Ku Hitila Muli Mateu 5:1-48
5 Kaha omo Yesu ua muene vivunga via vantu, ua kandukile ha muncinda, munima ya ku tumama, vandongesi vendi vezile kuli ikeye.
2 Ngeci ua putukile ku va longesa, nguendi:
3 “Va vezika* vaze va tantekeya ngecize va tondeka Njambi, muomu Vuangana vua muilu vunapu vuavo.
4 “Va vezika vaze vali mu vusiua, muomu vaka va lembezieka.
5 “Va vezika vakua ku likehesa,* muomu vaka suana mavu.
6 “Va vezika vaze vali na ndzala na mpuila ya vuoloke, muomu vaka kuta.
7 “Va vezika vakua cikeketima, muomu navo vaka va muesa cikeketima.
8 “Va vezika vakua mitima ya kulela, muomu vaka mona* Njambi.
9 “Va vezika vakua ku neha ciyulo, muomu vaka va tumbula nguavo vana va Njambi.
10 “Va vezika vaze va ve ku luisa omo lia vuoloke, muomu Vuangana vua muilu vunapu vuavo.
11 “Mu na vezika nga vantu va mi sahula, va mi yandesa na ku mi vangeya viuma viose via ku vihia omo liange.
12 Viukililenu na ku lisamba cikuma, muomu fueto yenu muilu inapu ya kama; vulukenu naua nguenu, ambe vapolofeto va livangele navo vava yandesele.
13 “Yenu munapu muongua ua ha mavu, vunoni nga u samuka, ndzili yauo i hasa ku hiluka vati? Kauesi naua na seho, vaka umbila kuti kaha vantu vaka u liatangela.
14 “Yenu munapu ceke ca ha mavu. Mbonge ya ku tungila ha muncinda ka ye ku lisueka.
15 Ka veku suameka ndeya na ku i fuika, vunoni veku i haka helu linga i hase ku tetekela vantu vose vali mu ndzivo.
16 Na vuno vene, ceke cenu citue ku vantu, linga vamone vilinga vienu via cili na ku hana vumpahu kuli Isuenu ua muilu.
17 “Kati mu singanieke nguenu nji neza mu ku tundisako Lisiko ni Vapolofeto, houe. Vunoni nji neza mu ku puisamo aua mezi.
18 Muomu nji mi leka vusunga nguange, ca casi lilu na mavu vihite, vunoni kakuesi lisona lia Lisiko na limo liahi li ka hita kuvanga viose vi na lipuisamo.
19 Kaha uose a pokola limo liaua masiko a andende na ku songangeya vakuavo va lingemo, ua mundende mu Vuangana vua muilu. Vunoni uze a ononoka na ku longesa vakuavo ku lingamo, aka pua ua kama mu Vuangana vua muilu.
20 Ngeci mukemuo nji mi leka nguange, vuviuke vuenu vua pande ku hiana vua vakua ku soneka na vaFaliseu, kati ngoco ka mu ka kovela mu Vuangana vua muilu.
21 “Mua vuile vi va handekele ku laza nguavo: ‘Kati uka tsihe muntu, muomu uose a tsiha* muntu, vaka mu tuala ku ndzango ya vusompelo.’
22 Vunoni ange nji mi leka nguange, uose uze a tualelelaho ku luvalela muanaye aka litavela ku ndzango ya vusompelo; kaha uose a sahula muanaye vaka mu sompesa ku Ndzango ya Kama; cikuavo naua uose a leka muanaye nguendi, ‘Ove u ciheve!’ vaka mu mbila mu Ngehena ya tuhia.*
23 Kaha nga u tuala vuana vuove ku mutula, mu ku hetako u vuluka nguove muanoko na ku luvalela,
24 seza vuana vuove ku mutula; ha katete hiluka tahi uka likonekele na muanoko, amba vuose ua ku hane vuana vuove.
25 “Manusula vuasi vimpande viuli navio na mukueni ntsimbu kanda mu hete ku ndzango, muomu halumo aka ku tuala kuli ngazi kaha ngazi aka ku hana kuli musipayi,* linga aku soke mu kamenga.
26 Nji ku leka vusunga nguange, ka vaka ku tuhulamo kuvanga una fuete kambongo* kove ka ku manusuila.
27 “Mua vuile vi va handekele nguavo: ‘Kati uka linge vukoyi.’*
28 Vunoni ange nji mi leka nguange, uose uze a tualelelaho ku tala mpuevo na ku mu vuila lisungu, na lingi laza nendi vukoyi mu mutima.
29 Ngeci mukemuo, nga liso liove lia cilio li ku sevuisa, licokovolemo na ku liumbila kuti. Cili kulutue ku zimbalesa cimo cilio ca muvila, ku tuvakana muvila uove uose vaka umbile mu Ngehena.*
30 Cikuavo naua, nga livoko liove lia cilio li ku sevuisa, livatule na ku liumbila kuti. Cili kulutue ku zimbalesa cimo cilio ca muvila, ku tuvakana muvila uove uose vaka umbile mu Ngehena.*
31 “Kaha va handekele naua nguavo: ‘Uose a kondola mpueyendi, na pande ku mu hana mukanda ua kutsiha vulo.’
32 Vunoni ange nji mi leka nguange, uose a kondola mpueyendi nga kati omo lia mulonga ua vupangala,* ali na ku mu haka mu ceseko ca ku linga vukoyi. Kaha uose ambata mpuevo uaco a linga vukoyi.
33 “Mua vuile naua vi va handekele ku laza nguavo: ‘Kati uka lisinge ca ku hona ku vi puisamo, vunoni ua pande ku linga vi ua likuminyine kuli Yehova.’
34 Vunoni ange nji mi leka nguange: Kati mu ka lisingile na vimo viahi, nambe na lilu, muomu lia pua citumamo ca Njambi ca vuangana;
35 cipue mavu, muomu apua ngue cituamo ca viliato viendi; nambe Yelusalema, muomu yapua mbonge ya Muangana ua kama.
36 Kati u lisingile ha mutue uove, muomu ka u hasa kualulula ambe cinkambu cove linga cipue ca kutoka ni ca kuzivala.
37 Nga mu handeka nguenu ‘Eyo’ ipue vene eyo, ngaco nguenu ‘Houe’ ipue vene houe, muomu viose vi mu vuezelelako via mukua vupi.
38 “Mua vuile vi va handekele nguavo: ‘Uose a tuva liso lia mukuavo, nendi va mu tuvelio, kaha uose a pukula lizo lia mukuavo, nendi va mu pukulelio.’
39 Vunoni yange nji mi leka nguange: Kati mu linguile muntu na mi vulumuina. Nga muntu aku hana mbanda ku litama lia cilio, mu hane naua litama likuavo.
40 Nga muntu aku tuala ku ndzango ya vusompelo, linga aku tambule cikovelo cove ca mukati, mu hane naua na cikovelo cove ca helu;
41 Nga mukua ku sika aku sindiya ku mu lingila cipanga ca ola imo, mu lingile ca viola vivali.
42 Nga mukuenu aku pinga vimo, mu hane, kaha kati umine uze a tonda ku kulevala.
43 “Mua vuile vi va handekele nguavo: ‘Lema mukuenu, kaha zinda citozi cove.’
44 Vunoni yange nji mi leka nguange: Tualelenuho ku lema vitozi venu, na ku kundika mu vivundilo vienu vaze va mi yandesa,
45 linga mu muese nguenu mu vana va Iso ali muilu. Muomu ikeye ue ku tuhuila litangua ku vakua vilinga via ku vihia na ku vantu va cili. Kaha ue ku nokesela niondzi kuli vakua vuviuke na vakua vuhenge.
46 Muomu nga mu lema lika vaze va mi lema, fueto ika mu ka uanaho? Nguetu na vakua ku fuetesa lisimu mukemuo mu ve ku linga!
47 Ni nga mu meneka lika vamuanoko, kuliseza cika ciliho? Nguetu na vakua vifuti mukemuo mu ve ku linga!
48 Vunoni yenu puenu va kutantuluka, ngue omo Iso ua pua ua kutantuluka.*
Matota
^ Ni “Vakua ndzolela.”
^ Ni “kukonkama.”
^ Ni “vaka tantekeya.”
^ Hano lizi kutsiha, lia lomboloka kutsiha ku cizango.
^ Ngehena ya pua lizina lia cimo cimbongo, ca kele ku mukulo ua Yelusalema ci va kele na ku tsimikila mazilo.—Talenu Mezi ava Lombolola.
^ Ni “kapaso.”
^ Mu ciNgelengu “Kuadrante ya ku manusuila.”—Talenu Mizimbu ya ku Vuezako.
^ Ni “kuenda mukua ndzivo yove vungungu.”
^ Talenu Mezi ava Lombolola.
^ Talenu Mezi ava Lombolola.
^ Mu ciNgelengu “Porneia.”—Talenu Mezi ava Lombolola.
^ Hano lizi kutantuluka, lia lomboloka ku muesa cilemo mu vutuntu.
