Ku Hitila Muli Mateu 11:1-30
11 Yesu mua manusuile ku hana vimamuna ku vandongesi vendi 12, ua tundile kuze na kuya mu ku longesa na kuambulula, ku membo a kele muhiehi.
2 Vunoni Yoano mua kele mu kamenga, ua vuile viuma via kele na ku linga Kilistu, ngeci ua tumine vandongesi vendi
3 vaka muhule nguavo: “Yove ivambele nguavo akeza ni tu lavelele ueka?”
4 Yesu ua va kumbuluile nguendi: “Yenu mu ka leke Yoano viuma vi muli na kuivua na kumona, nguenu:
5 Tupuputa vali na kumona, vilema vali na kuenda, vakua mbumba vali na ku va lelesa, tusindamatuitui vali na kuivua, vatsi vali na ku va sangula kaha vihutu vali na ku vambuluila muzimbu ua cili.
6 Ua vezika uze ka uana cisuntsuiso muli yange.”
7 Mu va ile vandongesi va Yoano, Yesu ua putukile ku leka mbunga ku tuala hali Yoano nguendi: “Vika mua ka muene mu mpambo? Mua ka muene lihongo lia kele na kuninganga na luhundzi ni?
8 Ni vika mua ka muene? Vuno mua ka mueneko yala na zala vuzalo vua ku viakula* ni? Vakua ku zala vuzalo vua ku viakula, va kala ku vinganda via vamiangana.
9 Ni vika mpundu mua ililileko? Mua ile mu ku mona kapolofeto ni? Cili vene nji mi leka nguange, Yoano ua hiana kapolofeto.
10 Ou ikeye uva tumbuile mu visoneka nguavo: ‘Talenu! Nji tuma kanganda kange ku lutue* luove, linga a ka ku vuahesele njila!’
11 Nji mi leka vusunga nguange, muntu* na umo uahi ua hiana Yoano mukua ku mbatiza. Vunoni uze napu ua mundende mu Vuangana vua muilu, na hiana Yoano ku vukama.
12 Tunde ku matangua a Yoano mukua ku mbatiza, ku heta na lelo lino, vantu vali na ku fuitangana na ndzili yose, va uane Vuangana vua muilu, kaha vaze vali na kupanga na ndzili yose, vali na ku vu uana.
13 Muomu Vapolofeto na Mezi a Lisiko, va a polofetele ku heta na ku ntsimbu ya Yoano.
14 Kaha nga mu tonda ku tava ovu vusunga, Yoano ikeye vene ‘Eliya ivambele nguavo akeza.’
15 Uose ali na matuitui evueko.
16 “Ou muyati nji u setekesa na vika? Unapu ngue vanike vavandende va na tumama ha citanda, vali na ku tambakana vakuavo vanike,
17 nguavo: ‘Tua mi sikilile vimbendo, vunoni ka mua kinine, tua lilile na kulinyenga, vunoni ka mua tu vuililile ngozi.’
18 Navuno vene, muezile Yoano, kalile cipue kunua, vunoni vantu nguavo: ‘Ali na ndemone.’
19 Muana muntu neza, ali na kulia na kunua, vunoni vantu nguavo: ‘Mua mu mono ou! Mukua mutupu kaha uatsa ha vinyu, kavusamba ua vakua ku fuetesa lisimu na vakua vupi.’ Vunoni, mangana eku sambua ku hitila mu vilinga viao via vuviuke.”*
20 Kaha Yesu ua putukile kupaya vaze vakele mu membo a lingilile cingi ca vipanga viendi via ku komouesa, muomu vantu vaco ka valulukile. Ua handekele nguendi:
21 “Ngongo yove, ove Kolazine! Ngongo yove, ove Mbetesainda! Muomu vipanga via ku komouesa vi va na mi lingila, nga va vilingilile vantu vaku Tile na Sindone, nga valulukile laza mu kuzala vikeleya na kutumama mu muto.
22 Vunoni nji mi leka nguange, ha Litangua lia ku Sompesa, kasitiku kenu ka kapua ka kama ku hiana ka Tile na Sindone.
23 Nenu vakua Kapenama, vuno mu singanieka nguenu va ka mituala muilu ni? Vaka mi uisila mu cihilo,* muomu vipanga via ku komouesa vi va mi lingilile, nga va vilingilile mu Sondoma, na lelo lino Sondoma nga ku ya kala.
24 Vunoni nji mileka nguange, ha Litangua lia ku Sompesa, kasitiku kenu ka kapua kakama, ku hiana kasitiku ka Sondoma.”
25 Ngeci mu ntsimbu ize vene, Yesu ua handekele nguendi: “Nji ku sangaziala ha mbunga Tata, Muangana ua melu na mavu, muomu una suekela evi viuma vakua mana na vakua ku lilongesa, vunoni una visoluela vanike vavandende.
26 Omo vene Tata, muomu mukemuo munayi cizango cove.
27 Tata na nji hana viuma viose kaha na umo uahi a tantekeya vuino Muana, kuvanga Ise. Cikuavo naua, uahi a tantekeya vuino Ise, kuvanga Muana, na uze ya tonda ku mu soluela Muana.
28 Tuayenu kuli yange, yenu vose muli na ku fuitangana cikuma na kuambata via ku lema, kaha nji ka mi huimisa.
29 Ambatenu mukambo uange na ku lilongesa kuli yange,* muomu nji ua kukonkama, cikuavo naua nji ua kulikehesa mu mutima kaha mu ka huima.
30 Muomu mukambo uange ua uasi ku uambata, na citeli cange cacehu.”
Matota
^ Ni “vuzalo vua cili.”
^ Mu ciNgelengu “ku lutue lua cihanga cove.”
^ Mu ciNgelengu “ua ku semuka ku mpuevo.”
^ Mukua vuviuke ue ku sambua, omo lia vilinga viendi via mangana.
^ Ni “Hades.” Ya lomboloka vihilo via vantu vose.—Talenu Mezi ava Lombolola.
^ Ni “puenu vandongesi vange.”
