Ua Kulivanga ua Yoano 5:1-21
5 Uose atsiliela nguendi, Yesu ikeye Kilistu, na semuka kuli Njambi kaha naua uose alema Njambi, alema naua vana va Njambi.
2 Nga tulema Njambi na kuononoka masiko endi, tuka tantekeya nguetu tualema vana va Njambi.
3 Muomu kulema Njambi, ca lumbunuka kuononoka masiko endi, kaha masiko endi kati a akalu,
4 muomu uose na semuka kuli Njambi, avula mavu. Kaha lutsilielo luetu lukeluo lua vulu mavu.
5 Iya ahasa kuvula mavu? Kati uze na tsiliela nguendi Yesu ikeye Muana Njambi ni?
6 Yesu Kilistu uezile kuhitila mu mema na maninga, kati na mema lika, vunoni uezile na mema na maninga. Kaha sipilitu ili na kuhana vukaleho, muomu sipilitu yapua vusunga.
7 Muomu kuli viuma vitatu vie kuhana vukaleho:
8 sipilitu, mema, na maninga; viose vitatu via litombola.
9 Nga tue kutava vukaleho vua vantu, vukaleho vua Njambi kati vukevuo vua hiana ni? Muomu vavenya Njambi ikeye ali na kuhana vukaleho vuaco kutuala hali Muanendi.
10 Uze atsiliela Muana Njambi, na tava vukaleho mukati kendi. Uze ka tsiliela Njambi, na mu puisa mukua makuli muomu ka tsilielele mu vukaleho vua na muhana Njambi, kutuala hali Muanendi.
11 Kaha ovu vukevuo vukaleho vuali naku tuhana Njambi, ua tuhana muono ka ue kuhua, kaha muono uaco uli muli Muanendi.
12 Uose na likata na Muana ali na muono, vunoni uze ka likatele na Muana Njambi, kesi nou muono.
13 Njili naku mi sonekela evi viuma, linga mu tantekeye nguenu muli na muono ka ue kuhua, enu mua tsiliela mu lizina lia Muana Njambi.
14 Kaha ovu vukevuo vusunga vutuli navuo kutuala hali Njambi,* nguetu, viose-ovio vitu vundila nga via litombola na cizango cendi, atuivua.
15 Nga tua tantekeya nguetu viose-ovio vitu vundila atu halakana, kaha tuli na vusunga nguetu vitua vundila tu vi tambula, muomu tua vi vundila kuli ikeye.
16 Nga muntu amona muanaye alinga vupi ka vutuala ku kutsa, avundile, kaha Njambi aka muhana muono, eyo, ahana muono kuli vaze ka valingi vupi vutuala ku kutsa. Kuakala vupi vutuala ku kutsa, ovu kati vukevuo vupi vu njina handeka nguange avundile.
17 Vuhenge vuose vuapua vupi. Vutuhu ngoco, kuakala vumo vupi ka vutuala ku kutsa.
18 Tu tantekeya nguetu, uose na semuka kuli Njambi ke kulinga vupi, vunoni uze* na semuka kuli Njambi amu niunga, kaha mukua vupi ka mu saleka livoko.
19 Tu tantekeya nguetu tu vakua Njambi, vunoni mavu ose ali ku ndzili ya mukua vupi.
20 Vunoni tu tantekeya nguetu Muana Njambi neza, kaha na tuhana mana aku tantekeya vusunga kutuala hali uze ua vusunga. Kaha tua likata na uze ua vusunga kuhitila muli Muanendi Yesu Kilistu. Ou ikeye Njambi ua vusunga na muono ka ue kuhua.
21 Tuana tuange,* tinenu* ku tumponia.
Matota
^ Ni “kuzituka cituli naco mu kuhandeka na Njambi”
^ Ni nguetu, Yesu Kilistu Muana Njambi
^ Ni “vana vange vanja lema”
^ Ni “liniungenu”
