CILONGESA 58
Tualelenuho ku Kakatela Kuli Yehova
Vakua Kilistu va vusunga ve ku linga cose, mangana na umo uahi ni na vimo viahi, vi va vindike ku pangela Yehova. Kaha tuli na vusunga nguetu nenu mukemuo mu mue ku livua. Yehova ua haka seho ya kama ku lukakatela luenu. (Tandenu 1 Mizimbu 28:9.) Viuma vika vi hasa ku eseka lukakatela luenu kuli Yehova, kaha vati mu hasa ku vi vula?
1. Vati vakuenu va hasa ku eseka lukakatela luenu kuli Yehova?
Vamo vantu va keseka ku tu vindika ku pangela Yehova. Veya honi ovo va hasa ku linga vupi vua kama ngoco? Vamo va pua vakua ku alulukila vusunga. Ava vantu vaco ve ku seza vusunga na ku putuka ku vangeya lukungulukilo lua Yehova linga va nongese lutsilielo luetu. Vakuavo va pua vakuluntu va malombelo. Kaha ve ku sanduola makuli ku tuala hali yetu, linga va tanganese vaze va kala ku ndzimba, va seze vusunga. Ca pua vusonde vua kama ku lihoya na vantu vaco, ku tanda mikanda, viblog, visaiti ni ku tala vivideo viavo. Ku tuala hali vaze ve ku zeyesa vakuavo linga va likele ku pangela Yehova, Yesu ua handekele ngueni: “Va sezenu; va na pu vantuamalutue va ku puputiya. Kaha nga kapuputa a tuamenena kapuputa, vose vavali va ka uila mu cina.”—Mateo 15:14.
2. Vati vihangula vietu vi hasa ku eseka lukakatela luetu kuli Yehova?
Ku lema Yehova ce ku tu lingisa tu viane nkala viuma vi tu lingisa ku likata na vulombelo vua makuli. Na vimo viahi via pande ku tu lingisa ku likata na vulombelo vua makuli, cipue vipanga, vivunga vi tua kundama ni nkala viuma vieka. Yehova ua tu lungula ngueni: “Tuhukenu [mu Mbambilone ya Kama], vantu vange.”—Ku-Solola 18:2, 4.
TANTEKEYENU VIKUAVO
Tantekeyenu vati mu hasa ku linga, mangana na umo uahi a zeyese lukakatela luenu kuli Yehova. Talenu naua vati mu hasa ku muesa lukakatela mu ku tunda mu Mbambilone ya Kama.
3. Zangamenu na valongisi va makuli
Vati tua pande ku linga nga tu ivua mizimbu ya ku vihia ku tuala ha lukungulukilo lua Yehova? Tandenu Visimo 14:15, kaha simutuilenu ha cihula eci:
-
Omo lia vika ka tua pandele ku tsiliela viose vi tue ku ivua?
Tandenu 2 Yoano 9-11, kaha simutuilenu ha vihula evi:
-
Vati tua pande ku muenamo vakua ku alulukila vusunga?
-
Ambe nga ka tua likatele mpundu na vakua ku alulukila vusunga, vati tu hasa ku tulukua vilongesa viavo?
-
Mu ku mona cenu, vati a hasa ku livua Yehova, nga a tu mona tu halakana ku mizimbu ya ku vihia, ku tuala hali ikeye ni lukungulukilo lueni?
4. Tualelenuho ku kakatela kuli Njambi nga umo muanetu a vulumuna
Nga tu tantekeya ngecize umo muanetu na lingi vupi vua kama, kapandi kaka tue ku kala nako? Talenu citume ci tu hasa ku uana ku limo lisiko lia hele Njambi ku vaIsaleli. Tandenu Levitiku 5:1.
Ngue mu ca muesa eci cinimbu nga tu nongonona ngecize umo muanetu na lingi vupi vua kama, tua pande ku leka vakuluntu. Vunoni ntsimbu kanda tu lingemo, ci ka pua ku muesa cilemo ku kaniamesa muanetu uaco aye ikeye ivene ku vakuluntu. Nga ka lingimo, lukakatela luetu kuli Yehova lua pande ku tu lingisa tu ka leke vakuluntu. Vati ku lingamo ce ku muesa lukakatela luenu . . .
-
kuli Yehova Njambi?
-
kuli muntu na vulumuna?
-
kuli vamuanetu mu cikungulukilo?
Nga umo muanetu ali mu visoti, mu kuasenu!
5. Tundenu mu vutuntu mu Mbambilone ya Kama
Tandenu Luka 4:8 na Ku-Solola 18:4, 5, kaha simutuilenu ha vihula evi:
-
Vuno nja litundisa mu vutuntu ku vulombelo vua makuli ku nja kele ni?
-
Vuno nja kundama ku cimo civunga ca likuata na vumo vulombelo ni?
-
Vuno vipanga vi nje ku linga vie ku kuasa cipue kamandende vulombelo vua makuli ni?
-
Vuno kasi kuli vinjila vikuavo naua vi nja pande ku litepelamo na vulombelo vua makuli ni?
-
Nga nja tava cimo cevi vihula, vati nji hasa ku sungamesa citanga caco?
Mu vinjila viose evi, lingenu cihangula cize ka ci ka mi sila citaku-taku kaha naua ci ka muesa lukakatela luenu kuli Yehova.
Vati mu linga nga va mi vundila ku hana vuana ku vumo vulombelo vuli na ku linga cimo cipanga ca ku kuasa vantu muimbo?
VAMO VE KU HANDEKA NGUAVO: “Nja pande ku tantekeya vi ve ku handeka vakua ku luisa vusunga ku tuala ha Vakaleho va Yehova, linga nji hase ku hakuila vusunga.”
-
Vuno ku lingamo ci ka pua ku muesa mana ni? Nga eyo, omo lia vika, nga naua houe, omo lia vika?
VI MU NA LILONGESA
Linga tu tualeleleho ku kakatela kuli Yehova, tua pande ku viana ku likata na vaze ve ku tonda ku tu hungumuisa.
Mpupulule
-
Omo lia vika ka tua pandele ku tala, ku tanda, ni ku halakana ku mizimbu ya vakua ku luisa vusunga?
-
Nga tu nongonona ngecize umo muanetu ni ndumbuetu na lingi vupi vua kama, vika tua pande ku linga?
-
Vati tu hasa ku ononoka cilungula ca ku tina ku vulombelo vua makuli?
KONKENUHO
Tantekeyenu mua ku lingila nga vantu va sanduola mizimbu ya makuli ku tuala ha Vakaleho va Yehova.
“Muli na Vusunga Vuaco Ni?” (Vutala vua Kaniungi, Agosto ya 2018)
Vati mu hasa ku nongonona vivunga ni vipanga vie ku kuasa Mbambilone ya Kama?
Vika ve ku seteka ku linga vamo vakua ku tu luisa mangana va zeyese lutsilielo luetu?
Mu Muzimbu “Nje ku Tonda Njambi Tunde ku Vunike,” tantekeyenu vati umo sasendote ua mu vulombelo vua Shinto ua lizituile ku vulombelo vuaco vua makuli.
“Mbimbiliya ye ku Alulula Miono ya Vantu” (Vutala vua Kaniungi, 1 ya Julho, 2011, mu putu)
Halumo mu Hasa ku Lema Naua Evi
VIHULA VI VE KU LINGA CIKUMA VANTU
Vika via pua Cilongesa ca Mbimbiliya?
Uanenu vikumbululo ku tuala ha vilongesa vietu via Mbimbiliya via vuana.
