CILONGESA 24
Tungelo va pua Veya?
Yehova ua tonda tu tantekeye vusoko vueni vua muilu. Tungelo va pua mutamba ua vusoko vua Njambi, kaha va va tumbula nguavo, “vana va Njambi.” (Yombi 38:7) Vika ya handeka Mbimbiliya ku tuala ha tungelo? Ndzili ika va kala nayo ha vantu? Vuno tungelo vose va pua mutamba ua vusoko vua Njambi ni?
1. Tungelo va pua Veya?
Yehova ua livangele ku tanga tungelo tele kanda a tange mavu. Tungelo va pua vimbembesi va kala na mivila ya sipilitu, ngeci mua Njambi. Va kala muilu kaha ka ci tava ku va mona. (VaHevelu 1:14) Kua kala makulukazi na makulukazi a tungelo, vunoni kangelo ku kangelo ua lifuila. (Ku-Solola 5:11) Va pua ‘vakua ku puisamo lizi lia Yehova.’ (Visamo 103:20) Ku laza, Yehova ua kele na ku tuma tungelo veni linga va tuale imo mizimbu, ni va ka kuase cipue ku ovola vangamba veni. Lelo lino, tungelo ve ku tuamenena Vakua Kilistu ku vantu va tonda ku lilongesa via Njambi.
2. Iya ua pua Satana kaha veya va pua vandemone?
Vamo tungelo ka va tualeleleho ku kakatela kuli Yehova. Kangelo ua katete ua alulukilile Yehova, ua pua “uze i va luka Satana na Ndiavu, mukua ku onga mavu ose.” (Ku-Solola 12:9) Satana ua tondele ku sika vantu, ngeci uongele vayala na mpuevo va katete. Kaha mu nima ya ntsimbu ua lingisile naua vamo tungelo va lipandakane kuli ikeye. Ava tungelo va lisino va va luka nguavo vandemone. Yehova ua va sekuile muilu na ku va mbila hano ha mavu, kaha vuovuno va ka va nongesa.—Tandenu Ku-Solola 12:9, 12.
3. Vati Satana na vandemone ve ku seteka ku tu sevuisa?
Satana na vandemone ve ku seteka ku sevuisa vantu vavengi ku hitila mu mahamba. Ku linga via mahamba ca pua ku seteka ku handeka na vimbembesi va ku zuala. Ca ku muenako, vamo vantu ve kuya kuli vakua ku tahesa viuma via muilu, ku vingombo, ku vakua mahesi na ku vimbanda. Vakuavo ve ku tava sakesi ya likuata na mahamba. Vakuavo co, ve ku va kuisa nguavo citava ku handeka na vatsi. Vunoni Yehova, ua tu lungula ngueni: “Kati mu aluluke kuli vaze vali na mahamba, cipue vakua vulozi.” (Levitiku 19:31) Yehova ua tu hana eci cilungula linga a tu niunge kuli Satana na vandemone. Muomu va pua vitozi va Njambi kaha va tonda ku tu vulumuna.
TANTEKEYENU VIKUAVO
Tantekeyenu viuma via cili vi ve ku linga tungelo. Kaha tantekeyenu naua vusonde vua mahamba na vati tu hasa ku liniunga kuli Satana na vandemone.
4. Tungelo va ku ononoka ve ku kuasa vantu ku lilongesa via Yehova
Vutuhu tungelo kati vakevo mpundu ve ku ambuluila vantu, vunoni va hasa ku tuamenena vangamba va Njambi ku vantu va tonda ku lilongesa vieni. Tandenu Ku-Solola 14:6, 7, kaha simutuilenu ha vihula evi:
-
Omo lia vika tua tondeka vukuasi vua tungelo mu ku ambulula?
-
Vuno ku tantekeya ngecize tungelo va hasa ku mi tuamenena ku vantu va tonda ku lilongesa Mbimbiliya ce ku mi lembezieka ni? Omo lia vika?
5. Vianenu mahamba
Satana na vandemone va pua vitozi va Yehova. Kaha naua va pua vitozi vetu. Tandenu Luka 9:38-42, kaha simutuilenu ha cihula eci:
-
Vika vandemone ve ku linga ku vantu?
Ka tu tondo ku lania vandemone mu muono uetu. Tandenu Ndeutelonomi 18:10-12, kaha simutuilenu ha vihula evi:
-
Mu vinjila vika vandemone ve ku tonda ku tu sevuisa na ku handeka netu? Vilinga vika via mahamba via kala ku cihela cenu?
-
Mu ku mona cenu vuno Yehova ua linga vuino mu ku tu vindika via mahamba ni? Omo lia vika?
Talenu VIDEO, kaha simutuilenu ha vihula vi na hatako.
-
Mu ku mona cenu, vuno mukalo u va zikile muana ua vaPalesa ua puile vusonde ni? Omo lia vika?
-
Vika va pandele ku linga vaPalesa linga va liniunge ku vandemone?
Tundeko, Vakua Kilistu va vusunga ve ku viana vandemone. Tandenu Vilinga 19:19; na 1 Kolintu 10:21, kaha simutuilenu ha cihula eci:
-
Omo lia vika ca puila ca seho ku nongesa nkala cuma ci mua kala naco ca likuata na mahamba?
6. Vulenu Satana na vandemone
Satana ikeye muangana ua vandemone. Vunoni ntuamena ua tungelo ua pua kangelo ua kama Mingeli, ni nguetu Yesu. Mingeli lia pua lizina lieni likuavo. Ngolo ika ua kala nayo Mingeli? Tandenu Ku-Solola 12:7-9, kaha simutuilenu ha vihula evi:
-
Veya va kala na ngolo ya kama? Mingeli na tungelo veni, ni Satana na vandemone veni?
-
Mu ku mona cenu, vuno Vakua Kilistu va pande ku ivua liova lia Satana na vandemone veni ni?
Mu hasa ku vula Satana na vandemone. Tandenu Tiango 4:7, kaha simutuilenu ha cihula eci:
-
Vati mu hasa ku liniunga kuli Satana na vandemone?
VAMO VE KU HANDEKA NGUAVO: “Ku linga vueho vua likuata na via mahamba ni ku tala vifilme via vulozi, kati citanga. Muomu ka ca puile ku likata mpundu navo.”
-
Omo li vika ca pua vusonde ku singanieka ngoco?
VI MU NA LILONGESA
Tungelo ve ku tu kuasa. Vunoni Satana na vandemone va pua vitozi va Yehova, kaha ve ku pangesa mahamba linga va sevuise vantu.
Mpupulule
-
Vati tungelo vali na ku kuasa vantu ku lilongesa via Yehova?
-
Satana na vandemone veni vapua veya?
-
Vika ca puila ca seho kuli yenu ku viana mahamba?
KONKENUHO
Hilulenu vukaleho vua muesa ngecize Yesu ikeye kangelo ua kama Mingeli.
“Iya ua pua Kangelo ua Kama Mingeli?” (Cimpande ca mu saiti)
Hilulenu vukaleho vua muesa ngecize Satana ka puile lika vumo vupi vua kala mu kati ketu.
Talenu vati umo mpuevo ua patukile ku ngolo ya vandemone.
“Ela descobriu que a vida tem um objectivo” (A Sentinela, 1 de Julho, 1993, mu putu)
Tantekeyenu vati Satana ue ku pangesa mahamba mu ku sevuisa vantu.
“Vusunga ku Tuala ha Mahesi na Vulozi” (Njila i Tuala ku Muono, mutamba 5)
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
