Kuhitila Muli Luka 15:1-32
15 Vakua ku fuetesa lisimu vose na vakua vupi va likunguluile kuli Yesu linga va mu halakane.
2 Ngeci vaFaliseu na vakua kusoneka va putukile kuningita nguavo: “Ou yala ue ku tambula vakua vupi na kulia navo.”
3 Ngeci uava telele cino cisimo nguendi:
4 “Iya hakati kenu nga ali na vampanga 100, kaha umo uavo azimbala, ka seze vaze 99 mu likango linga aka tonde uze umolika na zimbala noho na mu uana?
5 Kaha nga na mu uana, ue ku viukilila naku mu haka ha vitsili.
6 Omo aheta ku ndzivo, asana vavusamba vendi na vantu va atunga navo naku va leka nguendi: ‘Viukililenu nange, muomu nji na uana mpanga yange na zimbalele.’
7 Na vuno vene, nji mileka nguange, muilu muka kala ndzolela ya kama nga umo mukua vupi aluluka, kuhiana vakua vuviuke 99 vaze ku va tondeka kualuluka.
8 “Ni mpuevo muka ali na vidrakima* 10, nga a zimbalesaho imo, vuno kaka suameka ndeya na kukomba mu ndzivo, linga a itonde vuino noho na iuana?
9 Nga na iuana, asana vavusamba vendi na vantu va atunga navo naku va leka nguendi: ‘Viukililenu nange, muomu nji na uana mbongo* yange ina zimbalele.’
10 Na vuno vene, nji mi leka nguange, tungelo va Njambi vaka viukilila mua kama omo lia kualuluka ca mukua vupi umo.”
11 Yesu uava lekele naua nguendi: “Kuakele umo yala uakele na vana vendi vavali va vamala.
12 Muana ua kanike ua lekele ise nguendi: ‘Tata nji hane mutamba uange ua vupite.’ Ngeci ise, uava tepelele vupite vuendi.
13 Mua hitile matangua andende lika, muana ua kanike ua kunguluile viuma viendi viose na kuya ku cifuti ca ku lahako. Mua ka hetele kuze, uaka sanduele viuma viendi viose mu ku likovelesa mu muono ua kuvihia.
14 Mua manesele ku sanduola viuma viendi viose, muze mu cifuti cakele mua kovelele ndzala ya kama, ngeci ua putukile kuyanda.
15 Ngeci ua ka likundikile mu mavoko a umo yala ua mu cifuti caco linga amu pangele, kaha uze yala ua mu tumine ku mehia endi aka mu niungile vangulu.
16 Kaha omo lia ndzala ua tondele ambe vene kulia viakulia* via vangulu, vunoni na umo uahi ua mu hanene viakulia.
17 “Mua putukile ku singanieka vuino, ua handekele nguendi: ‘Vangamba va tata vali na viakulia viavingi, vunoni yange kuno njitsa vene na ndzala!
18 Nji katuka nji hiluke kuli tata, kaha njika mu leka nguange: “Tata, nji na vulumuna kuli Njambi* na kuli yove naua.
19 Ka nja fuilile naua kunji sana munove, njipuise lika ngue umo ua vangamba vove.”’
20 Ngeci ua katukile na kuya kuli ise. Tele acili ku lahako, ise ua mu muene, kaha ua muivuilile ngozi. Ngeci ua tuntile ua ka mu vumbatelele* naku mu tsemba.
21 Ngeci muana ua lekele ise nguendi: ‘Tata, nji na vulumuna kuli Njambi* na kuli yove naua, ka nja fuilile naua ku nji sana munove.’
22 Vunoni ise ua lekele vangamba vendi nguendi: ‘Zangulenuko! Nehenu vizalo via cili mua ku mu zikevio, mu zikenu naua kandzeya kumunye na vinkaku ku mikono yendi.
23 Nehenu naua muana ngombe ua ku hindala, mu tsihenu linga tulie naku viukilila,
24 muomu ou munange ua tsile vunoni na yoyo naua, ua zimbalele vunoni nja mu uana.’ Ngeci vaputukile kulisamba mua kama.
25 “Munendi ua mukuluntu uakele ku mehia, vunoni mua hilukile, ua hetele ku hiehi na ndzivo, kaha uavuile kalua ka miaso na vakua kukina.
26 Ngeci ua sanene umo ua vangamba naku muihula vika viakele naku lingika.
27 Ngeci ua mu lekele nguendi: ‘Ntsongo yove neza, kaha iso na mu tsihila muana ngombe ua ku hindala muomu nguavo na hiluka na muono.’
28 Vunoni ikeye ua nienguele kaha ua vianene kukovela mukati, ngeci ise ua tuhukile na kuputuka ku mu lambelela.
29 Vunoni uze muana ua kumbuluile ise nguendi: ‘Tata, njina ku pangela mu miaka yayingi, kaha na limo litangua liahi nja muesele lisino ku masiko ove. Vunoni kanda unji haneho ambe umo muana mpembe, linga nji livuise ndzolela na vavusamba vange.
30 Vunoni mua na hete vene ngeci ou munove uaka sanduele vupite vuove na mapangala,* una mu tsihila muana ngombe ua kuhindala.’
31 Ise ua mu kumbuluile nguendi: ‘Munange, una kala nange ntsimbu yose, kaha viuma viange viose vinapu viove.
32 Vunoni tua pande ku viukilila na kulisamba muomu ntsongo yove ua tsile, vunoni ali na kuyoya naua. Ua zimbalele vunoni tua mu uana.’”
Matota
^ Ni “vimbongo via palata”
^ Ni “drakima”
^ Ni “vinkuekue”
^ Ni “melu”
^ Mu ciNgelengu “ua ka mu uililile mu ntsingo”
^ Ni “melu”
^ Ni “vikoyi”
