Ku Hitila Muli Mateu 28:1-20
28 Ha litangua lia katete lia simano tele Sapalalo i na hiti, Maliya Mandalena na Maliya mukuavo, vaile mu kutala ku mbumbo.
2 Talenu! Kua hitile lindunduma kaha kangelo ua Yehova, ua sulukile muilu na ku tundisa livue ku vukovelelo vua mbumbo kaha ua tumameneho.
3 Cifua cendi, ua solokele ngue muhiato kaha vizalo viendi via puile via kutoka ngue mema a kukonda.
4 Kaha omo lia liova, vakua kunyunga mbumbo vatsile cintsima.
5 Vunoni kangelo ua lekele vampuevo nguendi: “Kati muivue liova, nji tantekeya ngecize muli na kutonda Yesu uze uva sukikile ha citi.
6 Uahiko kuno, va na mu sangula laza ngue mua handekele. Tuayenu mua ku tale ha va mu langekele.
7 Ngue mu mua limuena, yenu vuasi-vuasi mu ka leke vandongesi vendi nguenu, va na mu sangula ku vatsi! Kaha ikeye na tuama ku Ngalileya, kukekuo ku muka mu muena. Evi vikevio vi nji nezile mu ku mi leka.”
8 Kaha vuasi-vuasi va tundile ku mbumbo na liova na ndzolela, va tuntile mu ku tuala muzimbu ku vandongesi.
9 Mu va kele na kuya, Yesu ua liuanene navo kaha ua va menekele nguendi: “Mua hinduka!” Kaha va sueneneko na ku mu kuata ku viliato kaha va mu tsikamenene.
10 Yesu ua va lekele nguendi: “Kati muivue liova! Yenu mu ka leke vamuanetu linga va nji uane ku Ngalileya, kukekuo ku vaka nji muena.”
11 Kaha mu va kele mu njila, vamo vakua kunyunga vaile mu mbonge na kuambulula kuli vakuluntu va vasasendote, viuma viose vi va muene.
12 Kaha vakuluntu va vasasendote va likunguluile na vakuluntu mu ku hilulaho, ngeci va hanene vimbongo via vingi via palata ku masualale
13 nguavo: “Handekenu nguenu, ‘Vandongesi vendi vezile ku vutsiki mu ku mu punda, yetu tele tu na kosa.’
14 Kaha nga muzimbu uaco u heta kuli nguvulu, tu ka mu lomboluela vi na soloka, kati mu lisosomue.”
15 Ngeci mukemuo, va tambuile vimbongo via palata na kulinga ngue mu va va lekele. Kaha ou muzimbu uaco, ua lisanduokele muaya vaYundeya vose na ku lelo lino.
16 Vunoni vandongesi 11 vaile ku muncinda ua Ngalileya, kuze kua va sikile Yesu nguendi vaka liuaneneko.
17 Mu va mu muene va mu tsikamenene, vunoni vamo va takanyene.
18 Yesu ua va suenene na ku handeka navo nguendi: “Mpoko yose ya muilu na hano ha mavu, va na nji hanayo.
19 Ngeci mukemuo, yeni mu vifuti viose mu ka longese vantu, linga vapue vandongesi vange. Mu ka va mbatiza mu lizina lia Tata na lia Muana na lia sipilitu santu.
20 Kaha mu ka va longesa naua kuononoka viuma viose vi nja mi siki. Tantekeyenu ngecize, njili nenu matangua ose na ha kukotoka ca mavu.”*
Matota
^ Ni “ku-hua ca miaka ino.”
