Kuhitila Muli Luka 11:1-54
11 Tangua limo, Yesu uakele ku cimo cihela mu kuvundila. Mua manusuile, umo ua vandongesi vendi ua mu pingile nguendi: “Muangana tu longese kuvundila ngue mua lingile Yoano na vandongesi vendi.”
2 Ngeci Yesu uava lekele nguendi: “Ntsimbu yose imu vundila handekenu nguenu: ‘Tata, va lelese lizina liove.* Vuangana vuove vuize.
3 Tuhane viakulia* vi tue ku tondeka tangua na tangua.
4 Tu konekele ku vipi vietu, muomu netu tue ku konekela vose ve ku tu vulumuina. Kaha tu kuase kuvula vieseko.’”
5 Kaha uava lekele naua nguendi: “Singaniekenu nga umo uenu ali na umo kavusamba, kaha ayako mukati ka vutsiki nguendi, ‘Kavusamba nji levaleseko* vimbolo vitatu,
6 umo kavusamba kange na tundu ku lahako, na tulila ku ndzivo yange hano vene. Kaha kanjesi na vimo viahi via ku mu zumbula.’
7 Vunoni uze kavusamba amu kumbuluila mu ndzivo nguendi: ‘Kati unji tanganese. Nja pata laza ku mbelo. Kaha nji na kosa laza na vana vange. Ngeci mukemuo ka nji hasa ku hinduka njaku ku hane vimo.’
8 Nji mi leka nguange, aka hinduka naku mu hana viose via tonda, kati lika omo lia kupua kavusamba kendi, vunoni omo lia lukakatela luendi na kusimpa.
9 Ngeci mukemuo, nji mi leka nguange, tualelenuho kulomba kaha vaka mi hana, tualelenuho kutonda kaha mu ka uana, tualelenuho ku ngongota* kaha vaka mi sokoluela.
10 Uose alomba vaka mu hana, uose atonda aka uana, kaha uose a ngongota vaka mu sokoluela.
11 Cisemi muka hakati kenu, nga muana amu lomba intsi, ikeye amu hana linoka?
12 Ni amu vundila livunda, ikeye amu hana linyeue?
13 Ngeci mukemuo, nga yenu vakua vupi, mu tantekeya kuhana viuma via cili ku vana venu, mua vusunga, Tata ua muilu aka hana sipilitu santu kuli vaze va mu vundilayo!”
14 Mu nima ya ntsimbu, Yesu ua tundisile ndemone ua lingisile umo yala kupua kaveveve. Mua tundile ndemone uaco, uze kaveveve ua putukile ku handeka, kaha mbunga ya likomokelele mua kama.
15 Vunoni vamo va handekele nguavo: “Ou yala ali naku tundisa vandemone na ngolo ya Mbelesembulu,* muangana ua vandemone.”
16 Vakuavo co mu ku mueseka, va putukile kuvundila citantekeyeso ca muilu.
17 Mu kulinga Yesu ua tantekeyele visinganieka viavo, ua handekele nguendi: “Nga vuangana vu litengulukila vuvenya vue kunonga, ambe ndzivo nga ilitengulukila, ye ku lisanduoka.
18 Na vuno vene, nga Satana a litengulukila vavenya vati vuangana vuendi vu kaniama? Muomu muli naku handeka nguenu njili naku tundisa vandemone na ngolo ya Mbelesembulu.
19 Nga yange njili naku tundisa vandemone na ngolo ya Mbelesembulu, amba vana* venu co, vali naku va tundisa na ngolo yeya? Vikevio viva ka mi sompesela vana venu.
20 Vunoni nga njili naku tundisa vandemone na munie ua Njambi, kaha Vuangana vua Njambi vua mi uana mu ku tungumuna.
21 Nga yala ua ndzili na lipatakana vitua mu kuniunga nganda yendi, kaha vitenga viendi uahi avi kuata.
22 Vunoni nga muntu ua mu hiana ndzili eza mu ku mu luisa naku mu vula, amu nyeka vitua viendi viose via kulahela, naku tepelako vakuavo viuma via na mu tambula.
23 Uose kesi ku mutamba uange, napu citozi cange, kaha uose kesi naku kungulula nange, ali naku sanduola.
24 Sipilitu ua kuzuala mue kutunda mu muntu, ue kuya na kuendangana ku vihela kakuesi mema, mu kutonda kua kutulila, vunoni nga ka uaneneko, a handeka nguendi: “Nji hiluka ku ndzivo yange ku nja tundile.’
25 Mua ka hetako, aka uana mu ndzivo mua kukomba kaha va na viukisamo vuino.
26 Kaha uze sipilitu aya naku kambata vakuavo 7 va kuzuala cikuma kuhiana ikeye, kaha va kovela naku kalamo. Ngeci mukemuo, muono ua uze muntu u vihia cikuma-kuma kuhiana ha katete.”
27 Ntsimbu Yesu uakele naku handeka evi viuma, umo mpuevo uakele mu mbunga ua tambakanene nguendi: “Ua vezika mpuevo uze ua kuimitile naku kuamuesa!”
28 Vunoni Yesu nguendi: “Houe, va vezika vaze vevua lizi lia Njambi naku liononoka!”
29 Omo mbunga yakele naku likunguluila hamo, Yesu ua putukile ku handeka nguendi: “Ou muyati unapu muyati ua kuvihia, vali na kutonda citantekeyeso, vunoni ka vaka vamuesa citantekeyeso na cimo cahi, kuvanga lika cize ca Yona.
30 Muomu ngue muze Yona uapuile citantekeyeso kuli vakua Ninive, Muana muntu nendi akapua citantekeyeso ku muyati ou.
31 Lisano ua ku sulu aka sangukila hamolika na vantu va uno muyati, vunoni aka va hisa, muomu ikeye ua tundile kuze kua lenga mavu linga aku halakane ku mana a Solomone. Vunoni uze ua hiana Solomone ku vukama, ali hano.
32 Ha ku sompesa, vakua Ninive vaka sangukila hamo na uno muyati, vunoni vaka uhisa, muomu valulukile omo Yona ua vambuluilile. Vunoni talenu! Uze ua hiana Yona ku vukama, ali hano.
33 Na umo uahi ueku suameka ndeya kaha a isueka ni ku ifuika na civuvi, vunoni ve ku itumbika helu lia citumbiko ca vindeya linga vose va kovela mukati va mone ceke.
34 Ndeya ya muvila yapua liso liove. Nga liso liove limona mua cili, kaha muvila uove uose utua ceke. Vunoni nga liso liove lili na cipululu,* kaha na muvila uove ukala mu milima.
35 Ngeci mukemuo, zangama! Linga ceke ci li muli yove kati cipue milima.
36 Cikuavo naua, nga muvila uove uose utua ceke, ca kuhona umo mutamba kukala mu milima, kaha muvila uove ukatua ceke ca kama, ngeci mua ndeya mu ye ku kutuila ceke.”
37 Mua manesele ku handeka evi, umo kaFaliseu ua mu laniene linga akalie nendi. Ngeci Yesu ua kovelele mu ndzivo yendi na kutumama ku mesa.
38 Vunoni uze kaFaliseu ua komokele mua muene Yesu ka livangele kutana ku mavoko* ntsimbu kanda alie.
39 Vunoni Muangana ua mu lekele nguendi: “Enu vaFaliseu mue kukusa ha mbandza ya ngandza na lilonga, vunoni mukati mua sula lizangamena na vupi.
40 Enu viheve! Uze ua tangele ha mbandza, kati ikeye naua ua tangele mukati?
41 Omo mu hana vuana* ku vihutu, hanenu vize vi tundilila ku mutima, kaha mu kapua va kulela mu viuma viose.
42 Vunoni ngongo yenu, enu vaFaliseu, muomu mue kuhana cimo ku likumi ca oletela, na alunda kaha na visoka vikuavo viose, vunoni mue ku sembulula vuoloke na cilemo ca Njambi! Evi vikevio tele vi mua pande kulinga, ca kuhona ku sembulula vikuavo.
43 Ngongo yenu enu vaFaliseu, muomu mua lema kutumama ha vituamo via ku lutue* mu visinangonga, naku mi meneka ha vitanda!
44 Ngongo yenu, muomu muapua ngue vihilo vize ka vie kusoloka,* kaha vantu ve kuendaho ca kuhona ku tantekeya!”
45 Ngeci umo ua vaze va tantekeyele vuino Masiko, ua mu kumbuluile nguendi: “Mulongisi, mu ku handeka ngoco netu uli naku tu sahuila kumo.”
46 Vunoni ikeye ua handekele nguendi: “Nenu vene mu tantekeya vuino Masiko, ngongo yenu, muomu mue kutuika vakuenu viteli via kulema, vunoni ka mue ku kuatako cipue ku salekako munie!
47 Ngongo yenu, muomu mue kutunga vihilo via vapolofeto, vunoni vakukuluila venu vakevo vava tsihile!
48 Cili vene, enu mu vakaleho va viuma viva lingile vakukuluila venu, vutuhu ngoco mue ku vi sambeya. Muomu vakevo va tsihile vapolofeto kaha enuco, muli naku va tungila vihilo.
49 Ngeci Njambi ku mangana endi ua handekele nguendi: ‘Nji ka tuma vapolofeto na vapostolo kuli vakevo, kaha vamo vaka va tsiha naku va yandesa,
50 linga va fuetese uno muyati maninga a vapolofeto vose, ava muanyene tunde ha kutanga ca mavu.
51 Cili vene, ku putukila ha maninga a Avele kutuala ha maninga a Zakaliya, uze iva tsihilile hakati ka mutula na tembele.’ Mua vusunga, nji mi leka nguange, vaka a fuetesela* ku uno muyati.
52 “Ngongo yenu enu mu tantekeya vuino Masiko, muomu mu na nyeka vantu sapi ya mana. Enu ka mua kovelele, vunoni naua muli naku vindika vaze vatonda ku kovela!”
53 Kaha Yesu mua tundile muze mu ndzivo, vakua kusoneka na vaFaliseu va putukile ku mu pakesa mua kama, oku va muihula viavingi
54 naku mu tela likambuila linga va mu kuatele ha viuma via handeka.
Matota
^ Ni “va limone kupua lia kulela.”
^ Mu ciNgelengu “mbolo”
^ Ni “nji kongueseko”
^ Ni “ku totola”
^ Eli lizina ve ku lipangesa mu ku tumbula Satana, uze ua pua mukua ku sika vandemone ni muangana uavo.
^ Ni “vandongesi”
^ Mu ciNgelengu “lia ku vihia”
^ Ca lomboloka kutana ku mavoko kuliya na cisemua cavo.
^ Ni “vuana vua cikeketima.” —Talenu Mezi ava Lombolola
^ Ni “via cili cikuma”
^ Ni “vize ka viakele na citantekeyeso”
^ Ni “va ka a tondela”
