Kuhitila Muli Luka 1:1-80
1 Vantu vavengi va lihakelele kapandi ka kukungulula na kusoneka mizimbu yose, itua tsiliela netu.
2 Mizimbu yaco va tu lumbunuinineyo naua vaze va limueneneyo tunde ha katete kaha na vaze vambuluile muzimbu ua Njambi.
3 Ngeci mukemuo, mukua vukama Teofilu, mu nima ya ku tondesesa vuino mizimbu yaco tunde ku vuputukilo, nja mono nguange ca cili nji ku sonekeleyo mu kuinoneka ngue muya likavelele mpundu,
4 linga ukale na vusunga vua viuma viose viva ku longesele lika na kanua.
5 Ku ntsimbu ya kele na kusika Muangana Helonde* mu Yundeya, kuakele umo sasendote lizina liendi Zakaliya, ua ku civunga ca vasasendote ci va sanene nguavo Aviya. Mpueyendi uapuile ua ku vusoko* vua Alone lizina liendi Elizambeta.
6 Vose vapuile vakua vuviuke ku meso a Njambi, kaha ka vakele naha ku va payela muomu vendele na kukava masiko ose a Yehova.*
7 Vunoni ka vakele na muana muomu Elizambeta uapuile ntsimpi, cikuavo naua vose vapuile tusinakazi.
8 Tangua limo, Zakaliya uakele na kulinga cipanga cendi ca vusasendote ku meso a Njambi, mu civunga cavo.
9 Kuliya na kalingo-lingo ka vasasendote, ya heteleho ntsimbu yendi ya kuhana vuana vua insensu,* ngeci ua kovelele mu hondo ya kulela ya Yehova.
10 Kaha ha ntsimbu ya ku uemeka insensu, mbunga yose yakele hambandza mu kuvundila.
11 Kangelo ua Yehova ua mu solokelele, uemanene ku cilio ca mutula ua ku uemekela insensu.
12 Vunoni Zakaliya mua muene uze kangelo, ua lisosomuene mua kama, ngeci uavuile liova.
13 Vunoni kangelo ua mu lekele nguendi: “Kati uivue liova Zakaliya, muomu va nevu kulambelela cove, kaha mpueyove Elizambeta aka ku semena muana ua yala, uka mu luka nguove Yoano.
14 Mu ka viukilila mua kama naku lisamba, kaha vantu vavengi vaka viukilila omo lia ku semuka cendi.
15 Muomu akapua muntu ua seho ya kama ku meso a Yehova. Vunoni ka pandele kuka nua vinyu ni ambe vuala vuose-ovuo, cikuavo naua, aka sula na sipilitu santu, ambe vene ntsimbu kanda a semuke.
16 Kaha aka hiluisa vana va Isaleli vavengi kuli Yehova Njambi yavo.
17 Cikuavo naua, aka tuama ku lutue luendi, na sipilitu na ndzili ngue ya Eliya, linga aka hiluise mitima ya visemi ku vana vavo, na kukuasa vakua lisino vakale na mana a vakua vuviuke, kaha na ku longesa vantu, linga Yehova aka va uane va na liviukisila laza.”
18 Zakaliya uehuile uze kangelo nguendi: “Vati nji hasa kukala na vusunga vua mezi ove? Muomu ange nji kasinakazi, kaha ambe mpueyange nendi na kulupa.”
19 Kangelo ua mu kumbuluile nguendi: “Yange Ngambiliele, uze ue kuimana ku meso a Njambi. Va na nji tumu kua ku handeka nove naku kuambuluila ou muzimbu ua cili.
20 Vunoni mu kulinga ka ua kulahelele mezi ange, aze aka lipuisamo ha ntsimbu iva na hangula, halakana, upua kaveveve noho ha vi ka lipuisilamo vino viuma.”
21 Ha ntsimbu yaco, mbunga ya tualeleho ku vandamena Zakaliya, vunoni ya likomokelele muomu ua simbuile mua kama mu cihela ca kulela.
22 Zakaliya mua tuhukilemo, ka hasele ku handeka navo, ngeci va nongonuene nguavo kua mu solokela cimo cimona mu cihela ca kulela. Uakele na ku handeka navo mu ku pangesa mavoko, vunoni kasi uapuile kaveveve.
23 Mua huile matangua a cipanga cendi ca kulela,* ua hilukile ku ndzivo.
24 Mu nima ya amo matangua, mpueyendi Elizambeta uemitile, kaha ka lisoluele ku mbunga mu vingonde vitanu. Ngeci ua handekele nguendi:
25 “Mukemuo mua na lingi Yehova, ku matangua ano. Na nji vuluka, kaha na nji tundisa ntsoni ku meso a vantu.”
26 Elizambeta muakele na vingonde 6 via cikute, Njambi ua tumine kangelo Ngambiliele ku Ngalileya mu mbonge ya Nazaleta,
27 ua mu tumine kuli umo muanampuevo kanda aci limona na yala, lizina lieni Maliya. Muanampuevo uaco tele va na mu handekeya* kuli Yosefe ua ku cikota ca Ndaviti.
28 Uze kangelo mua kovelele, ua menekele Maliya nguendi: “Uli vati ove iva na vezikisa mua kama, Yehova ali nove.”
29 Vunoni ikeye ua likomokelele mua kama na cifua ca mu menekelelemo kangelo. Kaha uakele na ku seteka kuivuisisa vika a lomboloka mezi aco.
30 Ngeci kangelo ua mu lekele nguendi: “Kati uivue liova Maliya, muomu Njambi na ku vezikisa.
31 Kaha tala! U kemita na kusema muana ua yala, uka mu luka nguove Yesu.
32 Ou muana akapua ua kama, kaha vaka mu sana nguavo Muana ua Mukua Kuhiana Viose. Yehova Njambi aka mu hana vuangana vua ise Ndaviti.
33 Akapua Muangana ku Ndzivo ya Yakomba ku miaka yose, kaha Vuangana vuendi ka vukahu.”
34 Vunoni Maliya uehuile kangelo nguendi: “Vati honi evi vi ka lipuisamo? Muomu yange kanda nji ci limoneho na yala.”
35 Kangelo ua mu kumbuluile nguendi: “Sipilitu santu ikeza hali yove, kaha ngolo ya Mukua Kuhiana Viose ika kala nove. Ngeci muana iuka sema vaka mu sana nguavo ua kulela, muana Njambi.
36 Cikuavo naua, kavusoko kove Elizambeta, uze ivakele na kusana nguavo ntsimpi, nendi nemita. Aka sema muana ua yala mu vusinakazi vuendi. Mu ntsimbu ino na puisa vingonde 6.
37 Muomu na vimo viahi ka hasa ku puisamo Njambi.”
38 Ngeci Maliya ua handekele nguendi: “Ange nji ngamba ya Yehova. Vi lingike kuli yange, ngue mu ua handeka.” Mu nima yaco, uze kangelo uaile.
39 Ku matangua aze, Maliya ua katukile na kuya vuasi-vuasi ku cihela ca mincinda, ku imo mbonge ya mu Yunda.
40 Ua kovelele mu ndzivo ya Zakaliya na ku meneka Elizambeta.
41 Elizambeta mua vuile Maliya amu meneka, kakeke mu lizimo liendi ua tumbukile. Kaha Elizambeta ua sulile na sipilitu santu.
42 Ua tambakanene nguendi: “Ua vezika ha kati ka vampuevo, kaha na vezika muana ali muzimo liove!
43 Vika nja lingi nji vezike ngeci? Naye ya Muangana uange neza mu ku nji meneka?
44 Muomu mu njinevu lizi liove lia ku nji meneka, kakeke muzimo liange na tumbuka omo lia ndzolela.
45 Na vezika naua mpuevo uze ua tsilielele mu viuma viose viva mu lekele. Muomu Yehova aka vi puisamo mpundu.”
46 Maliya ua handekele nguendi: “Muono* uange u sangaziala Yehova,
47 kaha mutima uange uka tualelelaho ku vuahelela muli Njambi Muovole uange,
48 Muomu na tala ku vundende vuange ngamba yendi. Mua vusunga, tunde litangua lia lelo, miyati yose ika nji tumbula nguayo nja vezika!
49 Muomu Mukua ngolo nanji lingila viuma via kama, kaha lizina liendi lia kulela.
50 Lizimo ku lizimo* avuila nkeke vaze va mu singimika.
51 Na lingi viuma via kama na livoko liendi; a sanduola vakua ku lihalesa mu mitima.
52 Na tundisa vakua kusika va ndzili ha mavuangana avo, na kuhaka ku vukama vakua vundende,
53 na kutisa vakua ndzala na viuma via cili vunoni vampite na va hiluisa mavoko-voko.
54 Neza mu kuovola ngamba yendi Isaleli, muomu na vuluka cikulaheso ca lingile,
55 ku vakukuluila vetu nguendi: “Aka muesa nkeke kuli Avilahama na mbuto yendi, ku miaka yose.”
56 Maliya uakele na Elizambeta vingonde vitatu kaha ua hilukile kuimbo liendi.
57 Ntsimbu ya ku sulumuna ya hetele, ngeci Elizambeta ua sulumuine muana ua yala.
58 Vantu va tungile navo Elizambeta na vavusoko vendi, vezile mu ku viukilila nendi muomu vavuile nguavo Yehova na mu muesa nkeke ya kama.
59 Ha litangua lia 8, vezile mu ku lovola* muana kaha va tondele ku mu hindula ise Zakaliya.
60 Vunoni vanaye va vianene nguavo: “Houe! Lizina liendi lipua Yoano.”
61 Va mu lekele nguavo: “Na umo kavusoko kove uahi, uakala nolio lizina.”
62 Ngeci vehuile ise mu ku pangesa mavoko, ava leke lizina lia tondele ku mu luka.
63 Ngeci ua pingile kamo ka livaya, kaha ua sonekeleho nguendi: “Lizina liendi Yoano.” Ngeci vose va likomokelele mua kama.
64 Haze vene lilimi liendi lia zitukile, ngeci ua putukile ku handeka na ku sangaziala Njambi.
65 Kaha vose va tungile navo, vavuile liova, ngeci ou muzimbu va putukile ku uhandeka ku vihela viose via mincinda mu Yundeya.
66 Vose vavuile ou muzimbu, va u tulikile mu mitima yavo. Kaha vakele na ku handeka nguavo: “Vati akafua ou muana?” Muomu livoko lia Yehova lia kele nendi.
67 Kaha ise Zakaliya ua sulile na sipilitu santu, ua polofetele nguendi:
68 “Ua ku sangaziala Yehova, Njambi ya Isaleli, muomu na vuluka vantu vendi mu ku vohiela.
69 Na tu hana muovole* ua ngolo ua ku vusoko vua ngamba yendi Ndaviti,
70 ngue mua handekele ku hitila mu vapolofeto vendi va kulela va ku laza,
71 nguendi aku tuovola ku vitozi vetu naku mavoko a vose va tu zinda.
72 Aka vuila nkeke vakukuluila vetu, mu ku vuluka litavasiano liendi lia kulela
73 lize lia lisingile na nkaka yetu Avilahama
74 linga mu nima ya ku tuohiela ku mavoko a vitozi, aka tu hane civezikiso ca ku mu lingila cipanga ca kulela na kusimpa cose
75 na lukakatela na vuoloke ku meso endi ku matangua etu ose.
76 Vunoni ove kanike, vaka kusana nguavo kapolofeto ua Mukua Kuhiana Viose, muomu uka tuama ku lutue lua Yehova, linga uka mu vuahesele vinjila viendi,
77 Mu kuhana vantu vendi mana aku tantekeya nguavo, va kovoka ku hitila mu ku va konekela ku vipi viavo,
78 omo lia cikeketima ca Njambi yetu. Omo lia cikeketima caco, ceke ca litangua ci ka tu tuila ku tundilila muilu,
79 linga ci tuile vaze vali mu milima, eyo, mu milima ya kutsa, na ku tuamenena mikono yetu mu njila ya ciyulo.”
80 Ngeci uze muana ua kolele na ku kaniama mu sipilitu, kaha ua tualeleho mu likango na ha litangua lia ka lisoluele mpundu ku vaIsaleli.
Matota
^ Talenu Mezi ava Lombolola
^ Mu ciNgelengu “Ua ku vana va Alone va vampuevo”
^ Talenu Mizimbu ya ku Vuezako
^ Ni “vihemba via vueko vua cili”
^ Cipanga ca ku pangela mbunga
^ Ni “kulama”
^ Talenu Mezi ava Lombolola
^ Ni “cisemunuino”
^ Ni “kutuala ku vamba”
^ Mu ciNgelengu “mbinga ya vuovole.” —Taleni Mezi ava Lombolola
