CILONGESA 15
Yesu ua Pua Iya?
Yesu ua tsimana cikuma mu mizimbu. Vutuhu ngoco, cingi ca vantu ka va tantekeya via vingi ku tuala hali ikeye, lizina lieni lika va tantekeya. Vakuavo co, ve ku lombolola Yesu mu vinjila via ku liseza-seza. Vika ya handeka Mbimbiliya ku tuala hali Yesu?
1. Yesu ua pua Iya?
Yesu ua pua kangelo ua ngolo ya kama muilu. Yehova Njambi ua mu tangele ntsimbu kanda a tange viuma vikuavo viose. Ngeci, Yesu va mu tumbula nguavo, “ndala ua ku-tanga cose.” (Kolose 1:15) Mbimbiliya ya tumbula naua Yesu nguayo ‘muana umo lika’ ua Njambi, muomu Yehova ua kele lika lieni mua tangele Yesu. (Yoano 3:16) Yesu ua pangele hamo na Ise, Yehova, mu ku mu kuasa ku tanga viuma. (Tandenu Visimo 8:30.) Yesu kasi ue ku ivua ndzolela ya kama mu ku pua kavusamba ka Yehova. Kaha ue ku tualelelaho ku mu pangela na lukakatela mu ku pua “Lizi” ni nguetu muluua ua Njambi, uze ue ku tuala mizimbu na vimamuna vie ku mu tuma Njambi.—Yoano 1:14.
2. Omo lia vika Yesu uezile hano ha mavu?
Imo miaka 2.000 ku nima, Yehova ua pangesele sipilitu santu mu cikomoueso mu ku nunguluila muono ua Yesu, muzimo lia umo muana-mpuevo kanda a ci limone na yala, lizina lieni Maliya. Mu nima yaco, Yesu ua semukile mu ku pua muntu. (Tandenu Luka 1:34, 35.) Yehova ua tumine Yesu ha mavu ku pua Mesiya ni Kilistu, uze ya kulahesele ngueni a kovola vantu. a Vupolofeto vuose vua mu Mbimbiliya ku tuala hali Mesiya, vua lipuisilemo hali Yesu. Evi via kuasele vantu ku nongonona Yesu ku pua “Kilistu Muana Njambi ua muono.”—Mateo 16:16
3. Kuiko ali Yesu lelo lino?
Mu nima ya ku-tsa ca Yesu mu vuntu, Njambi ua mu sanguile na muvila ua sipilitu kaha Yesu ua hilukile muilu. Mua ka hetelemo, “Njambi ua mu hakele ku vukama vua ku hiana cikuma.” (Filipu 2:9) Lelo lino, Yesu ali na ngolo ya kama—Ikeye ua mu civali ku vukama ku tunda hali Yehova.
TANTEKEYENU VIKUAVO
Tantekeyenu via vingi ku tuala hali iya mpundu ua pua Yesu kaha na omo lia vika ca pua ca seho ku lingamo.
4. Yesu ka puile Njambi Mukua Ngolo yose
Mbimbiliya ya longesa ngecize Yesu ua pua kangelo ua ngolo muilu kaha ue ku ononoka Ise Yehova. Omo lia vika tu hasa ku handekela ngoco? Talenu VIDEO linga mu tantekeye vika ya longesa Mbimbiliya ku tuala ha ku litepa ca kala hali Yesu na Njambi mukua Ngolo yose.
Mikanda I na hatako i ka tu kuasa ku ivuisisa ku likata ca kala hali Yehova na Yesu. Tandenu mikanda yaco kaha simutuilenu ha vihula vi na hatako.
Tandenu Luka 1:30-32.
-
Vika ua handekele kangelo ku tuala ha ku likata ca kala hali Yesu na Yehova Njambi mukua ku Hiana vose?
Tandenu Mateo 3:16, 17.
-
Ha litangua li va mbatizile Yesu, vika lia handekele lizi lia fumine muilu?
-
Mu ku mona cenu lizi liaco lia puile lieya?
Tandenu Yoano 14:28.
-
Iya ua kala na mpoko ya ku hiana? Ise ni muana?
-
Vika ua tondele ku lombolola Yesu mua sanene Yehova ngueni Ise?
Tandenu Yoano 12:49.
-
Vuno Yesu ua singaniekele ngecize neni na Ise vapua muntu umo lika ni? Vati mu singaniekaho?
5. Vukaleho vua muesele ngecize Yesu ua puile Mesiya
Mu Mbimbiliya mua kala vupolofeto vua vuingi vuze vua kuasele vantu ku nongonona Mesiya—Uze ya hanguile Njambi kua ku ovola vantu. Talenu VIDEO ya handeka kavundende ha vumo vupolofeto vua puisilemo Yesu muezile hano ha mavu.
Tandenu vupolofeto vua mu Mbimbiliya kaha simutuilenu ha vihula vi na hatako:
Tandenu Mika 5:2 mu tantekeye kulihi ua semukilile Yesu. b
-
Vuno ku semuka ca Yesu ca puisilemo ovu vupolofeto ni?—Mateo 2:1.
Tandenu Visamo 34:20 na Zakaliya 12:10 mu tantekeye viya polofetele Mbimbiliya ku tuala ha ku-tsa ca Mesiya.
-
Ovu vupolofeto vua lipuisilemo hali iya?
-
Mu ku mona cenu, vuno Yesu ikeye ua lingile vupolofeto vuaco ku lipuisamo ni?
-
Kuliya na mizimbu yose eyi, vika mua lilongesa ku tuala hali Yesu?
6. Vukuasi vu tu hasa ku uana mu ku lilongesa via Yesu
Mbimbiliya ya handeka ngecize capua ca seho ku tantekeya Yesu na viuma via lavelela Yehova ku tuala hali ikeye. Tandenu Yoano 14:6 na 17:3, kaha simutuilenu ha cihula eci:
-
Seho ika ya kala ha ku lilongesa via Yesu?
Yesu ua tu sokoluela njila linga tu hase ku likuata vusamba na Njambi. Yesu ua longesele vusunga ku tuala hali Yehova kaha ku hitila muli ikeye tu ka tambula muono ka ue ku hua
VAMO VE KU HANDEKA NGUAVO: “Vakaleho va Yehova ka va tsilielele muli Yesu.”
-
Vati mu hasa ku va kumbulula?
VI MU NA LILONGESA
Yesu ua pua kangelo ua ngolo, muana Njambi kaha ua pua Mesiya.
Mpupulule
-
Omo lia vika Yesu va mu tumbula ku pua “ndala ua ku tanga cose”?
-
Vika Yesu ua kele na ku linga muilu tele kanda a cize ha mavu?
-
Vati tua tantekeya nguetu Yesu ua pua Mesiya?
KONKENUHO
Lilongesenu via vingi ku tuala ha vati tua tantekeya nguetu Yesu ikeye Mesiya.
Talenu vi ya handeka Mbimbiliya mu limuene nga Yesu ua semukile kuli Njambi ngue muze vene mu ve ku semuka vantu.
“Omo lia Vika Yesu va mu Tumbula ku Pua Muana Njambi?” (Cimpande ca mu saiti)
Tantekeyenu omo lia vika cimpande ca vanjambi vatatu ka ca tundile mu Mbimbiliya.
“Yesu ua pua Njambi Ni?” (Vutala vua Kaniungi, 1 ya Abril ya 2009, mu putu)
Tantekeyenu vati muono ua umo mpuevo ua alulukile, mu nima ya ku tondesesa vi ya handeka Mbimbiliya ku tuala hali Yesu.
“Uma judia explica porque razão reavaliou a sua fé” (Despertai! de Maio 2013)
a Mu Vilongesa 26 na 27, tu ka mona omo lia vika vantu va tondekele ku va patula kaha na vati ua tuovola.
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
