Kuhitila Muli Luka 14:1-35
14 Ha ntsimbu ikuavo, Yesu uaile mu kulia ku ndzivo ya umo mukuluntu ua vaFaliseu lia Sapalalo. Kaha vakele naku mu tala cikuma.
2 Ha lutue luendi, hakele umo yala uakele na musongo ua kuzimba muvila.
3 Ngeci Yesu uehuile vaze va tantekeyele vuino Masiko na vaFaliseu nguendi: “Vuno va tavesa ku kanguisa muntu lia Sapalalo ni kuahi?”
4 Vunoni vakevo va holokele kulu. Ngeci Yesu ua kuatele uze yala, ua mu kanguisile naku muleka aye.
5 Kaha ua vehuile naua nguendi: “Iya hakati kenu nga muanendi ni ngombe yendi a uila mu lisima, lia Sapalalo, kaka mu tundisamo vuasi-vuasi?”
6 Vunoni ka va hasele ku mu kumbulula.
7 Yesu mua muene vaze vava laniene va lihanguila vihela via vukama, uava telele cisimo nguendi:
8 “Nga muntu na kulania ku cilika ca vulo, kati uka tumame ha cituamo ca vukama. Muomu halumo na lania umo mukua vukama ku tuvakana yove.
9 Kaha uze na mi lania a kuleka nguendi, ‘Katuka, sila cituamo ou yala.’ Ngeci uka katuka na ntsuamua yove linga uka tumame ku cihela ca ku nima.
10 Vunoni nga va na kulania, ya uka tumame ku cihela ca ku ntsongo, linga mua heta uze na kulania akuleke nguendi, ‘Kavusamba, ya ka tumame ha cize cihela ca vukama.’ Kaha vakuenu vose vava na lania, vaka ku singimika.
11 Muomu uose a lihaka ku vukama, vaka mu kehesa kaha uose a likehesa vaka mu haka ku vukama.”
12 Kaha Yesu ua lekele naua uze yala ua mu laniene nguendi: “Nga u viukisa viakulia via mutania ni via cinguezi, kati u lanie lika vavusamba vove, vamuanoko cipue vavusoko vove ni vakuenu vampite va ua tunga navo. Kutina halumo navo vaka kulania linga va ku fuete.
13 Vunoni nga u viukisa lizumbu, lania vihutu, vilema, vakua kutenguka na tupuputa;
14 kaha ukevua ndzolela muomu kavesi na via ku kufueta. Cikuavo naua, uka tambula fueto yove, ha cisangukilo ca vakua vuviuke.”
15 Kaha umo ua vaze vava laniene muevuile ngoco, ua lekele Yesu nguendi: “Ua vezika uze akalia ku lizumbu lia mu Vuangana vua Njambi.”
16 Yesu ua mu kumbuluile nguendi: “Umo yala ua vuahesele cilika cakama ca cinguezi, kaha ua laniene vantu vavengi.
17 Mu ya hetele ola ya kulia ca cinguezi, ua tumine ngamba yendi aka sane vaze va laniene nguendi, ‘Tuayenu, muomu viose vinahi laza.’
18 Vunoni vose va putukile kusanguluka. Ua kulivanga ua mu lekele nguendi, ‘Nja landa lihia ngeci nja pande kuyako njika limone. Nji konekeleko.’
19 Mukuavo ua handekele nguendi, ‘Nja landa vangombe 10 kaha nja pande kuyako njika vatale nga vali vuino. Nji konekeleko.’
20 Mukuavo naua ua handekele nguendi, ‘Vuovuno vene nji nambata* mpuevo ngeci ka nji hasa kuyako.’
21 Ngeci uze ngamba ua hilukile, naku zimbula viuma viose evi kuli sukuluendi. Kaha sukuluendi ua nienguele muakama, ngeci ua lekele uze ngamba nguendi, ‘Zangulako, ya mu vitapalo via kama na via vindende via mu mbonge, uka nehe vihutu, vilema, tupuputa na vakua kutenguka.’
22 Mu nima ya ntsimbu, uze ngamba ua handekele nguendi, ‘Sukulu, nja lingi viose vi ua nji tumu, vunoni kasi vene kua lisupu vihela.’
23 Kaha Sukuluendi ua mu lekele nguendi, ‘Ya mu vitapalo na mu vinjila, linga uka kokueye vantu veze, va ku sulise ndzivo yange.
24 Muomu nji mileka nguange, na umo uahi ua vaze vanji na laniene, aku makela ku viakulia viange.’”
25 Vuno mbunga ya kama yakele naku mu kava, ngeci ua tengulukile naku valeka nguendi:
26 “Nga muntu eza kuli yange vunoni kazindi ise, naye, mpueyendi, vana vendi, vamuanaye va vamala ni va vampuevo, eyo, ambe vene muono uendi, ka hasa kupua ndongesi yange.
27 Uose-ouo kambata citi cendi ca kayando* naku nji kava, ka hasa kupua ndongesi yange.
28 Ca ku muenako, iya hakati kenu nga atonda kutunga vumo vutala,* ka livanga kutumama naku hilula ndando linga a mone nga ali na vimbongo via kupuamo via ku vu manusula?
29 Kati ngoco, aka hasa lika kutunga luvula vunoni kaka hasa ku vu manusula, kaha vantu vose vaka hita vaka putuka ku mu zola,
30 nguavo: ‘Ou yala ua putukile lika ngoco kutunga, vunoni na vihono.’
31 Ni muangana muka ntsimbu kanda aye mu kulua ndzita na muangana mukuavo, ka livanga kutumama ha mavu linga ahilule nga na masualale vendi 10.000 citava akalue ndzita na mukuavo eza na masualale 20.000?
32 Nga amona nguendi ka hasa, atuma tunganda vendi linga vaka litavasiane ciyulo, ntsimbu acili kulahako.
33 Na vuno vene, tantekeyenu nguenu uose-ouo hakati kenu ka seza viuma viendi viose, ka hasa kupua ndongesi yange.
34 “Eyo, muongua uapua ua cili. Vunoni nga usamuka, ndzili yauo ihasa ku hiluka vati?
35 Ka citava ambe ku uhaka mu livu ni ku upuisa vuilo. Vantu vaka umbila lika kuti. Uose ali na matuitui evueko.”
