CILONGESA 38
Hakenu Seho ku Vuana vua Muono
Viuma via vingi vi tue ku hasa ku linga, tue ku vi puisamo muomu tuli na muono. Kaha muono ue ku tu tovala cipue vene nga tuli na vimo visoti. Vati tu hasa ku muesa ku santsela ku vuana vua muono? Kaha vusunga vuka vua kama vua pande ku tu lingisamo?
1. Omo lia vika tua pande ku santsela ku vuana vua muono?
Tua pande ku haka seho ku muono muomu vua pua vuana vua tu hana Tatetu ua cilemo, Yehova. Ikeye ua pua “ndundzi ya muono,” ni nguetu ikeye ua tangele vifua viose vili na muono. (Visamo 36:9) “Moumu ikeye ivene ue ku hana kuli vose muono, na muku na viuma viose.” (Vilinga 17:25, 28) Yehova ue ku tu hana viose vi tua tondeka mangana tu tualeleleho ku yoya. Kati ovio lika, ua tanga naua viuma mu cifua ci tu vuisa ndzolela ya ku yoya.—Tandenu Vilinga 14:17.
2. Vati tu hasa ku muesa kuli Yehova ngecize tua santsela ku vuana vua muono?
Yehova ua putukile ku mi haka seho, tunde ha litangua liva mi imitile kuli cisemi cenu ua mpuevo. Umo ngamba ya Yehova ua vundilile kuli ikeye mu cimo civundilo ci va soneka mu Mbimbiliya ngueni: “Meso ove a muene muvila uange te kanda va u vumba.” (Visamo 139:16) Yehova ua haka seho ya kama ku muono uenu. (Tandenu Mateo 10:29-31.) Ngeci mukemuo ci hasa ku mu vuisa cikuma ku vavala ku mutima, ku mona muntu a tsiha mukuavo ku cizango, ni ali tsiha ivene. a (Ezundu 20:13) Ce ku mu vuisa naua ku vavala ku mutima nga tu haka muono uetu ngoco mu vusonde, ni ka tu lingi vize via tondeka mu ku niunga miono ya vakuetu ku vusonde. Mu tue ku niunga vuino muono uetu na ku singimika miono ya vakuetu, tue ku muesa ngecize tua santsela cikuma ku vuana vua ku komouesa vua muono.
TANTEKEYENU VIKUAVO
Hilulenu vimo vinjila vi mu hasa ku mueselamo ku santsela cenu ku vuana vua muono.
3. Niungenu vuino cihindu cenu
Vakua Kilistu va ku lihana, ve ku pangesa vuino muono uavo uose mu ku pangela Yehova. Ku lingamo ca pua ngue ku kombeleya mivila yavo kuli Njambi. Tandenu Loma 12:1, 2, kaha simutuilenu ha vihula evi:
-
Vika via pande ku mi vuisa cizango ca ku niunga vuino cihindu cenu?
-
Mu vinjila vika mu hasa ku lingamo?
4. Puenu na ku linga viose vi tondeka na ku liniunga ku vimponde ni ku kutsa
Mbimbiliya ya tu kaniamesa ku liniunga ku mizimbu ya vusonde. Talenu VIDEO mu tantekeye vimo viuma vi mu hasa ku linga mu ku liniunga.
Tandenu Visimo 22:3, kaha simutuilenu vati nenu na vakuenu mu hasa ku liniunga ku mponde . . .
-
ku ndzivo.
-
ku vipanga.
-
mu ku linga vueho.
-
kuendesa ni kuendela mu mendelo.
5. Puenu na ku singimika muono ua muana kanda a semuke
Ndaviti ua pangesele mezi a ku tovala, ku seho ya haka Yehova ku muono ua kakeke kanda a semuke. Tandenu Visamo 139:13-17, kaha simutuilenu ha cihula eci:
-
Kuli Yehova, vuno muono ua muntu ue ku putuka ha ku imita ni ha ku semuka?
Masiko a hele Yehova ku vaIsaleli va laza, a niungile visemi va vampuevo na vaze va kele na mivila ivali. Tandenu Ezundu 21:22, 23, kaha simutuilenu ha vihula evi:
-
Vati Yehova ua kele na ku muenamo muntu ua tsihile mu ku sevuka muana kanda a ci semuke?
-
Vati a hasa ku livua nga muntu a lingamo ku cizango? b
-
Vika mu singanieka ha cifua ce ku muenamo Njambi eci cimpande?
Cipue mpuevo ua haka seho ku muono, ue ku livua ngecize ku tundisa lizimo cikeco lika cihangula ca na lisupu naco. Tandenu Isaya 41:10, kaha simutuilenu ha vihula evi:
-
Nga mpuevo ali na ku hita mu ntsindiye ya ku tundisa lizimo, kuli iya na pande ku pinga vukuasi? Kaha omo lia vika?
VAMO VE KU HANDEKA NGUAVO: “Mpuevo ua kala na mpoko ya ku hangula nga a tundisa lizimo ni kuahi, muomu muvila ueni.”
-
Vika via mi hana vusunga ngecize Yehova ua haka seho ku mpuevo ali na mivila ivali, kaha na ku muana kanda a semuke?
VI MU NA LILONGESA
Mbimbiliya ya tu longesa ku lema, ku singimika, na ku niunga vuana vua muono vua tu hana Yehova. Eci ca ambatesela kumo na muono uetu vavene na ya vakuetu.
Mpupulule
-
Omo lia vika miono ya vantu ya kala na seho kuli Yehova?
-
Vati Yehova ue ku livua ku mutima nga muntu a litsiha ni a tsiha mukuavo ku cizango?
-
Vika mua lema cikuma ku tuala ha vuana vua muono?
KONKENUHO
Vati tu hasa ku santsela Yehova ku vuana vua muono?
Tondenu cikumbululo ca cihula, Vuno Njambi a hasa ku konekela mpuevo ua tundisa lizimo ni?
“Vika ya Handeka Mbimbiliya ku Tuala ha ku Tundisa Lizimo?” (Cimpande ca mu saiti)
Tantekeyenu vati cifua ce ku muenamo Njambi muono ca pande ku kuata ku vueho vu tue ku hangula.
“‘Vueho vua Mponde’—Vuno Nange nja Pande ku Lihakamo Ni?” (Vingilenu!, 8 ya Outubro, 2000)
Talenu vati Mbimbiliya i hasa ku kuasa muntu ali na visinganieka via ku litsiha.
a Yehova ua haka seho ya kama kuli vaze va pokoka mitima. (Visamo 34:18) Ue ku ivuisisa ngecize kua kala vimo vitanga vie ku lingisa vamo ku tonda ku litsiha vakevo vavene, kaha ue ku tonda ku kuasa. Linga mu mone vati Yehova a hasa ku kuasa muntu ali na visinganieka viaco, tandenu cimpande “Nji Tonda Kutsa—Vuno Mbimbiliya i Hasa ku nji Kuasa nga Njili na Visinganieka via ku Litsiha Ni?” Cili mu mutamba Konkenuho ua cino cilongesa.
b Vaze va tundisile mazimo ku cizango, ka ci tondeka va hianesemo ku livua mulonga muomu Yehova a hasa ku vecela. Linga mu tantekeye vikuavo, talenu cimpande “Vika ya Handeka Mbimbiliya ku Tuala ha ku Tundisa Mazimo?” cili mu mutamba “Konkenuho” ua mu cilongesa cino.
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
