CILONGESA 47
Mua Liviukisila ku mi Mbatiza Ni?
Mua lilongesa via vingi ku tuala hali Yehova ku hitila mu cilongesa cenu ca Mbimbiliya. Kaha citava mu na alulula vimo mu muono, linga mu ononoke vize vi mu na lilongesa. Vunoni halumo kuli vimo vili na ku mi vindika ku lihana kuli Yehova na ku mi mbatiza. Cilongesa cino ci lombolola vimo vitanga vie ku imika vavengi nga va tonda ku va mbatiza, na vati mu hasa ku vi vula.
1. Vusunga vua ku pua kulihi mua pande ku tantekeya linga va mi mbatize?
Linga va mi mbatize, mua pande “ku tantekeya vusunga.” (1 Timoteo 2:4) Vunoni eci ka ca lombolokele ngecize mua pande ku tantekeya viose vi ya longesa Mbimbiliya mu vutuntu, amba va mi mbatize. Muomu ci pue vene Vakua Kilistu va va mbatiza laza, kasi ve ku tualelelaho ku lilongesa. (Kolose 1:9, 10) Vutuhu ngoco, mua pande ku ivuisisa vilongesa via ku puamo via mu Mbimbiliya. Kaha vakuluntu mu cikungulukilo, va ka mi kuasa ku tantekeya nga vusunga vu mu tantekeya vu na pumo ni kanda.
2. Tumbulenu vimo vinanga vi mua pande ku puisamo ntsimbu kanda va mi mbatize?
Ntsimbu kanda va mi mbatize, mua pande ‘ku aluluka na ku hiluka.’ (Tandenu Vilinga 3:19.) Eci ca lomboloka ku liveya mua kama vipi vi mua lingile laza na ku vundila Yehova a mi ecele. Cikuavo naua, mua pande ku simpa mu ku viana vilinga via ku vihia na ku lihakela kapandi ka ku yoya mu njila yaya Njambi ku mutima. Kaha mua pande naua ku putuka ku kunguluka na ku ambulula hamo na cikungulukilo, mu ku pua mukua ku ambulula ua ku hona ku mbatiza.
3. Omo lia vika ka mua pandele ku tavesa liova li mi kuike?
Vamo ve ku ivua liova nguavo halumo ka va ka hasa ku puisamo vi va likuminia kuli Yehova. Vintsimbu vimo mu ka sevuka vene, ngue mu va lingile vamala na vampuevo va lutsilielo va va tumbula mu Mbimbiliya. Vunoni vulukenu ngecize Yehova ka lavelelele vangamba veni vapue va ku tantuluka. (Tandenu Visamo 103:13, 14.) Vunoni ua tonda mu mu pangele na mutima uenu uose. Neni naua aka mi kuasa. Ngeci mukemuo, ua tu kulahesa ngueni na vimo viahi vi “hasa ku tu hangununa ku cilemo [ceni].”—Tandenu Loma 8:38, 39.
TANTEKEYENU VIKUAVO
Talenu vati mu hasa ku vula viuma vie ku mi vindika ku mi mbatiza, mu ku tantekeya vuino Yehova na ku tava vukuasi vueni.
4. Tantekeyenu vuino Yehova
Viuma vingahi mua pande ku tantekeya ku tuala hali Yehova amba va mi mbatize? Mua pande ku tantekeya vize vi puamo mu ku ivua cizango ca ku mu lema na ku mu pangela. Talenu VIDEOmu mone vati vakua ku lilongesa Mbimbiliya mu mavu ose va lingamo. Kaha simutuilenu ha cihula ci na hatako.
-
Mu video, vika via kuasele vamo vandongesi ku liviukisila via mbatizimu?
Tandenu Loma 12:2, kaha simutuilenu ha vihula evi:
-
Vuno kuli vimo vilongesa via Mbimbiliya ka via mi tavulukile vuino ni? Vuno mue ku takania nga Vakaleho va Yehova ve ku longesa mpundu vusunga ni?
-
Nga mukemuo, vika mu hasa ku linga ku tuala hali evi?
5. Vulenu viuma vi hasa ku mi vindika ku mi mbatiza
Tu vose, tue ku liuana na vitanga mu ku lihana kuli Yehova na ku tu mbatiza. Linga mu mone cimo cimueso, talenu VIDEO, kaha simutuilenu ha vihula vi na hatako.
-
Mu video, vioua vika ua pandele ku vula Narangerel linga a hase ku pangela Yehova?
-
Vati ku lema Yehova ca ku mu kuasele ku vula vioua viaco?
Tandenu Visimo 29:25 na 2 Timoteo 1:7, kaha simutuilenu ha cihula eci:
-
Vika vie ku tu hana ku simpa ci tua tondeka linga tu vule vioua?
6. Kulahelenu mu vukuasi vua Yehova
Yehova a ka mi kuasa ku muya ku mutima. Talenu VIDEO, kaha simutuilenu ha vihula vi na hatako.
-
Mu video, omo lia vika ndongesi ua Mbimbiliya ua kele na ku likanuuila ku mu mbatiza?
-
Vika ua lilongesele vize via mu kuasele ku kaniamesa lukulahelo lueni muli Yehova?
Tandenu Isaya 41:10, 13, kaha simutuilenu ha cihula eci:
-
Omo lia vika mua pande ku kala na vusunga ngecize mu hasa ku puisamo viuma vi mu ka likuminia ha ku lihana?
7. Vuezenu ku ku santsela cenu ku cilemo ca Yehova
Nga mu singanieka cikuma ha vukama vua cilemo ca mi muesa Yehova na cizango cenu ca ku mu santsela na ku mu pangela ku miaka yose ci ka livuezelela. Tandenu Visamo 40:5, kaha simutuilenu ha cihula eci:
-
Vivezikiso vika via Yehova mue ku santsela cikuma?
Kapolofeto Yelemiya ua lemene Yehova, na Lizi lieni kaha ua hakele seho ya kama ku civezikiso ca ku hakuila lizina lia Yehova. Ua handekele ngueni: “Mezi ove a puile ndzolela kuli ange na ku-viukilila ca mutima uange: Muomu va na nji luku lizina liove, A Yehova.” (Yelemiya 15:16) Kumbululenu vihula evi:
-
Omo lia vika ku pua Mukaleho ua Yehova ca pua civezikiso ca ku lifuila?
-
Mu tonda ku mi mbatiza mu pue Mukaleho ua Yehova ni?
-
Kuli vimo vili na ku mi vindika ku lingamo ni?
-
Mu ku mona cenu vika mua pande ku linga mangana mu puisemo via tondeka mu ku mi mbatiza?
VAMO VE KU HANDEKA NGUAVO: “Yange nji mona, via ku pua Mukua Kilistu ua ku mbatiza ka nji vi hasa.”
-
Nenu mukemuo mu mue ku livua ni?
VI MU NA LILONGESA
Na vukuasi vua Yehova, mu hasa ku vula viose vie ku mi vindika ku heta ku mbatizimu.
Mpupulule
-
Vingahi mua pande ku tantekeya mu Mbimbiliya linga va mi mbatize?
-
Viuma vika halumo mu hasa ku alulula mu muono linga va mi mbatize?
-
Omo lia vika ka mua pandele ku tavesa liova li mi kuike?
KONKENUHO
Hilulenu vika via pande ku pua luvula luenu lua ku mi mbatiza.
“Mua Liviukisila Linga va ka mi Mbatize Ni?” (Vutala vua Kaniungi, Março ya 2020)
Tantekeyenu mua ku vulila vimo vioua vi hasa ku mi kuika.
“Vika Vili na ku nji Vindika ku nji Mbatiza?” (Vutala vua Kaniungi, Março ya 2019)
Talenu vati umo yala ua hasele ku vula vioua via kama linga va mu mbatize.
Ha katete, umo yala ua lizina Ataa ua likanuuelele ku mu mbatiza. Talenu vika via mu kaniamesele ku puisamo eci cinanga ca seho.
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
