Mulalelo ue ku pua ntsimbu ya cili ya ku singanieka ha vivezikiso vi tu ka tambula ku lutue omo lia ku-kula ca Yesu ngeci mua. Yehova ka tangele vantu linga va pue na ku tsa. Ngeci mukemuo, vantu ve ku ivua ku vavala ca kama cikumakuma ku mitima, nga va na tsisa muntu u va lema. (1 Kol. 15:26) Yesu neni ua vuile ku vavala ku mutima mua muene vandongesi veni va linienga ku-tsa ca Lazalu. (Yoa. 11:33-35) Mu ku linga Yesu ue ku tambuluisa Ise mu vutantuluke, tuli na vusunga nguetu Yehova neni ue ku ivua ku vavala mue ku tu mona tu linienga ku-tsa ca vantu va tua lema. (Yoa. 14:7) Yehova ali na ku lavelela na cizango ca kama ntsimbu ya ka sangula vangamba veni va tsa. Netu tua pande ku kala na cizango caco.—Yombi 14:14, 15.

Tuli na vusunga nguetu ku sanguka ci kenda mu vutantuluke muomu Yehova ka puile Njambi ua liuayanga. (1 Kol. 14:33, 40) Ka i ka pu ntsimbu ya ku linga naua miala vunoni ntsimbu ya ku tambula vaze va ka sanguka. Vuno mue ku singanieka ha cisangukilo, cikumakuma omo mu linienga ku-tsa ca muntu ua ha mutima ni? (2 Kol. 4:17, 18) Mue ku santsela Yehova ku vuana vua ku tu kula ni? Mue ku mu santsela naua omo lia ku tu leka ku hitila mu Mbimbiliya ngueni ku ka kala cisangukilo ni?—Kolo. 3:15.

• Sonekenu lizina lia kavusoko kenu ni kavusamba u mu tonda cikuma ku ka mona naua.

• Veya va va tumbula mu Mbimbiliya mu tonda ku ka mona na ku handeka navo?