Lia 23 ya Março, tua lavelela ku ka tambula vangendzi va ku pua 12 milhões ni va tuvakana oho ku Mulalelo ua Muangana. Mua vusunga va ka tambula vukaleho vua kama, mu va ka halakana ku cimpande ca lombolola vuana vua ku-kula vua tu hana Yehova, na vivezikiso vi va ka tambula vantu ku lutue omo lia vuana vuaco! (Isaya 11:6-9; 35:5, 6; 65:21-23; Yoa. 3:16) Vunoni mukua ku ambulula cimpande kati ikeye lika a ka hana vukaleho ha litangua liaco. Tu vose tu ka hasa ku hana vukaleho mu ku tambula vuino vangendzi. (Loma 15:7) Tu talenu vimo vinjila vi tu hasa ku lingamo.

• Lihakelenu kapandi ka ku tambula vangendzi na vaze va zeya mu lutsilielo na ndzolela ya kama, kati lika ku ka tumama na ku lavelela ku putuka ca ciuano houe.

• Vutuhu mu ka tuala mana kuli vaze va mua laniene yenu mpundu, mua pande naua ku ka haka seho ku vantu veka va keza ku Mulalelo omo lia ku tambula cilanio mu ntsimbu ya ku hana vilanio. Yenu mu ka lanie vamo vangendzi va ka tumame nenu, linga mu ka tande hamo navo Mbimbiliya yenu na ku-imba hamo navo mu mukanda uenu ua miaso.

• Mu nima ya cimpande liviukisilenu ku ka kumbulula nkala vihula vi va ka mi linga. Nga ka mu ka uana ntsimbu ya ku lingamo muomu mu nima yenu cikungulukilo ceka ci ka likungulula, liviukisilenu ku kendela muntu uaco ku ndzivo yeni mu nima ya matangua a andende. Nga ka mu tantekeya mua ku liuanena neni naua, citava mu mu leke nguenu: “Nji tonda ku ka halakana mezi enu ku tuala ha ciuano ca lelo, vunoni ka nji tantekeya ku mua kala. Citava mu nji leke kulihi tu hasa ku ka liuana naua?”