CILONGESA 11

Mua ku Uanena Vukuasi vua Kama mu Mbimbiliya

ZIKULENU

Vuno mua lisosomuaho laza mu ku putuka cimo cipanga ca kama ni? Nga mukemuo, halumo mua tondele vinjila via ku ci asiuisilamo. Ngeci mua ku ci tepa mu mitamba ya indende. Na ku tanda Mbimbiliya, mukemuo mu cafua. Vunoni halumo mu hasa ku lihula nguenu, ‘Haka nji putukila?’ Mu cilongesa cino, tu hilula vimo vinjila via viasi vi mu hasa ku pangesa, linga mu hase ku uana vukuasi vua kama mu ku tanda na ku lilongesa Mbimbiliya.

1. Omo lia vika tua pande ku tanda Mbimbiliya ku-sua kumo?

Mukua ku tanda “lisiko lia Yehova” ni nguetu Mbimbiliya ku-sua kumo, ue ku yoya mu ndzolela na ku vezika. (Tandenu Visamo 1:1-3.) Mu ku putuka, setekenu ku pua na ku tanda Mbimbiliya mu tu viminutu tua tundende nkala litangua. Omo muya na ku tantekeya Lizi lia Njambi, Mbimbiliya, mu ka putuka ku lema ku i tanda.

2. Vati mu hasa ku uana vukuasi mu ku tanda Mbimbiliya?

Linga tu uane vukuasi vua kama mu ku tanda Mbimbiliya, tua pande ku imana na ku singanieka ha viuma vi tuli na ku tanda. Ka tua pandele lika ku i tanda, vunoni ku i “yongola” ni nguetu ku i hilula. (Yehosua 1:8) Vati mu hasa ku hilula Mbimbiliya? Omo mu tanda, mu hasa ku lihula nguenu: ‘Vika ou muzimbu u nji longesa ku tuala hali Yehova Njambi? Vati nji hasa ku pangesa muzimbu uaco mu muono uange? Vati nji hasa ku pangesa evi vinimbu mu ku kuasa vakuetu?’

3. Vati mu hasa ku uana ntsimbu ya ku tanda Mbimbiliya?

Vuno ce ku mi kaluuila ku uana ntsimbu ya ku tanda Mbimbiliya ni? Cingi cetu ce ku tu kaluuila vene. Vunoni linga mu vi puisemo, ‘lilandelenu ntsimbu.’ (Efeso 5:16) Mu hasa ku lingamo, mu ku hangula imo ntsimbu ya ku pua na ku tanda Mbimbiliya nkala litangua. Vamo ve ku uana ntsimbu ya ku tanda Mbimbiliya ku cimene. Vakuavo ve ku lingamo ku mutana, halumo ha ntsimbu i vali na ku hitisako vimo mu kanua. Kaha kua kala vakuavo naua ve ku tanda Mbimbiliya ku vutsiki ntsimbu kanda va kose. Amba kuli yenu co, ntsimbu ika i hasa ku pua ya yasi ku lingamo?

TANTEKEYENU VIKUAVO

Lilongesenu mua ku tovalesela ku tanda cenu ca Mbimbiliya. Talenu vati mu hasa ku liviukisila vuino linga mu uane vukuasi vua kama mu Mbimbiliya.

Tu hasa ku lema ku tanda Mbimbiliya, ngue muze mu tue ku lilongesa ku lema via kulia via viha

4. Lilongesenu ku lema ku tanda Mbimbiliya

Ku putuka ku tanda Mbimbiliya, ci hasa ku pua ca cikalu. Vunoni tu hasa ku “sunguiya” cizango cetu ca ku lingamo, ngue muze mue ku linga muntu nga a tonda ku liizilisa vimo via kulia via viha. Tandenu 1 Petulu 2:2, kaha simutuilenu ha cihula ci na hatako:

Mu ku mona cenu, vuno nga mu putuka ku tanda Mbimbiliya nkala litangua, citava mu ka hete ha ku lema ku i tanda ni?

Talenu VIDEO mu mone vati vamo vantu va putukile ku lema ku tanda Mbimbiliya. Kaha simutuilenu ha cihula ci na hatako.

VIDEO: Vakuendze na Vahumbe va Lilongesa ku Lema Lizi lia Njambi (5:33)

Mu video, citanga cika va vulile vamo vakuendze na vahumbe?
Vika via va kuasele ku kakatela ku vutumbe vuavo vua ku tanda Mbimbiliya?
Vati va tovalesele ku tanda cavo ca Mbimbiliya?

Vinguli vi hasa ku mi kuasa ku lingamo:

Hangulenu Mbimbiliya ya cili, kaha ka ya pangesele mezi a laza cikuma. Setekenu ku pangesa Tradução do Novo Mundo nga ya tuhuka mu lilimi lienu, ni mu lilimi lieka li mu tantekeya vuino.
Putukenu ku tanda mitamba i mua lema mua kama. Linga mu mone vimo vimueso, talenu mu cikasa “Putukenu ku Tanda Mbimbiliya.”
Puenu na ku haka vitantekeyeso ha mitamba i mu na tanda laza. Pangesenu cikasa “Tantekeyenu Haka Muendela mu ku Tanda Mbimbiliya” ci li mu livulu lino.
Pangesenu aplikativu JW Library^®. Na aplikativu yaco, mu hasa ku tanda ni ku halakana ku ku tanda ca Mbimbiliya mu telefone yenu ni mu likina lieka mu mu hasa ku i haka.
Pangesenu viapêndice ya mu Tradução do Novo Mundo da Bíblia Sagrada. Mua kala vimapa, vikasa kaha na Glossário vize vi hasa ku tovalesa ku tanda cenu.

5. Puenu na ku liviukisila cilongesa cenu ca Mbimbiliya

Tandenu Visamo 119:34, kaha simutuilenu ha cihula eci:

Vika ca puila ca cili ku vundila ntsimbu kanda mu tande Mbimbiliya, ni ntsimbu kanda mu liviukisile cilongesa cenu ca Mbimbiliya?

Vati mu hasa ku uana vukuasi vua kama nkala ntsimbu i mu lilongesa Mbimbiliya? Omo mu livuahesela vilongesa mu livulu lino, setekenu ku linga evi:

Tandenu vinanga via katete via cilongesa.
Tandenu mikanda ya Mbimbiliya i va na tumbulamo na ku seteka ku mona vati ya likuata na cimpande caco.
Hakenu vipalo ni vitantekeyeso, ha mezi a kumbulula cihula ca cinanga. Ku linga evi, ci ka mi kuasa omo mu ka simutuila na mulongisi uenu ua Mbimbiliya.

Mua vi tantekeyele ni?

Vakaleho va Yehova va pangesaho laza viMbimbiliya via ku liseza-seza via vingi. Vunoni, tua lema mua kama ku pangesa Tradução do Novo Mundo da Bíblia Sagrada muomu ya pua ya vusunga, ya pangesa mezi a asi, kaha ya pangesa lizina lia Njambi.—Talenu cimpande ca mu saiti “Vuno Vakaleho va Yehova va Kala na Mbimbiliya Yavo Ni?” (Cimpande ca mu saiti)

VAMO VE KU HANDEKA NGUAVO: “Ku lilongesa Mbimbiliya, ca cikalu. Ka njesi na ndzili ni ntsimbu ya ku lilongesayo.”

Amba enu co, vati mue ku singaniekaho?

VI MU NA LILONGESA

Linga mu hase ku uana vukuasi vua kama mu Mbimbiliya, hangulenu ntsimbu ya ku pua na ku i tanda, puenu na ku vundila linga mu ivuisise vi mue ku tanda, kaha na ku liviukisila vilongesa vienu via Mbimbiliya.