Yesu ua longesele vandongesi veni kati va pue “vakua mavu.” (Yoano 15:19) Eci ca lomboloka kati ku lihaka mu via mavu, ci pue mu pulitika ni ndzita. Vunoni ku handeka vusunga, vintsimbu vimo ce ku pua ca cikalu ku hona ku lihaka mu via mavu. Kaha naua vantu ve ku tu tsopa omo lia ku lingamo. Vati tu hasa ku viana via mavu na ku kakatela kuli Yehova Njambi?

1. Vati Vakua Kilistu va vusunga ve ku muenamo vanguvulu va hano ha mavu?

Vakua Kilistu va singimika vanguvulu. Kaha ve ku linga ngue mua handekele Yesu ngueni: “Hanenu Sezale viuma via Sezale, na Njambi viuma via Njambi”—eci ca lomboloka ku ononoka masiko a cifuti, ngeci mua ku fueta lisimu na akuavo. (Mako 12:17) Mbimbiliya ya longesa ngecize vanguvulu va vantu, ve ku sika lika muomu Yehova ua va tavesa. (Loma 13:1) Ngeci tua nongonona ngecize vanguvulu ka va kele na mpoko ku hiana Njambi. Muomu ikeye lika a hasa ku manusula visoti viose via vantu, ku hitila mu Vuangana vueni vua muilu.

2. Vati tu hasa ku muesa ngecize ka tue ku lihaka mu via mavu?

Ngeci mua Yesu, ka tue ku lihaka mu via pulitika. Tangua limo, vantu va muene cikomoueso ca kama ca lingile Yesu kaha va tondele ku mu puisa muangana, vunoni ka tavele. (Yoano 6:15) Omo lia vika? Muomu mu nima ya ntsimbu ua handekele ngueni: “Vuangana vuange kati vua hano ha mavu.” (Yoano 18:36) Netu vandongesi veni tue ku muesa ngecize ka tue ku lihaka mu via mavu mu vinjila via ku liseza-seza. Ca ku muenako, ka tue ku ya ku ndzita. (Tandenu Mika 4:3.) Cikuavo naua, vutuhu tua singimika vitantekeyeso via cifuti ngeci mua pandela, vunoni ka tue ku vi meneka, muomu ku lingamo capua vene ngue ku vi lemesa. (1 Yoano 5:21) Kaha ka tue ku hakuila ni ku luisa vikota via pulitika cipue vantuamena vavio. Mu vinjila evi na vikuavo tue ku muesa ngecize tue ku hakuila mu vutuntu Vuangana vua Njambi.

 TANTEKEYENU VIKUAVO

3. Vakua Kilistu va vusunga ka ve ku lihaka mu via mavu

Yesu na vandongesi veni va tu sila lungano. Tandenu Loma 13:1, 5-7 na 1 Petulu 2:13, 14. Kaha, talenu VIDEO na ku simutuila ha vihula vi na hatako.

• Omo lia vika tua pande ku singimika vakua nguvulu?

• Mu vinjila vika tue ku muesa ngecize tue ku vononoka?

Nga kumo ku cifuti ku na katuka ndzita, vimo vifuti vie ku muesa ngecize ka via lihakele mu ndzita yaco, vunoni ye ku kuasa ize mitamba ivali ye ku lua. Vika via lomboloka mpundu ku hona ku lihaka mu via mavu? Tandenu Yoano 17:16. Kaha, talenu VIDEO na ku simutuila ha cihula ci na hatako.

• Vika ca lomboloka ku hona ku lihaka mu via mavu?

Vika tua pande ku linga nga vanguvulu va tu sindiya ku linga viuma vie ku liluisa na masiko a Njambi? Tandenu Vilinga 5:28, 29. Kaha, talenu VIDEO na ku simutuila ha vihula vi na hatako.

• Nga masiko a vantu ali na ku liluisa na masiko a Njambi, masiko eya tua pande ku ononokaho?

• Mu ku mona cenu ha vintsimbu vika Vakua Kilistu va hasa ku viana ku ononoka nguvulu?

 4. Kati mu lihake mu via mavu cipue mu visinganieka ni mu vilinga

Tandenu 1 Yoano 5:21. Kaha, talenu VIDEO na ku simutuila ha vihula via na hatako.

• Mu video, omo lia vika Ayenge ka tavele ku hakuila cikota ca pulitika, ni ku lihaka mu viuma vi ce ku linga cifuti ngeci mua ku meneka pandela?

• Mu ku mona cenu vuno ua lingile cihangula ca mana ni?

Viuma vikuavo vika vi hasa ku tu kovelesa mu ceseko ca ku lihaka mu via mavu? Talenu VIDEO, na ku simutuila ha vihula vi na hatako.

• Vati tu hasa ku viana ku lihaka mu via mavu ku tuala ha vueho vua mu vifuti?

• Vati tu hasa ku viana ku lihaka mu via mavu ambe nga vi hangula via vakua pulitika netu vi na tu kuata?

• Ndzili ika vakua mizimbu ni vavusamba va hasa ku kala nayo hali yetu ku tuala ku via ku lihaka mu via mavu?

 VI MU NA LILONGESA

Vakua Kilistu ve ku lihakela kapandi ka ku viana ku lihaka mu via pulitika mu visinganieka, mu mezi na mu vilinga.

Mpupulule

• Vika tua tondeka ku hana kuli vamiangana va mavu?

• Omo lia vika ka tue ku lihakela mu via pulitika?

• Ha vintsimbu vika tu hasa ku hita mu ceseko ca ku lihaka mu via mavu?