Kuhitila Muli Luka 13:1-35
-
Alulukenu kati ngoco muka nonga (1-5)
-
Cisimo ca muti ua mukuyu ka ue kuima (6-9)
-
Mpuevo ua kuzembama muongo va mu kanguisa lia Sapalalo (10-17)
-
Cisimo ca nona ya musalata na cimbaluila (18-21)
-
Kapandi ka tondeka ka kukovela mu mbelo ya indende (22-30)
-
Helonde, “uze mbandze” (31-33)
-
Yesu alilila Yelusalema (34, 35)
13 Ha ntsimbu ize kuakele vamo vakele kuze, va lekele Yesu via vakua Ngalileya va tsihile Pilato mu vakele na kuhana vikombelo viavo.
2 Kaha uava kumbuluile nguendi: “Muli naku singanieka nguenu omo lioyo lamba iva muene, vapuile vakua vupi cikuma kuhiana vakuavo vakua Ngalileya vose ni?
3 Houe, nji mi leka nguange, kuvanga mualuluke, kati ngoco nenu vose muka nonga.
4 Ni muli naku singanieka nguenu, vaze vantu 18 va tsile mu vua va lundumukilile vutala ku Siloame, vapuile vakua vupi cikuma kuhiana vakua Yelusalema vose ni?
5 Houe, nji mi leka nguange, ku vanga mualuluke, kati ngoco nenu vose muka nonga, ngeci muavo.”
6 Kaha uava telele cino cisimo nguendi: “Umo yala ua tombekele mukuyu mu lihia liendi lia vinyu, kaha ua ileko mu kutonda vusuka, vunoni ka uaneneko na vumo vuahi.
7 Kaha ua lekele mukua kupanga mu lihia lia vinyu nguendi: ‘Uno muaka, unapu ua mu citatu honi tunde ha nja putukila kuiza kuno ku mukuyu mu kutonda vusuka, vunoni nevi vi nje ku uanako viahi. Utekeho! Muomu vika u vihisila livu?’
8 Vunoni uze mukua kupanga ua mu kumbuluile nguendi: ‘Sukulu aci uecele naua muaka umo, linga nji uhinde ku mikulo naku hakako vuilo.
9 Nga ku lutue ukema vusuka, mua cili, vunoni nga kuahi kaha uka uteka.’”
10 Yesu uakele naku longesa mu imo sinangonga lia Sapalalo.
11 Muakele umo mpuevo uakele na sipilitu ua kuzuala* ua mu vavalesele mu miaka 18, mpuevo uaco ua zembamene muongo kaha ka hasele ku hetuka cipue kamandende.
12 Yesu mua mu muene, ua mu lekele nguendi: “Ove mpuevo, una patuka ku vuvezi vuove.”
13 Ngeci ua mu salekele mavoko, kaha haze vene uze mpuevo uolokele na kuputuka ku zumbangeya Njambi.
14 Vunoni ntuamena ua sinangonga ua nienguele muomu Yesu ua kanguisile muntu lia Sapalalo, ngeci ua lekele mbunga nguendi: “Kuakala matangua 6 ave kupanga vantu, akeo amua pande kuiza linga va mi kanguise, kati lia Sapalalo.”
15 Ngeci Muangana ua mu kumbuluile nguendi: “Enu vakua civembulu, iya hakati kenu ke ku zitula ngombe ni cimulu cendi lia Sapalalo, linga amu tuale mu kunua mema?
16 Amba ou mpuevo, muana Avilahama ya kutile Satana mu miaka 18, nkuma ka citava ku mu patula lia Sapalalo ni?”
17 Yesu mua handekele ngoco, vakua ku mu luisa vose vavuile ntsuamua, vunoni mbunga yose ya viukilile mua kama, omo lia viuma via ku komouesa via lingile.
18 Ua tualeleho ku handeka nguendi: “Vuangana vua Njambi vua lifua na vika? Ku vika nji hasa ku vu setekesa?
19 Vunapu ngue nona ya musalata,* ya ambatele umo yala naku ikuna mu citungu cendi, mbuto yaco ya kolele na kupua muti, kaha tuzila vezile mu kua kutunga masua ku muntango yauo.”
20 Ua handekele naua nguendi: “Vuangana vua Njambi nji vu setekesa ku vika?
21 Vunapu ngue cimbaluila cambatele umo mpuevo naku ci shinga na vunga vua ku lingisa mbolo, mu vivela via kama vitatu* noho ha vua futunukilile vuose.”
22 Yesu uaile na kuendangana mu mbonge ku mbonge na limbo ku limbo, mu ku longesa oku ali mu vungendzi vuendi vua kuya ku Yelusalema.
23 Kaha umo yala ua muihuile nguendi: “Muangana, nkuma vavandende lika va kovoka?” Yesu ua va kumbuluile nguendi:
24 “Lihakelenu kapandi ka kama linga mu kovele mu mbelo ya indende, muomu nji mi leka nguange, vavengi vaka tonda ku kovelamo, vunoni ka vaka hasa.
25 Omo vavenya ndzivo aka katuka na kupata ku mbelo, enu mu kemana ha mbandza mu ku ngongota nguenu, ‘Muangana tu sokolueleko.’ Vunoni aka mi kumbulula nguendi: ‘Ka nji tantekeya ku mu tunda.’
26 Kaha muka putuka ku handeka nguenu: “Tua lile na kunua ku meso ove, kaha uakele naku longesa vantu mu vitapalo via kama via mu mbonge yetu.’
27 Vunoni aka mi leka nguendi: ‘Ka nji tantekeya ku mu tunda. Tundenu omu, enu vakua kulinga vuhenge!’
28 Hakeho ha ka kala kulila cenu naku lisumanga ku mazo, omo muka mona Avilahama, Isake, Yakomba, na vapolofeto vose vali mu Vuangana vua Njambi, vunoni enu vaka mi mbila hambandza.
29 Cikuavo naua, vantu vaka tunda ku vucelo naku vutokelo, ku nolote naku sulu, kaha vaka tumama ku mesa mu Vuangana vua Njambi.
30 Halakanenu! kuli vantu va ku manusuila va kapua va ku livanga, kaha kuli vaze va ku livanga va kapua va ku manusuila.”
31 Ha ola ize vene, vamo vaFaliseu vezile kuli Yesu naku mu leka nguavo: “Tunda kuno, ya ku cihela ceka, muomu Helonde atonda ku kutsiha.”
32 Yesu uava lekele nguendi: “Yenu muka leke uze mbandze nguenu, ‘Tala! Lelo na imene, nji ci tundisa vandemone naku kanguisa vantu, kaha nji ka manusula ha litangua lia mu citatu.’
33 Vutuhu ngoco, nja pande ku tualelelaho na vungendzi vuange lelo, imene na imeneavuze, muomu ka citava kapolofeto va mu tsihile ha mbandza ya Yelusalema.
34 Yelusalema, Yelusalema, mukua kutsiha vapolofeto na kuasa mavue vaze va veku mu tuma. Vintsimbu viavingi, nja tondele ku kungulula vana vove, ngue kasumbi mue ku kunguluila tupiyo vendi mu mavava, vunoni ka ua tavele.
35 Talenu! Ndzivo yenu va mi silayo mu ngundu. Nji mi leka nguange, ka muka nji mono naua noho ha muka handeka nguenu: ‘Ua vezika uze eza mu lizina lia Yehova!’”*
Matota
^ Ni “sipilitu ue ku tengula”
^ Kambuto kandende ka ku Palestina. Ka hasa kukola na kupua muti ua laha uheta ku 4 metru.
^ Mu ciNgelengu “seteko ya seya. Seya imo yapuile matulu 7.33”
^ Talenu Mizimbu ya ku Vuezako
