CILONGESA 06
Vati ua Putukile Muono?
“Kuli ove [Njambi] kua kala ndundzi ya muono.” (Visamo 36:9) Nenu mua tsiliela ngoco ni? Vamo ve ku singanieka ngecize muono ka va lingile ua ku tanga. Nga mukemuo, eci ci lekesa ngecize muono ua lisolokelele uvene. Mu ku mona cenu, nga Yehova Njambi ikeye ua tangele muono, vuno ua u tangele na vutumbe ni? a Tu hilulenu ha mizimbu ya mu Mbimbiliya ku tuala ha ndundzi ya muono kaha nomo lia vika tua pande ku tsiliela mu mizimbu yaco.
1. Kulihi a tunda melu na mavu?
Mbimbiliya nguayo: “Ha katete Njambi ua tangele melu na mavu.” (Njenisisi 1:1) Cingi ca vakua siensia, va tava ngecize melu na mavu via kele na vuputukilo. Vati Njambi ua vi tangele? Ua pangesele sipilitu santu ni nguetu ngolo yeni mu ku panga viose via kala muilu na ha mavu. Ngeci mua milalavizi, vintangantanga na viplaneta.—Njenisisi 1:2.
2. Vika Njambi ua tangelele mavu?
Yehova ka “tangele [mavu] cihuolohuohuo, ua a vumbile linga va kaleho.” (Isaya 45:18) Ua tangele mavu ku pua cihela ca cili ca ku yoyela kaha na ku hakaho viose vi va tondeka vantu linga va yoyeleho ku miaka ya ya-ye. (Tandenu Isaya 40:28; 42:5.) Vakua siensia nguavo, planeta ya mavu ya lifuila. Muomu ka va uanene planeta yeka na imo yahi, ya kala na viose vi va tondeka vantu linga va yoye.
3.Vika via tepesa vantu ku tusitu?
Mu nima ya ku tanga mavu, Yehova ua tangeleleho naua muono. Ha katete, ua sulisile mavu na miti na tusitu. Mu nima yaco “Njambi ua tangele muntu mu ciseteko ceni.” (Tandenu Njenisisi 1:27.) Omo lia vika vantu va pua va ku lifuila? Tua lifuila muomu Njambi ua tu tangele mu cifua ceni, kaha tu hasa ku muesa vifua vieni ngeci mua cilemo na vuoloke. Ua tu tangele naua na vuhasi vua ku lilongesa malimi, ku komoka viuma via cili kaha na ku ivua ku tovala ca miaso. Cikuavo naua, etu ka tua lifuile na tusitu muomu tu hasa ku lemesa Sakatanga uetu.
TANTEKEYENU VIKUAVO
Hilulenu vukaleho vua muesa ngecize muono va u tangele, kaha citava tu kulahele mu muzimbu ua mu Mbimbiliya ku tuala ha ku tanga ca viuma. Tantekeyenu naua vika tu hasa ku lilongesa hali Njambi ku vifua via cili vi va kala navio vantu.
4. Muono va lingile ua ku tanga
Vantu ve ku tambula ku sangaziala omo lia ku temunuina viuma via ku tanga. Amba co iya na pande ku tambula ku sangaziala omo lia viuma via ku tanga mpundu? Talenu VIDEO, kaha simutuilenu ha cihula ci na hatako.
-
Viuma vika via ku tanga va temunuina vantu?
Nkala ndzivo kuli umo ue ku i tunga. Amba iya ua tangele viuma viose? Tandenu VaHevelu 3:4, Kaha simutuilenu ha vihula evi:
-
Viuma vika via ku tanga mue ku komoka cikuma?
-
Vuno ca pua ku sevuka ku tsiliela ngecize melu na mavu na viose via kalamo va vi tangele ni? Nga eyo ni houe, omo lia vika?
Mua vi tantekeyele ni?
Mu hasa ku uana vimpande na vivideo ku tuala ha cimpande eci mu saiti jw.org mu mukana ua vimpande “ “Teve um projeto?” na “Vi ve ku Handeka Vamo ku Tuala ha Vati Muono ua Putukile.”
“Nkala ndzivo umosi na i tungu, vunoni mukua ku tunga viuma viose ikeye Njambi”
5. Citava ku tsiliela muzimbu ua Mbimbiliya ku tuala ha ku tanga ca viuma
Ku Njenisisi kapitulu 1, Mbimbiliya ya lombolola kuiko a tunda mavu na muono ua kalaho. Vuno citava mu kulahele muzimbu uaco ni ua pua cisimo ca ngoco? Talenu VIDEO, kaha simutuilenu ha vihula vi na hatako.
-
Vuno Mbimbiliya ya longesa ngecize mavu na muono ua kalaho, va vi tangele mu matangua 6 a 24 ola ni?
-
Mu ku mona cenu, vuno muzimbu ua mu Mbimbiliya ku tuala ha ku tanga ca viuma ua sungama kaha citava ku u kulahela ni? Nga eyo ni kuahi, omo lia vika?
Tandenu Njenisisi 1:1, kaha mu nima yaco simutuilenu ha cihula eci:
-
Vakua siensia nguavo, melu na mavu via kele na vuputukilo. Vuno aa mezi avo a litombola na muzimbu u mu na tanda vuovuno mu Mbimbiliya ni?
Vamo vantu ve ku lihula nga Njambi ua pangesele evulusao mu ku tanga muono. Tandenu Njenisisi 1:21, 25, 27, kaha simutuilenu ha vihula vi na hatako:
-
Vuno Mbimbiliya ya longesa ngecize Njambi ua tangele vamo tusitu va vandende kaha vamo va lialuluile vantsi, vakuavo tusitu na vantu ni? Ni ua tangele vene “miyati” yose ya miono? b
6. Njambi ua tangele vantu mu cifua ca ku lifuila
Etu vantu, ka tua lifuile na tusitu. Tandenu Njenisisi 1:26, kaha mu nima yaco simutuilenu ha cihula eci:
-
Mu ku linga va tu tanga mu cifua ca Njambi, vika vuhasi vuetu vua ku muesa cilemo na cikeketima via muesa ku tuala ha cifua ca Njambi?
VAMO VE KU HANDEKA NGUAVO: “Muzimbu ua mu Mbimbiliya ku tuala ha ku tanga ca viuma ua pua cisimo ca ngoco.”
-
Amba enu co, vika mu handekaho? Kaha omo lia vika?
VI MU NA LILONGESA
Yehova ua tangele melu na mavu kaha na vifua viose via muono.
Mpupulule
-
Vika ya tu longesa Mbimbiliya ku tuala ha kuiko a tunda melu na mavu?
-
Vuno Njambi ua tangele tusitu va vandende na ku va lingisa va lihimpule mu nima ya ntsimbu ni? Ni ua lingile va ku tanga mpundu mu vutuntu?
-
Vika via tepesa vantu ku viuma vikuavo via ku tanga?
KONKENUHO
Tantekeyenu vimo viuma via ku tanga via muesa ngecize kua kala Sakatanga.
“Vika tu Lilongesa ku Viuma via ku Tanga?” (Vingilenu! Setembro ya 2006)
Talenu vati cisemi a hasa ku lomboluela muaneni muzimbu ua mu Mbimbiliya ku tuala ha ku tanga ca viuma.
Limuenenu enu vavene nga evulusao ya litombola na Mbimbiliya.
Limuenenu nga vitsiha via laza cipue viuma vi ve ku seteka vakua siensia via muesa ngecize muono va u tangele ni ua lizila ukeuo uvene.
A origem da vida—Cinco perguntas que merecem respostas (brochura)
a Cilongesa 25 tu ka simutuila ha vutumbe vua Njambi ku tuala ha vantu.
b Mu Mbimbiliya, lizi “miyati” liemanena civunga ca kama ca viuma vili na muono.
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
