CILONGESA 37
Vi ya Handeka Mbimbiliya ku Tuala ha Vipanga na Vimbongo
Mua lisosomuaho laza na vipanga cipue vimbongo ni? Ce ku pua ca cikalu ku tonda via ku lisuka navio, kaha na ku tuameka Yehova ha ntsimbu imo lika. Mbimbiliya ya hana vimamuna via seho vize vi hasa ku tu kuasa.
1. Vika ya handeka Mbimbiliya ku tuala ha vipanga?
Njambi ua tonda vipanga vi tue ku linga vi tu vuise ndzolela. Mbimbiliya nguayo: “Ka kuesi vieka ku muntu via ku hiana eci, a lie, a nue, na ku zolesa muono ueni na vize via viuka mu vipanga vieni.” (Ekelesiaste 2:24) Yehova ua pua mukua ku fuitangana. Ngeci mukemuo, mu tue ku tambuluisa ku fuitangana ceni, tue ku muya ku mutima na ku livuisa ndzolela etu vavene.
Vipanga via pua via seho. Vunoni ka tua pandele ku vi tavesa, na limo litangua liahi, vi pue via seho ku hiana ku lemesa Yehova. (Yoano 6:27) Yehova ua kulahesa ngueni nga tu mu tuameka mu muono, a ka tu hana vize vi tua tondeka linga tu tualeleleho ku yoya.
2. Njila ika ya cili i tua pande ku muenamo vimbongo?
Vutuhu Mbimbiliya ya muesa ngecize vimbongo via pua “vungami,” vunoni ya tu mamuna naua ngecize ku kala lika na vimbongo, ka ci hasa ku tu vuisa ndzolela ya vusunga. (Ekelesiaste 7:12) Ngeci mukemuo, Mbimbiliya ya tu kaniamesa kati tu leme vimbongo, vunoni tu ‘viukilile na vize vi tuli navio.’ (Tandenu VaHevelu 13:5.) Nga tu viukilila na vize vi tuli navio, ka tu ka futuka ku mbunge omo lia ku livua ngecize kasi kuli vimo via tu kambela. Kaha naua, tu ka liniunga ku ku likovelesa ngoco mu makongo. (Visimo 22:7) Cikuavo naua, tu ka liniunga ku vueho vua lizangamena na ku matumbe a ku tonda ku pua vampite mu vuasi-vuasi.
3. Vati tu hasa ku pangesa vimbongo na vuhuanga?
Yehova ua pua cihuanga kaha tue ku mu tambuluisa mu ku ‘kala na cizango ca ku hana-hana.’ (1 Timoteo 6:18) Tu hasa ku pangesa vimbongo vietu na vuhuanga, mu ku kuasa cikungulukilo na vakua ku kalekeya, cikuma-kuma vamuanetu. Yehova ke ku tuala lika mana ku ndando i tue ku hana, vunoni na ku vutumbe vue ku tu lingisa ku i hana. Ngeci mukemuo, nga tu hana na mutima uose, tu kevua ndzolela na kuya Yehova ku mutima.—Tandenu Vilinga 20:35.
TANTEKEYENU VIKUAVO
Talenu vukuasi vua kala ha ku haka cipanga mu cihela caco, na ku viukilila na vize vi tuli navio.
4. Hanenu vumpahu kuli Yehova ku hitila mu cifua ci mue ku pangelamo
Vusamba vuetu na Yehova vua pande ku kuata ku cifua ci tue ku muenamo vipanga. Talenu VIDEO, kaha simutuilenu ha vihula vi na hatako:
-
Mu video, vika via mi komouesa ku tuala ha vilinga via Jason na cifua ca kele na ku muenamo vipanga?
-
Vati ua hakele vipanga mu cihela ci via pande?
Tandenu Kolose 3:23, 24, kaha simutuilenu ha cihula eci:
-
Omo lia vika cifua ci tue ku muenamo vipanga ca kala na seho?
Vipanga via pua via seho. Vunoni ka tua pandele ku vi tavesa vi kale na seho ku hiana ku lemesa Yehova
5. Ku viukilila na vize vi tuli navio ce ku tu kuasa
Vantu vavengi ve ku linga cose mu ku lilundikila lumambongo. Vunoni Mbimbiliya ya tu leka ku linga vieka. Tandenu 1 Timoteo 6:6-8, kaha simutuilenu ha cihula eci:
-
Mbimbiliya ya tu kaniamesa ku linga vika?
Ci pue nga tuli na via vindende, tu hasa ku yoya mu ndzolela. Talenu VIDEO, kaha simutuilenu ha vihula vi na hatako.
-
Vutuhu aa masoko a kala na vimbongo via vindende, vunoni vika vie ku a vuisa ndzolela?
Vati co nga tua kala na viuma via vingi, vunoni kasi tu tonda vikuavo naua? Yesu ua pangesele cimueso mu ku muesa vusonde vua kalaho. Tandenu Luka 12:15-21, kaha simutuilenu ha cihula eci:
-
Vika mua lilongesa mu cimueso ca Yesu?—Talenu cinimbu 15.
Tandenu kaha setekesenu Visimo 10:22 na 1 Timoteo 6:10, kaha simutuilenu ha vihula evi:
-
Mu ku mona cenu, vika via pua via seho ya kama? Ku kala na vusamba na Yehova ni ku kala na vimbongo via vingi? Omo lia vika?
-
Visoti vika vie ku iza mu ku tonda ku kala na vimbongo via vingi?
6. Yehova a ka tu hana vize via tu kambela
Vitanga via vimbongo na vipanga vi hasa ku eseka lutsilielo luetu muli Yehova. Talenu VIDEO mu mone vati tu hasa ku lua na vieseko viaco, kaha simutuilenu ha vihula vi na hatako.
-
Mu video, visoti vika via lihitile navio muanetu?
-
Vika ua lingile linga a hase ku pinda na visoti viaco?
Tandenu Mateo 6:25-34, kaha simutuilenu ha cihula eci:
-
Vika ua kulahesa ku ka tu lingila Yehova nga tu mu tuameka?
VAMO VE KU HANDEKA NGUAVO: “Nja pande ku fuitangana nji suke vusoko vuange. Ka nji hasa ku kunguluka visimano viose.”
-
Cinimbu cika ca mi hana vusunga ngecize ku tuameka Yehova mu muono uenu cikeco ca pua cihangula ca cili cikuma?
VI MU NA LILONGESA
Vimbongo na vipanga via tondeka, vunoni ka via pandele ku tu tangula ku pangela Yehova.
Mpupulule
-
Vika vi hasa ku tu kuasa ku mona vipanga mu njila ya cili?
-
Vati ku viukilila na vize vi muli navio ce ku mi kuasa?
-
Vati mu hasa ku muesa ngecize mua kulahela mu cikulaheso ca Yehova ca ku hana vangamba veni vize via va kambela?
KONKENUHO
Tantekeyenu nga Mbimbiliya ya muesa ngecize vimbongo via pua via ku vihia ni kuahi.
“Vuno Vimbongo Vikevio Muzi ua Vipi Viose Ni?” (Cimpande ca mu saiti)
Tantekeyenu ku hana cika ce ku ya Njambi ku mutima.
“Vika ya Handeka Mbimbiliya ku Tuala ha ku Hana?” (Cimpande ca mu saiti)
Vuno citava ku linga vueho vua vimbongo ni?
Talenu vika via kuasele umo yala ua puile mukua ku linga vueho vua lizangamena na vuizi alulule cifua ca muono ueni.
“Mueka nja Lemene Vueho vua ku tunta na Tuvalu” (Vutala vua Kaniungi, 1 ya Novembro ya 2011)
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
