CILONGESA 21

Vati ci li na ku Enda Cipanga ca ku Ambulula Muzimbu ua Cili?

ZIKULENU

Ku hitila mu Vuangana vueni, Yehova vuovuno a manesa visoti viose. Ou muzimbu ua cili cikuma, ngeci vantu vose va tondeka ku u ivua. Yesu ua tondele vakua ku mu kava va ambulule muzimbu uaco ku uose i va uanene. (Mateo 28:19, 20) Vika ve ku linga Vakaleho va Yehova ku tuala ha lisiko lia Yesu?

1. Vati Vupolofeto vua ku Mateo 24:14 vuli na ku lipuisamo lelo lino?

Yesu ua polofetele ngueni: “Zimpande ezi vene zia cili zia Vuangana va ka zi ambulula ku vifuti viose.” (Mateo 24:14) Vakaleho va Yehova ve ku ambulula muzimbu na ndzolela yose. Tue ku ambulula muzimbu ua cili mu mavu ose mu malimi a tuvakana 1.000! Linga eci cipanga ca ku hama ngeci cende vuino ce ku tondeka ku lihakela kapandi ka kama na ku noneka vuino viuma. Ka citava ku linga cipanga caco ca ku hona vukuasi vua Yehova.

2. Kapandi kaka tue ku lihakela linga tu ambuluile vantu?

Tue ku ambuluila kuose ku tue ku uana vantu. Ngeci mua Vakua Kilistu va ku livanga, netu tue ku ambuluila ku ‘ndzivo na ndzivo.’ (Vilinga 5:42) Kaha eci cifua ca ku ambuluilamo ce ku tu kuasa ku ambuluila vantu vavengi nkala muaka. Mu ku linga vintsimbu via vingi vamo vantu ka tue ku va uana ha vindzivo, tue ku ambuluila naua ku vihela via mbunga. Kaha naua, ntsimbu yose tue ku tonda vukovelelo vua ku lekako vakuetu via Yehova na vutumbe vueni.

3. Iya va kundika cipanga ca ku ambulula muzimbu ua cili?

Vakua Kilistu va vusunga vose, va kala na cipanga ca ku ambulula muzimbu ua cili. Tua haka seho ya kama ku cipanga caco. Kaha tue ku ambulula na ndzili yetu yose, muomu tu tantekeya ngecize cipanga caco ce ku ovola miono. (Tandenu 1 Timoteo 4:16.) Ka ve ku tu fueta, vunoni tue ku linga cipanga caco vuana, muomu Mbimbiliya nguayo: “Vuana mu na tambula ngoco, vu hanienu ngoco.” (Mateo 10:7, 8) Vutuhu kati vose ve ku tava muzimbu ua Vuangana. Vunoni ambe ngoco kasi tue ku tualelelaho, muomu ku ambulula ca pua mutamba ua ku lemesa cetu, kaha ce ku vuisa Yehova ndzolela.

TANTEKEYENU VIKUAVO

Tantekeyenu vikuavo ku tuala ha kapandi ka ve ku lihakela Vakaleho va Yehova mu ku ambulula mu mavu ose, kaha na vati Yehova ue ku va kuasa.

Cipanga ca ku ambulula mu mavu ose: (A) Costa Rica, (B) Estados Unidos, (C) Benin, (D) Tailândia, (E) Yap, (F) Suécia

4. Tue ku fuitangana mu ku ambuluila vantu vose

Vakaleho va Yehova ve ku lihakela kapandi ka ku lifuila, mu ku ambuluila ku vantu va ku vihela viose. Talenu VIDEO, kaha simutuilenu ha cihula ci na hatako.

VIDEO: Ku Ambuluila na “ku Mutamba uze ha Lenga Mavu” (7:33)

Vika vie ku mi komouesa ku tuala ha kapandi ka ve ku lihakela Vakaleho va Yehova mu ku ambulula?

Tandenu Mateo 22:39 na Loma 10:13-15, kaha simutuilenu ha vihula evi:

Vati cipanga cetu ca ku ambulula ca muesa ngecize tua lema vantu?
Vati Yehova ue ku livua ku mutima ku tuala hali vaze ve ku ambulula muzimbu ua cili?—Talenu cinimbu 15.

5. Tu vangamba kumo na Njambi

Kua kala vimona via vingi via muesa ngecize, Yehova ikeye ali na ku tuamenena vipanga vietu. Ca ku muenako, tangua limo ku cinguezi umo muanetu ua lizina Paul ua ku Nova Zelândia, ua uanene umo mpuevo mu ku ambulula ca ku ndzivo na ndzivo. Ku cimene, uze mpuevo ua vundilile kuli Njambi mu ku mu tumbula ha lizina lieni, Yehova, linga a tume muntu a mu kuase ku tantekeya Njambi. Kaha muanetu Paul ngueni: “Mu nima ya viola vitatu, nja ka ngongotele ha mbelo yeni.”

Tandenu 1 Kolintu 3:9, kaha simutuilenu ha cihula eci:

Vati vimona ngeci mueci ca ku Nova Zelândia, via muesa ngecize Yehova ue ku tuamenena cipanga ca ku ambulula?

Tandenu Vilinga 1:8, kaha simutuilenu ha cihula eci:

Omo lia vika tue ku tondeka vukuasi vua Yehova linga tu puisemo cipanga ca ku ambulula?

Mua vi tantekeyele ni?

Ku viuano vietu via mu kati ka simano, tue ku tambula vilongesa vie ku vueza ku vutongue vuetu vua ku ambulula. Nga muaya ho laza ku cimo ciuano, vika mu handeka ku tuala ha vilongesa viaco?

6. Tue ku ononoka lisiko lia Njambi lia ku ambulula

Mu ntsimbu ya vapostolo, vitozi va tondele ku vindika vandongesi va Yesu ku ambulula. Vakua Kilistu va katete va ile muaya vindzango mu ku hakuila “zimpande zia cili.” (Filipu 1:7) Na lelo lino Vakaleho va Yehova ve ku lingamo. a

Talenu VIDEO.

VIDEO: Ku Hakuila Muzimbu ua Cili Muaya Vindzango (2:28)

Tandenu Vilinga 5:27-42, kaha simutuilenu ha cihula ci na hatako:

Omo lia vika ka tue ku likela ku ambulula?—Talenu vinanga 29 38, na 39..

VAMO VE KU HULA NGUAVO: “Omo lia vika Vakaleho va Yehova ve ku ambuluila ku ndzivo na ndzivo?”

Vati mu kumbulula?

VI MU NA LILONGESA

Yesu ua tumine vandongesi veni ku ambulula muzimbu ua cili mu vifuti viose. Yehova ali na ku kuasa vangamba veni ku puisamo eci cipanga.

Mpupulule

Vati muzimbu ua cili vali na ku u ambulula mu mavu ose?
Vati cipanga cetu ca ku ambulula ca muesa ngecize tua lema vakuetu?
Vuno mu ku mona cenu ku ambulula ci hasa ku tu vuisa ndzolela ni? Omo lia vika?

Cino cilongesa nji na ci manusula lia:

Lingenu Evi

Hulenu vamo vamuanetu mu Ndzivo ya Vuangana, va mi leke vitanga vi va vulile mu va putukile ku ambulula, kaha na vivezikiso vika ve ku tambula

Vikuavo:

Vikuavo vi mu hasa ku linga

KONKENUHO

Talenu vati Vakaleho va Yehova ve ku ambuluila mu vimbonge via kama.

Ku Ambuluila ku Mbunga mu Njila ya ku Lifuila mu Paris

Vati Vakaleho va Yehova ve ku ambuluila vakua ku tina ku membo avo?

Ku Tsiha Mpuila ya mu Lutsilielo ya Vakua ku Tina ku Membo Avo (5:59)

Halakanenu ndzolela i ve ku ivua vantu mu cipanga ca ntsimbu yose ca ku ambulula.

Kali-kali nja Hanguile eci Cipanga (6:29)

Tantekeyenu vimo vihangula via seho vi va lingile vakua masiko, via tuala ku lutue cipanga ca cili.

“Os pregadores do Reino vão aos tribunais” (O Reino de Deus já Governa!, capitulo 13)

a Njambi ikeye ua tu hana mpoko ya ku ambulula, Vakaleho va Yehova ka va tondekele lisesa lia ku vinguvulu via vantu linga va ambulule muzimbu ua cili.