CILONGESA 53
Hangulenu Vueho vue ku ya Yehova ku Mutima
Yehova ua pua ‘Njambi ua ndzolela.’ (1 Timoteo 1:11) Kaha ua tonda netu tu yoye mu ndzolela. Ce ku muya ku mutima nga a tu mona tu nonako imo ntsimbu ku vipanga vietu linga tu huime na ku livuisa ndzolela. Mu cilongesa cino tu mona vati tu hasa ku pangesa eyi ntsimbu yaco mu vinjila vi tu vuisa ndzolela na kuya Yehova ku mutima.
1. Vika tua pande ku vuluka omo tu hangula vueho?
Vika mua lema ku linga ha vintsimbu vi mue ku kala ngoco? Vamo va lema ku kala lika ha ndzivo mu ku halakana miaso, ku tanda, ku tala imo filme ni ku linga vimo mu internete. Vakuavo co, va lema ku linga vimo na vavusamba, ngeci mua: kuya na kuenda, kuya ku ndonga, kaha na ku linga vueho vua ku liseza-seza. Vunoni viose-ovio vi tua lema ku linga, tua pande ku linga cose mangana vi litombole na vize via “lema Muangana.” (Efeso 5:10) Ca pua ca seho ku ivuisisa vuino eci cimpande, muomu cingi ca vueho vu ve ku linga vantu va vengi matangua ano, vue ku muesa viuma via zinda Yehova ngeci mua vukenia, vupangala, ni vulozi. (Tandenu Visamo 11:5.) Vika vi hasa ku tu kuasa ku linga vihangula via mana ku tuala ha vueho?
Nga tu hangula vavusamba va lema Yehova, va hasa ku tu kuasa ku pua vantu va cili, na ku hangula vueho vua cili. Muomu ngue mu tua lilongesele mu cilongesa ci na hiti, nga tu ‘liendela na vakua mangana, kaha tu ka pua vakua mangana.’ Vunoni nga tu likata na vaze ka va lemene vitume via Njambi, tu “ka ci yandela.”—Visimo 13:20.
2. Vika ca puila ca seho ku haka nginga ku ntsimbu i tue ku pangesa ku vueho?
Ambe nga vueho vu tue ku hangula ka vua kele na citanga ku meso a Yehova, vunoni tua pande ku zangama linga kati tu vihisileko ntsimbu ya kama. Kati ngoco, ka tu ka kala na ntsimbu ya ku puamo ya ku linga viuma via seho. Mbimbiliya ya tu kaniamesa ‘ku lilandela ntsimbu,’ ni nguetu ku pangesa vuino ntsimbu yetu.—Tandenu Efeso 5:15, 16.
TANTEKEYENU VIKUAVO
Tantekeyenu mua ku lingila vihangula via cili ku tuala ha vueho.
3. Liniungenu ku vueho vua ku vihia
Omo lia vika tua pande ku hangula vuino vueho vuetu? Talenu VIDEO, kaha simutuilenu ha cihula ci na hatako.
-
Vati vueho vu va lingile vakua Loma ku laza, vua lifua na vumo vua matangua ano?
-
Mu video, vika ua lilongesele Danny ku tuala ha vueho?
Tandenu Loma 12:9, kaha simutuilenu ha cihula eci:
-
Vati eci cinimbu ca pande ku kuata ku vueho vu tue ku hangula?
Tumbulenu vimo viuma via zinda Yehova. Tandenu Visimo 6:16, 17 na Ngalata 5:19-21. Mu nima ya ku tanda nkala mukanda simutuilenu ha cihula eci:
-
Viuma vika vi va tumbula mu vinimbu evi via lana mu vueho vua matangua ano?
Mua ku hanguila vueho na mana
Lihulenu nguenu:
-
Vueho vuka? Vuno mua kala vimo via zinda Yehova ni?
-
Ntsimbu ingahi? Vuno vu ka nji lia ntsimbu ya ku linga viuma via seho ni?
-
Veya ve ku vu linga? Vuno vu ka nji lingisa ku likata na vantu ka va lemene Yehova ni?
Ca pua ca cili ku kala ku laako na vusonde. Ngeci mukemuo, ca pua ca cili ku kala ku laako na nkala vueho vu tu mona ngecize kuli vumo vusonde
4. Pangesenu ntsimbu yenu na mana
Talenu VIDEO, kaha simutuilenu ha cihula ci na hatako.
-
Vutuhu muanetu u va tumbula mu video ka kele na ku tala viuma via ku vihia, vati viuma viaco via kuatele ku ntsimbu yeni?
Tandenu Filipu 1:10, kaha simutuilenu ha cihula eci:
-
Vati eci cinimbu ci hasa ku tu kuasa ku hangula ntsimbu ingahi tu pangesa ku vueho?
5. Hangulenu vueho vua cili
Vutuhu vumo vueho ka vue ku ya Yehova ku mutima, vunoni kua kala vueho vukuavo vua vuingi vuze vue ku muya ku mutima. Tandenu Ekelesiaste 8:15 na Filipu 4:8, kaha simutuilenu ha cihula ci na hatako:
-
Vueho vuka vua cili mua lema?
Kua kala vueho vua cili vua vuingi kaha vu hasa ku tuya ku mutima
VAMO VE KU HANDEKA NGUAVO: “Ku tala vueho vua vukenia, vupangala, ni vulozi ka ca puile citanga, muomu ku tala lika ka nji ka vi lingi.”
-
Vika mu handekaho?
VI MU NA LILONGESA
Yehova ua tonda tu hangule vueho vua cili vuze vu tu vuisa ndzolela.
Mpupulule
-
Vueho vuka va pande ku viana Vakua Kilistu?
-
Omo lia vika tua pande ku zangama ku tuala ha ntsimbu i tue ku pangesa ku vueho?
-
Omo lia vika mua pande ku lihakela kapandi ka ku hangula vueho vue ku ya Yehova ku mutima?
KONKENUHO
Tantekeyenu iya ua kala na kapandi ka ku tu hanguila vueho.
“Vuno Vakaleho va Yehova ve ku Vindika Vimo Vifilme, Mavulu na Miaso Ni?” (Cimpande ca mu saiti)
Talenu vati mu hasa ku linga vihangula via cili ku tuala ha vueho na ku linona vuli.
“A sua recreação é benéfica?” (A Sentinela, 15 de Outubro, 2011)
Mu muzimbu “Nja Vulile Vene na Kahangu,” talenu vika via lingisile umo yala ku alulula cifua ca vueho vueni.
Mbimbiliya ye ku Alulula Miono ya Vantu” (Vutala vua Kaniungi, 1 ya Fevereiro, 2010, mu putu)
Talenu vati umo cisemi ua mpuevo a linga cihangula ca cili ku tuala ha vueho vua likuata na mahamba.
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
