ku tanda, omo lia vika va lema ku tanda Mbimbiliya?

Mbimbiliya nguayo, i hasa ku tu hana vilongesa vi tu lembezieka na ku tu hana lulavelelo. Tandenu Loma 15:4, kaha simutuilenu ha cihula ci na hatako:

Vuno eci cikulaheso ca Mbimbiliya ca ku mi lembezieka na ku mi hana lulavelelo ci na miyi ku mutima ni?

6. Vakuetu va hasa ku tu kuasa ku ivuisisa Mbimbiliya

Cingi ca vakua ku litandela Mbimbiliya vakevo vavene, ve ku nongonona ngecize ku i simutuila na vakuavo ce ku kuasa cikuma. Tandenu Vilinga 8:26-31, kaha simutuilenu ha cihula ci na hatako:

Vati tu hasa ku ivuisisa Mbimbiliya?—Talenu vinimbu 30 na 31.

Yala ua ku Etiopia, ua tondekele vukuasi linga evuisise Visoneka. Na lelo lino, vantu vavengi ve ku hasa ku ivuisisa Mbimbiliya mu ku lilongesayo na vakuavo

VAMO VE KU HANDEKA NGUAVO: “Ku lilongesa Mbimbiliya ca pua ku vihisa ngoco ntsimbu.”

Vika mu hasa ku kumbulula nga muntu a mi leka ngoco? Omo lia vika?

VI MUA LILONGESA

Mbimbiliya ya tu hana vimamuna ku tuala ha muono ua tangua na tangua, ya kumbulula vihula via seho, kaha ye ku lembezieka na ku hana lulavelelo ku vantu.