Vilinga Via Vapostolo 5:1-42
5 Vunoni umo yala ua lizina Ananiya na mpueyendi Safila, va landesele lihia liavo.
2 Vunoni ua suekeleko umo mutamba ua vimbongo, na mpueyendi ua vi tantekeyele kaha mutamba ukuavo co ua utualele ku vapostolo.
3 Petulu ua muihuile nguendi: “Ove Ananiya, vika una tavesela Satana aku lingise kukuisa sipilitu santu, mu kusueka umo mutamba ua vimbongo via lihia li ua landesa?
4 Vuno lihia ka liapuile liove ntsimbu tele kanda ulilandese? Kaha ambe vene mu una lilandesele, vimbongo ka viapuile viove naku vi pangesa muose-omuo mu unazange ni? Amba vika honi una singaniekela kulinga viuma via cifua eci mu mutima uove? Tantekeya nguove, kati vantu va una kuisa vunoni Njambi.”
5 Ananiya muevuile ngoco, haze vene, ua uile ha mavu na kutsa. Ngeci vose vaze vavuile muzimbu uaco, vavuile liova lia kama.
6 Ngeci vakuendze va katukile, va mu zengelele ha vintanga kaha va mu tuhuile hambandza, naku ka mu tsinda.
7 Mu nima ya vi ola vitatu, mpueyendi naua uezile vunoni uakele ku ndzimba ya viuma via lingikile.
8 Ngeci Petulu ua muihuile nguendi: “Aci nji lekeko, vuno enu mu vavali mua landesa lihia na ndando eyi ni?” Ua kumbuluile nguendi: “Eyo, tu na landesa na ndando eyi vene.”
9 Kaha Petulu ua mu lekele nguendi: “Omo lia vika enu mu vavali mua likuminya kueseka sipilitu ya Yehova?* Tala! Vaze va na ka tsinda yaliove, vali ku mbelo. Nove naua va ku tuhula hambandza.”
10 Haze vene ua uililile ku mikono ya Petulu kaha ua tsile. Vaze vakuendze mu va kovelele, va mu uanene natsi laza. Kaha va mu tuhuile, naku ka mu tsinda ku mukulo ua yaliendi.
11 Omo liaco, cikungulukilo cose na vose vavuile muzimbu uaco, vavuile liova lia kama.
12 Ngoco vene, vapostolo va tualeleho kulinga vitantekeyeso na vikomoueso viavingi ku vantu. Kaha vose vakele naku likunguluila mu Cimbimbi ca Solomone.
13 Vutuhu ka kuakele veka va simpile mu ku likuatasana navo, vunoni vantu vakele naku va sangala cikuma.
14 Vunoni kati ovio lika, vakua kutsiliela muli Muangana va tualeleho ku livuezelela, vapuile vamala na vampuevo vavengi.
15 Kaha naua vakele naku neha vakua kuvavala naku va langeka mu vitapalo via kama ha tumihela na ha visalo. Linga mua hita Petulu cimbembesi cendi ci hete hali vamo vavo.
16 Cikuavo naua, mbunga yakele mu membo azingilikile Yelusalema, vakele naku va nehela vakua kuvavala na vaze vakele na vandemone. Kaha vose vava kanguisile.
17 Vunoni sasendote ua kama na vose vakele nendi, vaze vakua civunga ca vaSanduseu vavuile cipululu ngeci va katukile.
18 Va kuatele vapostolo naku va soka mu kamenga.
19 Vunoni kuheta ku vutsiki, kangelo ua Yehova ua sokoluele mapito a kamenga. Kaha ua va tuhuilemo naku va leka nguendi:
20 “Yenu muka lisolole mu tembele kaha tualelenuho kuleka vantu vose via muzimbu ua muono.”
21 Mu nima ya kuivua aa mezi, ku cimenemene va kovelele mu tembele naku putuka ku longesa.
Vunoni omo ua hetele sasendote ua kama na vaze vakele nendi, va sanene vakua Mpunga na mbunga ya vakuluntu vose va muyati ua Isaleli linga va likungulule. Kaha va tumine vamo ku kamenga linga vaka hiange vapostolo.
22 Vunoni tupaso* mu vaka hetele kuze, ka vava uanenemo. Ngeci va hilukile kaha va kambuluile
23 nguavo: “Tu na uana ku kamenga kua kupata vuino na tuniungi vanemana ha mbelo. Vunoni mu tu na sokolueleko, ka tua uanenemo muntu na umo uahi.”
24 Omo kapitau ua tembele na vakuluntu va vasasendote vavuile ngoco, ca va tangele mua kama muomu ka va tantekeyele vika ve ku lingile naua.
25 Vunoni kuezile umo naku va leka nguendi: “Talenu! Vamala va mu na hakele mu kamenga vali mu tembele mu ku longesa vantu.”
26 Ngeci kapitau uaile na tupaso vendi mu ku va hianga, vunoni kati na vukenya muomu va uile liova lia vantu nguavo vavasa mavue.
27 Ngoco vene vava nehele naku vemika kumeso a Mpunga. Kaha sasendote ua kama ua vehuile
28 naku va yalumukila nguendi: “Tua mi vindikile nguetu kati mu longese vantu mu lizina eli, vunoni talenu! Mu na sulisa Yelusalema yose na vilongesa vienu kaha mua likuminya kuneha mulonga ua maninga ou muntu ha mitue yetu.”
29 Vunoni Petulu na vapostolo vakuavo va kumbuluile nguavo: “Tua pande kuononoka Njambi mu kupua muangana uetu, kuhiana vantu.
30 Njambi ya vakukuluila vetu, ua sanguile Yesu uze umua tsihile mu ku mu sukika ha citi.
31 Njambi na mu haka ku vukama mu ku mupuisa Ntuamena ua Kama na Muovole, naku mu haka ku livoko liendi lia cilio linga vaIsaleli valuluke naku va konekela ku vipi viavo.
32 Netu tu vakaleho va viuma viaco, hamolika na sipilitu santu naua, ize ya na hana Njambi kuli vaze vali naku muononoka mu kupua Muangana.”
33 Mu vevuile ngoco, va nyenguele cikuma ngeci va tondele ku va tsiha.
34 Vunoni umo kaFaliseu ua lizina Ngamaliele, uapuile mukua ku longesa Masiko uva singimikile vantu vose. Uemanene mu Mpunga na kutuma linga va tuhule vapostolo hambandza mu kamo kantsimbu.
35 Kaha ua va mamuine nguendi: “Enu vamala va mu Isaleli, livandekenu na viuma vi mu tonda kulinga ava vantu.
36 Ca ku muenako, amo matangua kunima, kua solokele Teundasi uze ua litumbuile kupua mukua vukama kaha vamala vavengi va kuheta ku 400, va lipandakanene nendi. Vunoni mu va mu tsihile, vose vaze va mu kavele va lisandokele kaha civunga caco ha ca huilile vene haze.
37 Mu nima yendi, kuezile naua Yundasa mukua Ngalileya. Ku matangua aze aku lisonekesa, ua kokueyele vantu vavengi va mu kave. Nendi naua ua tsile kaha vose vaze vakele naku mu kava va lisanduokele.
38 Ngeci mukemuo, kuliya na cifua ci vilimo viuma, nji mi leka nguange, kati mu va linge navimo viahi, vecelenu. Muomu nga ovu vutumbe ni eci cipanga cinapu ca vantu, noku kuviya kuahi.
39 Vunoni nga via Njambi ka mu hasa ku va vindika. Kati ngoco, iya a tantekeya, halumo Njambi vene muli na kuluisa.”
40 Mu vavuile ngoco, va halakanene ku cimamuna cendi, ngeci va tumine kusana vapostolo. Mu nima ya ku va veta makote, vava vindikile naua kuambulula mu lizina lia Yesu kaha va vecelele.
41 Ngoco vene, va tundile ku meso a Mpunga na ndzolela muomu vava sahuile omo lia lizina lia Yesu.
42 Kaha tangua na tangua mu tembele naku ndzivo na ndzivo, va tualeleho ku longesa na kuambulula muzimbu ua cili kutuala hali Kilistu Yesu.
