Kuhitila Muli Luka 10:1-42
10 Mu nima yevi, muangana ua hanguile vakuavo va kupua 70, kaha ua va tumine vavali vavali, mu vimbonge na vihela viose via tondele kuya.
2 Uava lekele nguendi: “Mua vusunga, vimbuto* vi na lana, vunoni vakua kutia* vavandende. Ngeci mukemuo, vundilenu Vavenya vipanga linga atume vakua kupanga, va kutie vimbuto viendi.
3 Yenu! Njili naku mi tuma ngue vana va vampanga hakati ka tungunga.
4 Kati muambate kacipete ka vimbongo ni cipete ca viakulia ambe vinkaku. Cikuavo naua, kati mu meneke* muntu mu njila.
5 Mu ndzivo yose-oyo imu kovela, ha katete handekenu nguenu: ‘Ciyulo cikale mu ndzivo ino.’
6 Nga muli muntu ua lema ciyulo, ciyulo cenu ci ka kala nendi. Vunoni nga uahimo, kaha ci ka mi hilukila.
7 Ngeci mukemuo, kalenu mu ndzivo yaco, lienu na kunua vize viva mi hana, muomu mukua ku panga ua fuila ku tambula fueto yendi. Kaha kati muka nunguluke tunda ndzivo, ya ndzivo.”
8 “Cikuavo naua, mu mbonge yose imu kovela nga vantu va mi tambula, lieni viose-ovio viva mi hana.
9 Kanguisenu vakua kuvavala valimo, naku va leka nguenu: ‘Vuangana vua Njambi vuneza mu hiehi nenu.’
10 Vunoni mu mbonge yose-oyo imu kovela nga ka va mi tambula, yenu mu vitapalo viavo via kama naku handeka nguenu:
11 ‘Tu mi totomuena mpumputa ya mu mbonge yenu, ize ina kakatela ku viliato vietu. Vutuhu ngoco, tantekeyenu nguenu Vuangana vua Njambi vuneza ha hiehi.’
12 Nji mi leka nguange, ha litangua lize, kasitiku ka vaka hana ize mbonge, ka kapua ka kama kuhiana ka Sondoma.
13 “Ngongo yove ove Kolazine! Kaha ngongo yove ove Mbetesainda! Muomu vipanga via ku komouesa viva na mi lingila, nga va vi lingilile vantu va ku Tile na Sindone, nga valulukile laza mu kuzala vikeleya na kutumama mu muto.
14 Ngeci mukemuo, ha ku sompesa, kasitiku kenu ka kapua ka kama kuhiana ka Tile na Sindone
15 Nenu vakua Kapenama, vuno mu singanieka nguenu vaka mi tuala muilu ni? Vaka mi sikumuisa mu Cihilo!*
16 “Uose ami halakana, nange na nji halakana. Uose ami sembulula, nange na nji sembulula. Cikuavo naua, uose anji sembulula na sembulula naua uze ua nji tumine.”
17 Kaha vaze 70 va hilukile na ndzolela, naku handeka nguavo: “Muangana, ambe vene vandemone va na tuononoka mu tu na pangesa lizina liove.”
18 Yesu mua vuile ngoco, uava lekele nguendi: “Njili na kumona Satana nau laza muilu, ngue muhiato.
19 Halakanenu! Nji na mi hana mpoko ya kuliata manoka na manyeue, na ya kuhiana ndzili yose ya citozi cenu, kaha na vimo viahi vika mi vulumuna.
20 Vutuhu ngoco, kati mu viukilile muomu vasipilitu vali naku miononoka, vunoni viukililenu muomu mazina enu, va na asoneka muilu.”
21 Ha ola ize vene, sipilitu santu ya lingisile Yesu ku viukilila mua kama, kaha ua handekele nguendi: “Nji ku sangaziala ha mbunga Tata, Muangana ua melu na mavu, muomu una suekela vuino evi viuma kuli vakua mana na vakua ku lilongesa, vunoni una vi soluela vanike vavandende. Omo vene, Tata, muomu mukemuo munayi cizango cove.
22 Tata na nji hana viuma viose, kaha na umo uahi a tantekeya vuino Muana, kuvanga Ise. Cikuavo naua, uahi a tantekeya vuino Ise kuvanga Muana, na uze ya tonda ku mu soluela Muana.”
23 Ngeci ua tengulukile ku vandongesi vendi, naku va leka kua likaliavo nguendi: “A vezika meso ali na kumona viuma vi muli na kumona.
24 Muomu nji mi leka nguange, vapolofeto vavengi na vamiangana vakele na cizango ca ku limuena viuma vi muli na kumona, vunoni ka vavi muene. Va tondele naua mua kama kuivua vi muli na kuivua, vunoni ka va vivuile.”
25 Haze vene, umo yala ua tantekeyele vuino Masiko uezile linga a kueseke Yesu. Ua muihuile nguendi: “Mulongisi, vika nja pande kulinga nji ka uane muono ka ue kuhua?”
26 Yesu ua muihuile nguendi: “Vika va soneka mu Masiko? Vika ue ku tandamo?”
27 Uze yala ua kumbuluile nguendi: “Ua pande kulema Yehova* Njambi yove na mutima uove uose, na muono uove uose, na ndzili yove yose, na mana ove ose.’ Kaha na ‘kulema mukuenu ngue mu ua lilema ove vavenya.’”
28 Yesu ua mu lekele nguendi: “Una kumbulula vuino. Tualelelaho kulingamo, kaha uka uana muono.”
29 Vunoni mu kulinga ua tondele ku limuesa kupua mukua vuviuke, uze yala uehuile Yesu nguendi: “Mukuetu uaco honi uapua iya?”
30 Yesu ua mu kumbuluile nguendi: “Umo yala uakele na kutunda ku Yelusalema naku sikuluka ku Yeliko. Kaha ua liuanene na mihuza* va mu tambuile viuma viose naku mu pupa. Va mu sile alingila kutsa.
31 Umo sasendote uakele naku sikuluka mu njila yaco vene, vunoni mua mu muene, ua muongolokele.
32 Umo kaLevi naua nendi mua hetele ha cihela caco, ua mu muene, vunoni ua muongolokele.
33 Vunoni umo mukua Samaliya nendi ua hitile mu njila yaco, kaha ua mu uanene. Mua mu muene, ua mu vuilile ngozi.
34 Ngeci ua mu suenene, ua hakele mazi na vinyu ha vimbandu viendi, naku kutaho. Mu nima yaco, ua mu londekele ha cimuna cendi naku mu tuala ku ndzivo ya ku tulila vangendzi naku mu niunga.
35 Lia mukuavo, ua nonele videnariu vivali naku vi hana kuli vavenya ndzivo nguendi: ‘Mu niunge vuino. Kaha viose-ovio viu vuezelelaho mu ku mu kuasa, nja ku ku fuetavio mu nji ka hiluka.’
36 Mu kumona cove, hali ava vatatu, iya ua puile mukuavo ua uze ua liuanene na mihuza?”
37 Ua kumbuluile nguendi: “Uze ua mu muesele cikeketima.” Ngeci Yesu ua mu lekele nguendi: “Nove ya kalinge ngoco vene.”
38 Mu vakele na kuya, Yesu ua kovelele mu limo limbo. Kaha umo mpuevo lizina liendi Mata, ua mu tambuile ku ndzivo yendi.
39 Mata uakele na ndumbuendi, lizina liendi Maliya, uze ua tumamene ku mikono ya Muangana, mu ku halakana viakele naku handeka.*
40 Vunoni Mata ua tangukile na vipanga via vingi. Ngeci uezile kuli Yesu naku mu leka nguendi: “Muangana, nkuma ka ua muene nguove ntsongo yange na njiondomuena vipanga lika liange? Aci muleke aku nji kuaseko.”
41 Vunoni Muangana ua mu kumbuluile nguendi: “Mata, Mata, uli naku lisosomua naku tanguka na viuma viavingi cikuma.
42 Viuma via vindende lika tu tondeka, ambe cimolika. Maliya na hangula mutamba ua cili, kaha ka vaka mu tambulauo.”
Matota
^ Ni “vipanga”
^ Ni “vakua kupanga”
^ Ni “kati mu vumbatele muntu mu ku limeneka”
^ Ni “Hades” ya lomboloka Vihilo via vantu vose.—Talenu Mezi ava Lombolola
^ Talenu Mizimbu ya ku Vuezako
^ Ni “vambanditu; vikelemi”
^ Mu ciNgelengu “ku lizi liendi.”
