Kuhitila Muli Luka 22:1-71
-
Vasasendote va likuminya kutsiha Yesu (1-6)
-
Kuviukisa Paskua ya ku manusuila (7-13)
-
Ku tumbika Mualelo ua Muangana (14-20)
-
“Uze aka njenda vungungu ali nange ku mesa” (21-23)
-
Kulihoya kutuala hali iya ua kama (24-27)
-
Litavasiano lia Yesu lia vuangana (28-30)
-
Yesu aleka Petulu nguendi aka mu viana (31-34)
-
Seho ya ku liviukisila; mikuale ivali (35-38)
-
Civundilo ca Yesu ha Muncinda ua Olivela (39-46)
-
Yesu va mu kuata (47-53)
-
Petulu a viana Yesu (54-62)
-
Yesu va mu tsopa (63-65)
-
Va mu sompesa mu Mpunga (66-71)
22 Kaha Cilika ca Mbolo ya ku Hona Cimbaluila, ci vasana nguavo Paskua, ca kele mu hiehi.
2 Vakuluntu va vasasendote na vakua kusoneka, vakele na kutonda njila ya ku kuatelamo Yesu naku mu tsiha muomu vakele na liova lia vantu.
3 Kaha Satana ua kovelele muli Yundasa uve kusana naua nguavo Iskaliota, umo ua vaze 12.
4 Ngeci Yundasa ua ka simutuilile na vakuluntu va vasasendote na tupitau va mu tembele, kutuala ha vati ue kuendele Yesu vungungu naku va hanaye.
5 Mu vavuile ngoco, va viukilile mua kama ngeci va litavasianene ku mu hana vimbongo via palata.
6 Yundasa ua tavele, ngeci ua putukile kutonda vukovelelo vua cili vua ku va hanaye, ha ntsimbu ya kulinga mbunga yahi.
7 Kaha litangua lia ku livanga lia Cilika ca Mbolo ya ku Hona Cimbaluila lia hetele, litangua lize li vakele naku kombeleya cimuna ua Paskua.
8 Ngeci Yesu ua tumine Petulu na Yoano nguendi: “Yenu mu ka tu vuahesele Paskua linga tu kalie.”
9 Va muihuile nguavo: “Utonda tu ka iviukisile kuli?”
10 Uava lekele nguendi: “Halakanenu, omo mu ka kovela mu mbonge, mu kaliuana na umo yala nambata njava ya mema. Yenu muka mukave na mu ndzivo ya ka kovela.
11 Kaha mu ka leka vavene ndzivo nguenu, ‘Mulongisi na tutumu nguendi: “Hondo ya vangendzi mu nji hasa ku lila Paskua na vandongesi vange ili kuli?”’
12 Uze yala aka mi lekesa hondo ya kama ya helu iva na viukisa laza. Mukemuo mu muka vuahesela Paskua.”
13 Kaha vaile vaka uanene viose ngue mua va lekele Yesu, ngeci va viukisile Paskua.
14 Kaha ntsimbu ya hetele, Yesu ua tumamene ku mesa na vapostolo vendi.
15 Ngeci uava lekele nguendi: “Nji na tondele mua kama kulia nenu ino Paskua, ntsimbu kanda nji yande.
16 Muomu nji mi leka nguange, ka nji ka ili naua noho viose via lipuisamo mu Vuangana vua Njambi.”
17 Ngeci Yesu ua tambuile ngandza, ua vundilile naku handeka nguendi: “Uahenu eyi ngandza, lisumuinenu.
18 Muomu nji mi leka nguange kutunda hano, ka nji kanu naua ku vusuka vua vinyu noho Vuangana vua Njambi vuneza.”
19 Kaha ua nonele naua mbolo, ua vundilile, ua ipazuile naku va hanayo nguendi: “Eyi mbolo yemanena muvila uange, uze uva ka hana omo lienu. Tualelenuho ku lingamo mu ku nji vulukilaho.”
20 Ua lingilemo naua naku ngandza mu nima ya kulia. Nguendi: “Eyi ngandza yemanena litavasiano lia liha lize li kalako omo lia maninga ange, aze ava ka muanya omo lienu.
21 “Vunoni halakanenu! uze aka njenda vungungu ali nange ku mesa.
22 Cili vene, Muana muntu ali na kuya ngue mu va vi tumbikilile. Vunoni ngongo ya muntu uze a muenda vungungu!”
23 Ngeci vapostolo va putukile ku simutuila hakati kavo nga iya mpundu ueku vi lingile.
24 Vunoni va putukile ku lihoya mua kama hakati kavo linga va tantekeye iya ua kama.
25 Kaha Yesu uava lekele nguendi: “Vamiangana va mavu ve ku zangamena vantu vave kusika, kaha vaze vakala na mpoko hali vakua mavu, ve ku va sana nguavo Vakua Kukuasa.
26 Vunoni yenu ka mua pandele kufua ngoco. Kaha uose ua kama hakati kenu, na pande kupua ngue kanike ua mundende, na uze a tuamenena na pande kupua ngue mukua ku pangela.
27 Muomu iya ua kama? Uze ali na kulia ni uze ali naku mu pangela? Kati uze ali na kulia,* ni vati? Vunoni yange njili hakati kenu ngue mukua ku pangela.
28 “Vutuhu ngoco, yenu mu na kala nange mu vieseko viange.
29 Ngeci mukemuo, nji linga nenu litavasiano lia vuangana, ngue muze Tata na lingi nange litavasiano lia vuangana,
30 linga mu kalie na kunua ku mesa yange mu Vuangana vuange kaha naku ka tumama ha vituamo via vuangana mu ku sompela miyati 12 ya Isaleli.
31 “Simone, Simone, halakana! Satana atonda ku mi leleka mu vose ngue tiliku.
32 Vunoni nja lambelela mua kama kuli Njambi linga lutsilielo luove kati luzeye. Kaha omo uka hiluka, ua ku kaniamese vamuanoko.”
33 Ngeci Petulu ua mu lekele nguendi: “Muangana, nji na liviukisila laza kuya nove ambe mu kamenga ni kutsa nove.”
34 Vunoni Yesu ua mu lekele nguendi: “Petulu, nji ku leka nguange, lelo vene ntsimbu ndemba kanda a tambeke, unji viana lutatu nguove ka unji tantekeya.”
35 Uava lekele naua ngueni: “Muze mu nja mi tumine nguange kati muye na kacipete ka vimbongo ni cipete ca viakulia, ambe vinkaku, vuno kuli vimo via mi kambelele* ni?” Va kumbuluile nguavo: “Houe!”
36 Ngeci Yesu uava lekele nguendi: “Vunoni hano, uose ali na kacipete ka vimbongo ambate, na uze ali na cipete ca viakulia nendi ambate. Kaha uose kesi na mukuale, a landese cikovelo cendi ca helu, linga a lande umo mukuale.
37 Muomu nji mileka nguange, vize viva sonekele kutuala hali yange nguavo, ‘Vaka mu tandela hamo na vakua ku pokola masiko,’ vi na pande ku lipuisamo. Eyo, evi viuma vili naku lipuisamo hali yange.”
38 Kaha va mu lekele nguavo: “Muangana, tala! tuli na mikuale ivali.” Ngeci uava kumbuluile nguendi: “Inapumo.”
39 Kaha mua tuhukile, uaile ku Muncinda ua Olivela ngue ku kalingo-lingo kendi. Na vandongesi vendi va mu kavele.
40 Mu vaka hetele kuze, Yesu uava lekele nguendi: “Tualelenuho kuvundila linga kati mu kovele mu ceseko.”
41 Kaha uava sondolokele kavundende ha ntunda ya kulinga citava kuasaho livue, ngeci ua tsikamene na kuputuka kuvundila,
42 nguendi: “Tata, nga ua zange, tundisa eyi ngandza kuli yange. Vutuhu ngoco, kati ngue munayi cizango cange, vunoni ci lingiue cizango cove.”
43 Ngeci umo kangelo ua muilu ua mu solokelele kaha ua mu kaniamesele.
44 Vunoni Yesu ua lisosomuene mua kama ngeci ua tualeleho kuvundila cikuma. Kaha ntuima yendi yapuile ngue maninga akele naku nduekela ha mavu.
45 Mua manusuile kuvundila, ua katukile na kuya kuli vandongesi vendi vunoni uava uanene va na kosa muomu va honene na vusiua.
46 Uava lekele nguendi: “Vika mua kosela? Hindukenu kaha tualelenuho kuvundila linga kati mu kovele mu ceseko.”
47 Tele acili naku handeka, kuezile civunga ca kama ca vantu, kaha talenu! Umo yala lizina liendi Yundasa, umo ua vaze 12 ikeye uakele naku va tuamenena, kaha ua suenene kuli Yesu linga amu tsembe.
48 Vunoni Yesu ua muihuile nguendi: “Yundasa, uenda Muana muntu vungungu mu ku mu tsemba?”
49 Vaze vakele hamo na Yesu mu va muene viakele na kusoloka, va muihuile nguavo: “Muangana, tu va luise na mukuale?”
50 Ngeci umo uavo ua vatuile lituitui lia cilio lia ngamba ya sasendote ua kama.
51 Vunoni Yesu ua handekele nguendi: “Kunahu.” Ngeci ua kuatele ku lituitui lia uze ngamba naku mu kanguisa.
52 Kaha Yesu ua lekele vakuluntu va vasasendote na tupitau va mu tembele kaha na vakuluntu, vaze vezile mu ku mu kuata nguendi: “Vika mu nezila na mikuale na vimbueti ngue mu neza mu kukuata muizi?
53 Tangua na tangua njakele nenu mu tembele vunoni ka mua nji salekele mavoko. Vunoni ino ikeyo ola yenu na ya ngolo ya milima.”
54 Kaha va mu kuatele naku mu tuala ku ndzivo ya sasendote ua kama. Vunoni Petulu uakele naku mu kavela ha lahako.
55 Mu va vuekele tuhia mu citali na kutumama hamolika, Petulu nendi ua tumamene navo.
56 Vunoni umo ngamba ua mpuevo mua muene Petulu na tumama ku coto, ua mu talele sui, kaha ua handeka nguendi: “Ou yala nendi uakele na Yesu.”
57 Vunoni ikeye ua vianene nguendi: “Ove mpuevo, ka nji mu tantekeya.”
58 Mu nima ya kantsimbu ka kandende, muntu ueka ua mu muene ngeci ua handekele nguendi: “Nove vene u umo uavo.” Vunoni Petulu ua handekele nguendi: “Ove yala, kati yange.”
59 Mukua hitile kampe ola imo lika, yala mukuavo ua tualeleho ku handeka nguendi: “Cili vene, ou yala nendi nakele na Yesu muomu mukua Ngalileya!”
60 Vunoni Petulu ua handekele nguendi: “Ove yala, ka nji tantekeya viuli naku handeka.” Haze vene tele acili naku handeka, ndemba ua tambekele.
61 Ngeci Muangana ua tengulukile na kutala Petulu kaha Petulu ua vulukile mezi amu lekele Muangana nguendi: “Lelo vene, ntsimbu ndemba kanda a tambeke uka nji viana lutatu.”
62 Ngeci ua tuhukile ha mbandza, ua lilile cikumakuma.
63 Kaha vaze vamala va kutile Yesu, va putukile ku mu tsopa naku mupupa.
64 Mu nima ya ku mu kuta ntanga ha meso, vakele naku muihula nguavo: “Handeka!”* Iya naku veta?”
65 Va handekele naua viuma vikuavo viavingi via ku mu sahula.
66 Mu kua cele, civunga ca vakuluntu va vantu, na vakuluntu va vasasendote hamolika na vakua kusoneka, va likunguluile. Kaha va tualele Yesu mu Mpunga naku handeka nguavo:
67 “Nga yove u Kilistu, tuleke.” Vunoni Yesu ua va kumbuluile nguendi: “Ambe nga nji mileka, ka mu nji tava.
68 Cikuavo naua, ambe nga nji mihula vimo, ka mu nji kumbulula.
69 Vunoni tunde hano, Muana muntu aka tumama ku livoko lia cilio lia Njambi, lia ngolo.”
70 Mu vavuile ngoco, vose va muihuile nguavo: “Omo honi, u Muana Njambi ni?” Uava kumbuluile nguendi: “Yenu vavenya mua handekamo nguenu yange.”
71 Ngeci va handekele nguavo: “Vika naua tu tondela vukaleho vukuavo? Muomu tuvose tua livuila mu kanua kendi.”
