Yehova a tonda mu mu tantekeye vuino. Omo lia vika? Muomu a tantekeya ngecize nga mu lilongesa via vifua vieni via cili, vinjila vieni na vutumbe vueni, kaha mu kevua cizango ca ku pua kavusamba keni. Vuno citava vene ku pua kavusamba ka Njambi ni? (Tandenu Visamo 25:14.) Vika mu hasa ku linga mangana mu pue kavusamba ka Njambi? Mbimbiliya ya kumbulula evi vihula kaha ya muesa omo lia vika Yehova ikeye kavusamba ua seho ya kama u va na pande ku likata neni vantu.

1. Cilanio cika ali na ku mi linga Yehova?

“Suenenu kuli Njambi, kaha ikeye a ka suena kuli enu.” (Tiango 4:8) Vika a lomboloka aa mezi? Yehova ali na ku mi lania mu pue kavusamba keni. Vamo ve ku singanieka nguavo, ka citava ku likuata vusamba na muntu ka u hasa ku mona, cikuma-kuma Njambi. Vunoni Njambi ua muesa mu Lizi lieni Mbimbiliya viose vi tua pande ku tantekeya ku tuala ha vuntu vueni linga tu hase ku likuata neni vusamba. Ngeci mukemuo, nga tu tonda ku tanda muzimbu ua Njambi ua tu hakela mu Mbimbiliya, tu ka likuata vusamba neni, vutuhu ka citava ku mu mona.

2. Omo lia vika Yehova ikeye Kavusamba ua kama cikuma u mu hasa ku kala neni?

Ka kua kele ueka ua mi lema cikuma ku hiana Yehova. Ua tonda mu yoye mu ndzolela, kaha na ku mu vundila vukuasi mu nkala ntsimbu i mu kalekeya. Ni nguetu “Mbilenu cisoti cenu cose kuli ikeye, muomu ikeye a mi lela.” (1 Petulu 5:7) Yehova ua liviukisila ntsimbu yose mu ku kuasa vavusamba veni, ku va lembezieka kaha na ku va halakana.—Tandenu Visamo 94:18, 19.

3. Vika Yehova ua lavelela ku vavusamba veni?

Yehova ua lema vantu vose, “vunoni vusamba vueni vu li kuli vakua vuoloke.” (Visimo 3:32) Yehova ua tonda ngecize vavusamba veni va lihakele kapandi ka ku lema vize via lema ikeye na ku zinda vize via zinda. Vamo ve ku livua ngecize ka va hasa ku niunga vitume viose via Yehova ku tuala ha via cili na via vipi. Vunoni Yehova ka puile ua mu kalu. Ue ku tava vose vaze va mu lema mu vusunga kaha ve ku lihakela kapandi ka ku muya ku mutima.—Visamo 147:11; Vilinga 10:34, 35.

 TANTEKEYENU VIKUAVO

4. Avilahama ua puile kavusamba ka Yehova

Muzimbu ua mu Mbimbiliya ku tuala hali Avilahama (ni Avilama) ua tu kuasa ku ivuisisa vi ca lomboloka ku pua kavusamba ka Njambi. Tandenu via Avilahama ku Njenisisi 12:1-4. Kaha simutuilenu ha vihula vi na hatako:

• Yehova ua tumine Avilahama ku linga vika?

• Vika Yehova ua mu kulahesele?

• Vati ua lingile Avilahama ku viuma via mu tumine Yehova?

5. Vika Yehova ue ku tuma vavusamba veni?

Tu vose tue ku lavelela vimo viuma ku vavusamba vetu.

• Viuma vika mua tonda vavusamba va mi lingile?

Tandenu 1 Yoano 5:3, kaha simutuilenu ha cihula eci:

• Vika Yehova ua lavelela ku vavusamba veni?

Ku ononoka Yehova, ci hasa ku tondeka tu alulule vilinga vietu na vuntu vuetu. Tandenu Isaya 48:17, 18, kaha simutuilenu ha cihula eci:

• Omo lia vika Yehova ue ku vundila vavusamba veni va alulule vimo mu muono?

 6. Viuma vie ku lingila Yehova vavusamba veni

 VI MU NA LILONGESA

Yehova ua tonda ku pua kavusamba kenu, kaha a ka mi kuasa ku likata neni.

Mpupulule

• Vati Yehova ue ku kuasa vavusamba veni?

• Omo lia vika Yehova ue ku leka vavusamba veni va alulule vimo mu muono?

• Mu ku mona cenu, vuno Yehova ue ku hianesamo ku tuala ha viuma vie ku vundila ku vavusamba veni ni? Nga eyo ni houe, omo lia vika?