Uamu Civali ua Yoano 1:1-13
1 Yange civendzi,* njili naku sonekela mpuevo uva na hangula na vana vendi. Uze unja lema mpundu kaha kati yange lika vunoni na vose vaze va tantekeya vusunga,
2 omo lia vusunga vuli muli yetu kaha vu ka tualelaho kukala muli yetu ku miaka yose.
3 Ngozi ya kama, na nkeke, na ciyulo, hamolika na vusunga, na cilemo, via kutunda kuli Njambi Tata, kaha na kuli Yesu Kilistu Muana Tata, vi kakala netu.
4 Nja viukilila cikuma ha ku tantekeya nguange, vamo vana vove vali na kuenda mu vusunga, ngue muze mu tua tambuile lisiko kuli Tata.
5 Ngeci nji kulomba ove mpuevo nguange, tu lilemenu umo na mukuavo. (Kanjesi naku ku sonekela lisiko lia liha, vunoni lize vene li tuakala nalio tunde ha katete.)
6 Kaha cilemo ca lumbunuka, tu tualeleho kuenda muaya masiko endi. Eli likelio lisiko ngue mu muavuile tunde ha katete nguavo, mua pande ku tualelaho kuenda mu cilemo.
7 Muomu vakua ku hungumuna va na lana kaha va na lisanduoka ha mavu, vakevo vaze kavesi na kutava nguavo Yesu Kilistu, uezile na muvila ua ntsitu. Ou ali na kulinga evi viuma, napu mukua ku hungumuna* na mukua kuluisa Kilistu.*
8 Liniungenu kutina mu zimbalese viuma vi tua fuitanganena, vunoni muka tambule fueto ya vutuntu.
9 Uose atanguka kaha naua ka tualelaho kukala mu vilongesa via Kilistu, kesi na Njambi. Vunoni uose atualelaho kukala mu vilongesa viaco, ikeye ali na Tata na Muana.
10 Nga umo eza kuli yenu vunoni ka neha vilongesa viaco, kati mu mu tambule mu vindzivo vienu nambe ku mu meneka.
11 Muomu uze amu meneka, alipandakana ku vilinga viendi via kuvihia.
12 Vutuhu njili na viavingi via ku mi sonekela, kanji tondo ku mi sonekela lika ha lipapelo na vulombo,* vunoni nja lavelela kua ku mi meneka na kuhandeka nenu citona meso, linga ndzolela yenu ipue ya vutuntu.
13 Vana vandumbuove uze uva hangula, va na kumeneka.
