Vuno mua tsisaho laza umo muntu u mua lemene cikuma ni? Ha ntsimbu yaco ya vusiua vua kama, halumo mua lihuile nguenu: ‘Vika vie ku soloka ku muntu nga na tsi? Vuno citava nji lavelele ngecize tangua nji ka mu mona naua ni?’ Mu cilongesa cino neci ci a hatako, mu tantekeya vikumbululo via ku lembezieka vi ya hana Mbimbiliya.

1. Vika vie ku soloka ku muntu nga a tsa?

Yesu ua setekesele ku-tsa na tulo va kama. Muntu nga ali mu tulo va kama, ke ku tantekeya na vimo viahi vili na ku lingika. Haka ku-tsa ca lifuila na tulo? Nga muntu na tsi, ke ku ivua naua ku vavala. Kaha ke ku ivua naua vulika ambe nga ua kele na vavusamba na vavusoko vavengi va lemene. Mbimbiliya nguayo, “vatsi ka va tantekeya na vimo viahi.”—Tandenu Ekelesiaste 9:5.

2. Vati ku tantekeya vusunga ku tuala ha ku-tsa ce ku tu kuasa?

Vantu vavengi, va kala na liova lia ku-tsa ni vene lia vatsi! Vunoni viya handeka Mbimbiliya ku tuala ha ku-tsa, vi hasa ku mi lembezieka cikuma. Yesu ngueni: “Vusunga vu ka mi patula.” (Yoano 8:32) Vutuhu amo malombelo e ku longesa ngecize vantu va kala na cimo cimbembesi ce ku tualelelaho ku yoya ambe nga muntu na tsi, vunoni kati vikevio viya longesa Mbimbiliya. Ngeci mukemuo na umo uahi naua ue ku yanda mu nima ya ku-tsa. Cikuavo naua, mu ku linga vatsi ka va tantekeya na vimo viahi, ka va hasa ku tu puila vusonde na vumo vuahi. Ngeci mukemuo, ka ce ku tondeka ku lihamba navo ni ku va lemesa. Kaha naua ka ce ku tondeka ku va kundika mu vivundilo.

Vamo ve ku handeka nguavo, va hasa ku handeka na vatsi. Vunoni ka citava ku lingamo. Muomu ngue mu tua lilongesa laza, “vatsi ka va tantekeya na vimo viahi.” Ngeci mukemuo, vaze ve ku singanieka nguavo vali na ku handeka na vavusoko vavo vatsa, citava ve ku simutuila vene na vandemone vaze ve ku lihimpula ngue vatsi. Cili vene, ku tantekeya vusunga ku tuala ha vatsi ce ku tu niunga ku vandemone. Yehova ua tu lungula linga kati tu simutuile na vatsi, muomu a tantekeya ngecize tu hasa ku likovelesa mu vusonde vua ku likata na vandemone.—Tandenu Ndeutelonomi 18:10-12.

3. Tantekeyenu vusunga ku tuala ha cifua ca vatsi

Mu mavu ose, vantu va tsiliela viuma via ku liseza-seza u tuala ha viuma vie ku soloka ku muntu nga na tsi. Kaha ngue mu tua tantekeya, ka citava vilongesa viaco viose vi pue via vusunga.

• Viuma vika va tsiliela vantu ku tuala ha vatsi ku cihela ci mua kala?

 4. Ku tantekeya vusunga ku tuala ha ku-tsa ce ku tu kuasa

Ku tantekeya vusunga ku tuala ha ku-tsa ce ku tu patula ku liova lia vatsi. Tandenu Ekelesiaste 9:10, kaha simutuilenu ha cihula eci:

• Vuno vatsi va hasa ku tu puila vusonde ni?

Vusunga vua mu Mbimbiliya, vue ku tu niunga ku viuma vi va tsiliela vantu nguavo, vatsi va tondeka ku lihamba navo ni vene ku va lemesa. Tandenu Isaya 8:19 na Ku-Solola 4:11, kaha simutuilenu ha cihula eci:

• Mu ku mona cenu, vati ue ku livua Yehova ku tuala ha muntu ue ku lemesa vatsi ni ku tonda vukuasi vuavo?

5. Ku tantekeya vusunga ku tuala ha ku-tsa ce ku tu lembezieka

Vantu vavengi va va longesa nguavo, tangua va ka tsa, va ka va hana kasitiku omo lia vupi vu va lingile tele va ci li na muono. Vunoni ce ku tu lembezieka cikuma ku tantekeya ngecize na umo uahi ue ku yanda mu nima ya ku-tsa. Cipue nga ua lingile viuma via vingi via ku vihia. Tandenu Loma 6:7, kaha simutuilenu ha cihula eci:

• Kaha ngue mu tu na tanda mu Mbimbiliya, nga vatsi ve ku sambua ku vipi viavo, mu ku mona cenu, vuno kuli umo ua tsa ali na ku yanda omo lia vupi vua lingile ni?

Mu tue ku tualelelaho ku tantekeya vuino Yehova, tue ku heta naua ha ku nongonona ngecize na limo litangua liahi a ka yandesa vatsi. Tandenu Ndeutelonomi 32:4 na 1 Yoano 4:8, kaha simutuilenu ha vihula evi:

• Vuno Njambi ua kala na vifua via cili, ngeci muevi vi tu na tanda, a hasa vene ku yandesa vatsi ni?

• Vuno ku tantekeya vusunga ku tuala ha ku-tsa ce ku mi lembezieka ni? Omo lia vika?

 VI MU NA LILONGESA

Nga muntu na tsi, muono ueni ue kuhua. Vatsi, ka ve ku yanda kaha ka citava naua va pue vusonde kuli vaze vali na muono.

Mpupulule

• Vika vie ku soloka ku muntu nga a tsa?

• Vati ku tantekeya vusunga ku tuala ha ku-tsa ce ku tu kuasa?

• Vati ku tantekeya vusunga ku tuala ha ku-tsa ce ku tu lembezieka?