Vilinga Via Vapostolo 19:1-41
19 Ntsimbu Apolo ua ci kele ku Kolintu, Paulu ua hitile ku vifuti via ku ntunda na kuya ku Efesu. Kaha kuze, ua ka uaneneko vamo vandongesi,
2 ngeci ua vehuile nguendi: “Mu mualulukile na kupua vakua kutsiliela, mua tambuile sipilitu santu ni?” Kaha va mu kumbuluile nguavo: “Yetu kanda tu civueho nguavo kuakala sipilitu santu.”
3 Ngeci ua vehuile nguendi: “Amba na mbatizimu ika nkuma va mi mbatizile?” Va mu kumbuluile nguavo: “Na mbatizimu ya Yoano.”
4 Paulu uava lekele nguendi: “Mbatizimu ya Yoano yapuile lika citantekeyeso ca kualuluka ku vipi, vunoni ikeye ua lekele vantu nguendi, va tsiliele muli uze ue kuizile mu nima yendi, ikeye vene Yesu.”
5 Mu vavuile ngoco, vava mbatizile mu lizina lia Muangana Yesu.
6 Omo Paulu uava salekele mavoko, sipilitu santu yezile hali vakevo kaha va putukile ku handeka malimi eka na kupolofeta.
7 Mu ku vatanda, vamala vose va hetele ku 12.
8 Mu vingonde vitatu viose, ua kovelele mu sinangonga kaha uambuluile na kusimpa cose na kuhana vimpande naku simutuila navo via Vuangana vua Njambi mu cifua ca ku va kokueya.
9 Vunoni mu kulinga vamo ku va tavele muomu va kaluuisile mitima yavo, na kuputuka ku handeka mua kuvihia Njila ya Muangana ha mbunga, ngeci Paulu uava sile naku hangununako vandongesi. Kaha tangua na tangua ua hanene vimpande mu hondo ya viuano ya ku sikola ya Tilanu.
10 Eci ca lingikile mu miaka ivali yose, ngeci vaYundeya na vaNgelengu vose vakele mu muhato ua Asia vavuile lizi lia Muangana.
11 Njambi uakele na kulinga vikomoueso via ngolo ku hitila muli Paulu.
12 Ngeci ambe vene vintanga na malesu a pangesele Paulu, va vi tualele kuli vakua kuvavala kaha va kangukile ku misongo yavo na vasipilitu va kuzuala vava tundile.
13 Vunoni, vamo vaYundeya vaze vakele na kuendangana muaya membo mu ku tundisa vandemone, navo va setekele ku pangesa lizina lia Muangana Yesu hali vaze vakele na vasipilitu va kuzuala, mu ku handeka nguavo: “Mu lizina lia Yesu uze ue kuambulula Paulu, nji mi leka nguange tundenu.”
14 Kaha vana va kupua 7 va umo mukuluntu ua vasasendote ua kaYundeya ua lizina Sekeva, vakele na kulingamo.
15 Vunoni sipilitu ua kuzuala, uava kumbuluile nguendi: “Yesu nji mu tantekeya, na Paulu vene nji mu tantekeya. Amba yenuco yenu veya?”
16 Kaha uze yala uakele na sipilitu ua kuzuala, uava tumbukilile na ku vapupa vose umo ku umo. Ngeci va teuele mu ize ndzivo vuntselentsele oku va na vulumuka.
17 Kaha vaYundeya na vaNgelengu vose vakele mu Efesu vavuile muzimbu uaco, ngeci vavuile liova. Omo liaco, lizina lia Muangana Yesu va tualeleho ku lizumbangeya.
18 Vantu vavengi vaze va tsilielele, vezile na ku litavela ha toma ku vipi viavo.
19 Cikuavo naua, vantu vavengi vaze vakele na kulinga mahesi, va kunguluile hamo mavulu avo, naku atsimikila ha meso a mbunga. Mu va pandakanene ndando ya mavulu aco, va uanene nguavo, iheta ku 50.000 ya vimbongo via palata.
20 Ngoco vene, lizi lia Yehova* lia tualeleho kukola na kukala ndzili.
21 Mu nima yevi viose, Paulu ua likuminyine nguendi mu nima ya kuhita ku Masendonia naku Akaya, aya ku Yelusalema. Ua handekele nguendi: “Nja pande kuya naua ku Loma.”
22 Ngeci ua tumine vakuasi vendi vavali, Timoteu na Elastu vaye ku Masendonia, vunoni ikeye ua salele ku muhato ua Asia naku kalako imo ntsimbu.”
23 Ku ntsimbu ize, kua katukile liuayanga lia kama omo lia Njila ya Muangana.
24 Kuakele umo yala mukua kufula viuma via palata, lizina liendi Ndemeteliu. Uakele na kufula tuvitembele tua palata tua kulifua na tembele ya Aletemise, kaha uakele naku fukisa mua kama vakua ku mu pangela.
25 Ngeci Ndemeteliu uava kunguluile hamolika na vakuavo vakua kufula, naku va leka nguendi: “Mu tantekeya vuino nguenu, vupite vuetu vue kutunda ha cino cipanga ca kufula.
26 Nenu mu nevu na kulimuena vati ou Paulu ali na kukokueya naku hungumuna vantu, kati lika muno mu Efesu, vunoni na mu vimbonge viose via mu muhato ua Asia, mu ku handeka nguendi ava vanjambi va kupanga ku mavoko kati vanjambi mpundu.
27 Cikuavo naua, kati mingoso yetu lika iua, vunoni na vantu va putuka ku sembulula tembele ya njambi ua kama ua mpuevo Aletemise. Ou njambi yetu ivali naku lemesa mu vimbonge viose via mu Asia na mu vifuti viose via ha mavu, ka vaka mu zumbangeya naua.”
28 Mu vavuile ngoco, vanyenguele mua kama na kuputuka ku tambakana nguavo: “Aletemise ua vakua Efesu ikeye ua kama!”
29 Omo liaco, liuayanga lia lisanduokele muaya mbonge yose, ngeci va tuntilile mu lipela oku va kokangeya Ngayu na Alistaliku vakua Masendonia, vaze vakele na kuenda na Paulu.
30 Ngeci Paulu, ua tondele ku ka kovela hakati ka mbunga linga a handeke navo, vunoni vandongesi va mu vindikile.
31 Kaha na vamo vakua ku tuamenena vilika na vueho vaze vapuile vavusamba vendi, va tumine lizi lia ku mu lambelela linga kati aye ku lipela, kutina ahaka muono uendi mu vusonde.
32 Ngoco vene, mbunga yose ya kele mu liuayanga, ava va tambeka evi, vakuavo va tambeka vize, cingi cavo ka va tantekeyele vene omo lia vika va likunguluile kuze.
33 Ngeci va tundisile Alesandele mu mbunga, vaYundeya va mu nakuilile ha lutue, kaha Alesandele ua va sovueyele linga a lihakuile ku meso ambunga.
34 Vunoni mu va nongonuene nguavo, uapua kaYundeya, vose va putukile ku tambakanena hamolika mu vi ola vivali viose, nguavo: “Aletemise ua vakua Efesu ikeye ua kama!”
35 Ntuamena ua ize mbonge mua holuesele mbunga, uava lekele nguendi: “Enu vakua Efesu, iya ka tantekeya nguendi mbonge ya vakua Efesu, ikeyo ye kuniunga tembele ya kama ya Aletemise na kamponya uze ua uile muilu?
36 Mu kulinga na umo uahi a hasa ku vi viana, simpenu mitima kaha kati mu pupuzuke.
37 Muomu ava vamala va mu na neha kuno, ka va pundile mu vitembele cipue ku sahula njambi yetu ua mpuevo.
38 Ngeci mukemuo, nga Ndemeteliu hamolika na vakuavo vakua kusonga, va na uana umo mulonga muli umo muntu, veze va kuambulule mulonga uaco, muomu matangua a kusompesa ku akala, na vanguvulu naua kuvali.
39 Vunoni nga mu tonda viuma vieka kuhiana evi, cimpande caco mua pande ku cituala kuli vakua kusika, linga va ka ci vatule vakevo kuliya na masiko.
40 Kati ngoco, tuli mu vusonde vua ku tu hana mulonga ua kualulukila nguvulu omo lia liuayanga lia lelo. Muomu ka tu hasa ku lumbununa vika via katula eyi mbuanja ni omo lia vika eyi mbunga ya likunguluila kuno.”
41 Kaha mu nima ya ku handeka evi, ua sanduele ize mbunga.
Matota
^ Talenu Mizimbu ya ku Vuezako
