CILONGESA 26
Vika kua Kela Vupi na Lamba?
Nga ku na soloka mponde cihula ce ku iza mu visinganieka via vantu ca pua, omo lia vika? Ce ku tu vuisa ndzolela ku tantekeya ngecize Mbimbiliya ya kumbulula ha toma eci cihula!
1. Vati Satana ua nehele vupi ha mavu?
Satana Ndiavu ua alulukilile Njambi. Mu ku linga ua tondele ku pua muangana, ua suangeleyele vantu va katete va Andama na Eva va lipandakane neni mu ku alulukila Njambi. Ua lingilemo mu kuonga Eva. (Njenisisi 3:1-5) Ua lingisile Eva ku singanieka ngecize Yehova ua mu vingilikile vimo viuma via cili. Ua muesele ngecize vantu va hasa ku yoya mu ndzolela ya kama nga ka va ononoka Njambi. Makuli a katete a handekele Satana a puile ku leka Eva ngueni ka ka tsi. Ngeci Mbimbiliya ya luka Satana nguayo: “Mukua makuli na ise yao.”—Yoano 8:44.
2. Vika va hanguile ku linga va Andama na Eva?
Yehova ua muesele vuhuanga vua kama kuli va Andama na Eva. Ua va lekele ngueni citava valie ku miti yose ya kele mu citungu, ku tundisako umo lika. (Njenisisi 2:15-17) Vunoni vakevo va hanguile kulia ku muti uze u va va vindikile. Eva “ua helele ku vusuka vuauo, kaha ua lile.” Mu nima ya ntsimbu, Andama neni “ua lile.” (Njenisisi 3:6) Vose vavali va muesele lisino kuli Njambi. Mu ku linga va Andama na Eva va puile va ku tantuluka, ku linga via cili ca va kele mu maninga. Vunoni mu ku muesa lisino kuli Njambi ku cizango cavo, va vulumuine na ku viana ku sika ceni. Cize cihangula ca va kokelele lamba ya kama.—Njenisisi 3:16-19.
3. Vati cihangula ca va Andama na Eva ca tu kuata?
Omo va Andama na Eva va vulumuine, vutantuluke vua va tundile, kaha va tambuisileko vana vavo vose ku hona ku tantuluka. Ku tuala hali Andama, Mbimbiliya nguayo: “Hali yala umo lika, vupi vua kovelele hano ha mavu, na ku-tsa ha vupi; kaha ngecize vene ku-tsa ci na hete ku vantu vose.”—Loma 5:12.
Via vingi vie ku tu lingisa ku mona lamba. Vintsimbu vimo tue ku yanda omo lia vihangula via ku vihia vi tue ku linga. Vintsimbu vikuavo co tue ku yanda omo lia vihangula via ku vihia vi ve ku linga vakuetu. Kasi naua vintsimbu vimo tue ku yanda muomu tuli ha cihela ca ku vihia, kaha naua ha ntsimbu ya ku vihia.—Tandenu Ekelesiaste 9:11.
TANTEKEYENU VIKUAVO
Tantekeyenu omo lia vika Njambi kati ikeye ua koka vupi na tuyando kaha vati ue ku livua ku mutima mu tue ku yanda.
4. Iya mukua mulonga ua lamba yetu?
Vantu vavengi va tsiliela ngecize Njambi ikeye ali na ku tumina mavu. Mukemuo ni? Talenu VIDEO.
Tandenu Tiango 1:13 na 1 Yoano 5:19, kaha simutuilenu ha cihula eci:
-
Vuno Njambi ikeye mukua mulonga ua vupi na lamba i tue ku mona ni?
5. Hilulenu vieza mu ku sika ca Satana
Tandenu Njenisisi 3:1-6, kaha simutuilenu ha vihula evi:
-
Makuli aka ua handekele Satana?—Talenu vinimbu 4 na 5.
-
Vati Satana ua lingisile ci soloke ngue Yehova ua kele na ku vingilika vimo viuma via cili ku vantu?
-
Vuno kuliya na mezi a Satana, vuno vantu va tondeka Yehova ku pua Muangana uavo linga va yoye mu ndzolela ni?
Tandenu Ekelesiaste 8:9, kaha simutuilenu ha cihula eci:
-
Mu ku linga Yehova kati ikeye naua Muangana ua mavu, vika viezamo?
-
Va Andama na Eva va puile va ku tantuluka kaha va yoyelele mu Citungu. Vunoni va halakanene kuli Satana na ku alulukila Yehova
-
Omo lia lisino liavo, ha mavu ha sula vupi, lamba na ku-tsa
-
Yehova tangua a ka manusula vupi, lamba na kutsa. Kaha vantu va ka pua va ku tantuluka na ku yoyela lueka naua mu Citungu
6. Yehova ua haka seho ku lamba yetu
Vuno Njambi ue ku sembulula lamba yetu ni? Talenu via sonekele Muangana Ndaviti na kapostolo Petulu. Tandenu Visamo 31:7; na 1 Petulu 5:7, kaha simutuilenu ha cihula eci:
-
Vati muli na ku livua ku mutima mu nima ya ku tantekeya ngecize Yehova ue ku mona lamba i tue ku lihita nayo kaha ka tu mbilile kuti?
7. Njambi tangua a ka manusula lamba yose ya vantu
Tandenu Isaya 65:17 na Ku-Solola 21:3, 4, kaha simutuilenu ha cihula eci:
-
Omo lia vika ce ku lembezieka ku tantekeya ngecize Yehova tangua a ka manusula viuma viose vie ku kokela vantu lamba?
Mua vi tantekeyele ni?
Satana mua handekele makuli a katete, ua vangeyele Yehova. Ni nguetu, ua kuitile mazilo ku lutsimo lua cili lua Yehova lua ku pua Muangana ua cilemo na vuoloke. Vuovuno Yehova a ka manusula lamba ya vantu. Mu ku lingamo a ka lihakuila ivene. Ni nguetu, aka muesa ha toma ngecize ku sika ceni cikeco ca hiana viose. Ku hakuila lizina lia Yehova cikeco cimpande ca seho ya kama, cipue muilu ni hano ha mavu.—Mateo 6:9, 10.
VAMO VE KU HANDEKA NGUAVO: “Viose vie ku tunda kuli Njambi, na lamba vene.”
-
Vati mu hasa ku kumbulula?
VI MU NA LILONGESA
Satana Ndiavu na vantu vavali va katete, vakevo va kala na mulonga ua vupi vua soloka hano ha mavu. Yehova ua tu haka seho ya kama kaha vuovuno a ka manusula lamba yose.
Mpupulule
-
Makuli aka Satana Ndiavu ua lekele Eva?
-
Vati lisino li va muesele va Andama na Eva lia tu kuata tu vose?
-
Vati tua tantekeya ngecize Yehova ua haka seho ku lamba yetu?
KONKENUHO
Tantekeyenu vati Mbimbiliya ya lombolola vupi.
Tantekeyenu vikuavo ku tuala ha cimpande ca katuile Satana Ndiavu mu citungu ca Endene.
“Por que Deus permite o sofrimeto?” (A Sentinela, 1 de Janeiro, 2014)
Hilulenu vikumbululo via ku lembezieka ku tuala ha cimo cihula ca cikalu.
“Omo lia Vika Njambi Uecelele Vantu Vavengi va va Tsihe Kuli Vakua Nazi?” (Cimpande ca mu saiti)
Talenu via lilongesele umo yala ku tuala ha lamba ya kele na ku mona.
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
