Kuhitila Muli Luka 12:1-59
-
Cimbaluila ca vaFaliseu (1-3)
-
Vuilenu Njambi liova kati vantu (4-7)
-
Kutava Kilistu (8-12)
-
Cisimo ca mpite ua ciheve (13-21)
-
Likelenu ku lisosomua (22-34)
-
Vutanga vua vundende (32)
-
-
Kuvingila (35-40)
-
Mukuamanda ua lutsilielo na mukuamanda ua kuvihia (41-48)
-
Kati ciyulo, vunoni matepeso (49-53)
-
Seho ya kuhilula vintsimbu (54-56)
-
Ku manusula vimpande (57-59)
12 Ha ntsimbu ize vene, makulukazi na makulukazi a vantu va likunguluile hamolika, oku va litsikinina naku liliatangela umo na mukuavo, kaha Yesu ua livangele ku handeka na vandongesi vendi nguendi: “Zangamenu na cimbaluila ca vaFaliseu ni nguetu civembulu cavo.
2 Vunoni kakuesi cuma ca kusueka vuino, cintsa ka vaka solola. Cikuavo naua, kakuesi lihungu na limo liahi ka vaka tantekeya vantu.
3 Ngeci mukemuo, viose vi mu handeka mu milima vaka vi handeka mutana muelu. Kaha vize vi mu liyevetela mu vihondo vaka viambuluila ku mbunga.*
4 Cikuavo naua, vavusamba vange nji mi leka nguange, kati mu vuile liova vaze va tsiha muvila, vunoni ku tundaho nevi viva hasa kulinga naua viahi.
5 Vunoni nji mi leka iya imua pande kuvuila liova: “Vuilenu liova, uze ua kulinga mu nima ya kutsiha ali na mpoko ya kumbila mu Ngehena.* Cili vene, nji mi leka nguange, ikeye imua pande kuvuila liova.
6 Kati ve kulandesa tundzilili vatanu na tumbongo tuvali tua ndando ya indende* ni? Vunoni na umo uahi ive kusuva kuli Njambi.
7 Vunoni ambe vinkambu via ku mitue yenu, viose vavi tanda laza. Kati muivue liova. Enu muakala na seho kuhiana tundzilili vavengi.
8 “Nji mi leka nguange, uose anji tava ku meso a vantu, na Muana muntu aka mu tava ku meso a tungelo va Njambi.
9 Vunoni uose anji viana ku meso a vantu, nendi vaka mu viana ku meso a tungelo va Njambi.
10 Uose a handeka mua ku vihia Muana muntu, vaka muecela, vunoni uose a sahula sipilitu santu, ka vaka muecela.
11 Omo vaka mi tuala ku meso a mbunga,* kuli vakua nguvulu na vakua kusika, kati muka lisosomue na vika muka handeka ni vati muka handeka mu ku lihakuila, ni vati muka va kumbulula,
12 muomu ha ola ize vene, sipilitu santu ika mi longesa viuma vi muka handeka.
13 Kaha umo mu mbunga ua handekele nguendi: “Mulongisi, leka muanetu a litepele nange vusuana.”
14 Yesu ua mu kumbuluile nguendi: “Ove yala, iya na nji puisa ngazi ni mukua kutepela viuma hakati kenu?”
15 Kaha uava lekele nguendi: “Tonenu kaha liniungenu ku lizangamena* liose, muomu ambe nga muntu uakala na viuma viavingi, viuma viaco ka vi hasa ku mu hana muono.”
16 Mu nima yevi, ua va telele cimo cisimo nguendi: “Lihia lia umo mpite liemine mua kama.
17 Ngeci ua putukile ku singanieka nguendi: ‘Vati honi nji linga omo kanjesi na ha ku tulikila vimbuto viange?’
18 Kaha ua handekele nguendi, ‘Nji linga muze: nji puzula visete viange linga nji tunge via kama. Mukemuo mu nji ka haka vimbuto na viuma viange viose.
19 Kaha nji ka lileka ange vavenya nguange: “Uli na viuma viavingi via cili, vi uhasa ku pangesa mu miaka yayingi. Ngeci mukemuo, huima honi, lia, nua, livuise ndzolela.”
20 Vunoni Njambi ua mu lekele nguendi, ‘Ove ciheve, vutsiki vua lelo vene va kutambula muono uove. Amba iya a sala na viuma viu na likunguluila?’
21 Vikevio vika solokela muntu uze a likunguluila vupite, vunoni ku meso a Njambi kati mpite.”
22 Kaha ua lekele vandongesi vendi nguendi: “Ngeci mukemuo nji mi leka nguange, likelenu ku lisosomua na muono uenu kutuala ha vika mu kalia, ni na muvila uenu kutuala ha vika mu zala.
23 Muomu muono uakala na seho ku tuvakana viakulia, na muvila kuhiana vuzalo.
24 Aci talenu makololo: Ka ve kukuna cipue kutia.* Kaha ka vakele na ndzivo ya ku tulikila ni cisete, vunoni Njambi ueku va suka, nkuma enu ka muakele na seho ku tuvakana tuzila ni?
25 Iya hakati kenu omo lia ku lisosomua, a hasa ku vueza ku matangua a muono uendi?
26 Nga via vindende muli naku vi honoua, kaha vika mu lisosomuena na viuma vikuavo?
27 Talenu mu vie kusoka vintemo, ka vie kupanga cipue ku litongela vuzalo.Vunoni mua vusunga nji mi leka nguange ambe vene Solomone mu vumpahu vuendi vuose ka zalele ngue imo yavio.
28 Enu vakua lutsilielo lua lu6ndende, nga Njambi ue kuzika visoka via mu musenge, viliko lelo kaha imene va vitsimika, singaniekenu honi yenu, vaka mi zika mua kama ku tuvakana vikevio!
29 Ngeci likelenu ku lisosomua na viakulia na via kunua, kaha likelenu ku sakalala cikuma mutima.
30 Muomu viuma viose evi vikevio vi ve kutonda cikuma vakua mavu, vunoni Iso a tantekeya ngecize mu tondeka viuma viaco.
31 Ngeci mukemuo, tualelenuho kutonda Vuangana vuendi, kaha evi vikuavo vaka mi vuezelelavio.
32 “Kati muivue liova, enu vutanga vua vundende, muomu Iso na viukilila ku mi hana Vuangana.
33 Landesenu viuma vienu kaha hanenu vuana vua cikeketima. Tongenu vinjeke via vimbongo, vize ka vi hasa ku tavuka, ni nguetu, vupite vuze ka vu kahu vua muilu, muze mua kulinga ambe vezi ka va hasa ku suenako, ni tulongolo ku vu vihisa.
34 Muomu kuze kuli vupite vuove, kukekuo kuka kala mutima uove.
35 Zalenu naku liviukisila vualumo na vindeya vienu vi suame,
36 Puenu ngue vantu vaze vali naku vandamena sukuluavo ali na kutunda ku cilika ca vulo. Linga omo aheta naku ngongota ha mbelo, va mu sokoluele ha ntsimbu ize vene.
37 Va vezika vangamba vaze omo sukuluavo eza, ava uana mu kuvingila! Nji mi leka vusunga nguange, aka zala vizalo viendi via vipanga, kaha aka va leka va tumame ku mesa na kuputuka ku va pangela.
38 Va vezika nga sukuluavo ava uana va liviukisila laza, ambe nga aheta ku cilo ca mu civali* ni ca mu citatu.*
39 Vunoni tantekeyenu ngecize nga vavenya ndzivo na zivuka ntsimbu yeza muizi, nga ka tavesa va punde mu ndzivo yendi.
40 Ngeci mukemuo, nenu vene liviukisilenu vualumo, muomu Muana muntu akeza ha ola ize ka mua singaniekele.”
41 Ngeci Petulu ua muihuile nguendi: “Muangana, eci cisimo una ci tela yetu lika ni vantu vose?”
42 Kaha Muangana ua handekele nguendi: “Iya mpundu mukuamanda* ua lutsilielo na mana, ya ka hangula sukuluendi mu kuniunga vakua kupanga ku ndzivo yendi, naku tualelelaho ku va hana viakulia ha ntsimbu ina pande?
43 Na vezika mukuamanda uaco, nga sukuluendi mua ka hiluka aku mu uana ali naku lingamo!
44 Nji mi leka vusunga nguange, aka mu hangula linga amu niungile vikuata viendi viose.
45 Vunoni nga mukuamanda uaco, a handeka mu mutima nguendi: ‘Sukulu ali naku simbula’ kaha a putuka kuveta vangamba va vamala na va vampuevo, na kulia na kunua na kupenda,
46 sukuluendi aka heta ha litangua lize ka mu lavelelele na ha ola ize ka tantekeya, kaha aka mu hana kasitiku ka kama, naku mu haka hamo na vaze ka ve kuononoka.
47 Kaha uze ngamba ua tantekeyele cizango ca sukuluendi vunoni ka liviukisilile ni kulinga vize via mu lombele, aka mu veta makote a engi.
48 Vunoni uze ngamba kevuisisile cizango ca sukuluendi kaha alinga viuma via pande kasitiku, vaka mu veta makote a andende. Mua vusunga uose uze iva na hana viavingi, vaka tonda naua viavingi kuli ikeye. Cikuavo naua, uose iva na kundika viteli viavingi, kuli ikeye vaka tonda naua viavingi mu kuhiana.
49 “Njezile mu ku suameka tuhia ha mavu, kaha nga tuhia tuaco tua suama laza, vika naua nji tonda?
50 Cili vene, njili na mbatizimu iva na pande ku nji mbatiza, kaha nja lisosomua cikuma noho ha ika huila!
51 Enu nguenu njeza mu ku neha ciyulo hano ha mavu ni? Houe, nji mi leka nguange, nja neha matepeso.
52 Muomu tunde hano, vantu vatanu va mu ndzivo imo lika vaka litepa. Vatatu vaka luisa vavali kaha vavali vaka luisa vatatu.
53 Vaka litepa, cisemi ua yala aka luisa muanendi ua yala, muana ua yala aka luisa ise. Cisemi ua mpuevo aka luisa muanendi ua mpuevo, na muana ua mpuevo aka luisa naye. Nayemueno ya muntu aka luisa mpuevo ya muanendi, na mpuevo ya muana aka luisa nayemueno.”
54 Kaha ua lekele naua mbunga nguendi: “Mu mue ku mona liselua li tunda muyatangua, haze vene mue ku handeka nguenu, ‘Niondzi ya kama ili na kuiza,’ kaha mukemuo vene mu ce kufua.
55 Kaha mu mue kumona mpundzi ya ku sulu ina katuka, mue ku handeka nguenu, ‘Lelo kukala ntuima ya kama’ kaha ye ku kalako vene.
56 Enu vakua civembulu, mu tantekeya ku hilula vati anafu mavu na kuilu, vunoni vika ka mu tantekeyela ku hilula ntsimbu ino?
57 Omo lia vika ka mue kuhasa ku linongonuena enu vavenya viuma via vuviuke?
58 Ca ku muenako, nga nove na mukuenu mu mu na livulumuina, muli naku tuala cimpande cenu kuli mukua kusika, lihakele kapandi ka ku manusula cimpande caco ntsimbu mu ci li mu njila. Linga kati aku tuale kuli ngazi, kaha ngazi aka ku hane kuli musipayi,* kaha musipayi aka ku soke mu kamenga.
59 Nji kuleka nguange, ka vaka ku tuhulamo, kuvanga una fuete kambongo* kove ka ku manusuila.
Matota
^ Mu ciNgelengu “helu lia vindzivo.”
^ Talenu Mezi ava Lombolola
^ Mu ciNgelengu “Assarion.” Ku ntsimbu ize Assarion ikeyo i vakele na kufueta ku muntu na panga mu viminutu 45.
^ Ni “visinangonga”
^ Ni “ku sunguiya via mbala”
^ Ni “kuungula.”
^ Ca lomboloka kutunda ha ola 21 kutuala mukati ka vutsiki.
^ Ca lomboloka ku tunda mukati ka vutsiki ku tuala ha ola 3 ya ku vandemba.
^ Ni “kasongo, mukua kutala via ha ndzivo”
^ Ni “kapaso”
^ Mu ciNgelengu “Lepton ya ku manusuila”
