Kuhitila Muli Luka 16:1-31
16 Kaha Yesu ua lekele naua vandongesi vendi nguendi: “Umo mpite uakele na umo ngamba* yendi u vambuluile nguavo uakele naku pihisa vupite vua sukuluendi.
2 Ngeci ua mu sanene naku muihula nguendi: ‘Vika ovio vinji nevu kutuala hali yove? Kundika kuno viteli viove viose. Na hano, ka citava naua utualeleho kuniunga ino ndzivo.’
3 Kaha uze mukuamanda, ua handekele mu mutima uendi nguendi: ‘Vati honi nji linga? Muomu sukuluange anji tundisa ha vipanga. Yange naua kanjesi na ndzili ya kulima kaha njili na ntsoni ya kuya na kupinga.
4 Amba! Nja mono honi vati nji panga, linga mu vanji tundisa ha cipanga cange ca vukuamanda, vantu vaka nji tambule vuino ku vindzivo viavo.’
5 Ngeci ua putukile kusana vose vakele na makongo a sukuluendi umo ku umo. Kaha uehuile ua kulivanga nguendi: ‘Cingahi ua levala kuli sukuluange?
6 Ua mu kumbuluile nguendi: ‘Viseteko* 100 via mazi a olivela.’* Ngeci mukuamanda ua mu lekele nguendi: ‘Tambula lipapelo liove lia makongo, tumama, sonekaho 50 vuasi-vuasi.’
7 Mu nima yaco, uehuile ua mu civali nguendi: ‘Amba yoveco, cingahi ua levala? Ua mu kumbuluile nguendi: ‘Viseteko* via kama via tiliku via kupua 100.’ Ngeci mukuamanda ua mu lekele nguendi: ‘Tambula lipapelo liove lia makongo, sonekaho 80.’
8 Uze sukulu, ua sangalele mukuamanda uendi. Vutuhu uapuile mukua vuhenge, vunoni ua muesele mana. Muomu vana va miaka ino, ve kumuesa mana ku vakua muyati uavo* kuhiana vana va ceke.
9 “Cikuavo naua, nji mi leka nguange: Likuatenu vusamba ku hitila mu vupite vua vuhenge. Linga mu vuhua, vakevo vaka mi tambule mu vihela viavo viayaye.
10 Uose apua mukua vusunga mu viuma via vindende, apua naua mukua vusunga mu viavingi. Kaha uose apua mukua vuhenge mu viuma via vindende, apua naua mukua vuhenge mu viavingi.
11 Ngeci mukemuo, nga ka mua muesele naua nguenu mu vakua vusunga ku vupite vua vuhenge, kaha iya aka mi kundika vupite vua vusunga?
12 Kaha nga ka mu muesa nguenu mu vakua vusunga ku viuma viambala, iya aka mi hana vize viva na mi tulikila?
13 Ngamba na umo uahi ahasa kupangela vasukulu vavali. Muomu azinda umo na kulema mukuavo, ni alikata na umo naku yengula mukuavo. Ka muhasa kupangela Njambi na kupangela Vupite.”
14 Kaha vaze vaFaliseu va lemene vimbongo, vakele naku halakana viose viakele naku handeka Yesu, ngeci va putukile ku mu sembulula.
15 Ngeci uava lekele nguendi: “Yenu mue ku limuesa kupua vakua vuviuke ku meso a vantu, vunoni Njambi a tantekeya mitima yenu. Muomu vize viapua via seho ku meso a vantu, viapua via nyengo ku meso a Njambi.
16 “Lisiko na Vapolofeto, vavi polofetele kuheta naku ntsimbu ya Yoano. Tunde haze, Vuangana vua Njambi vali naku vuambulula mu kupua muzimbu ua cili, kaha vantu va miyati yose vali naku fuitangana na ndzili yose, linga vaka kovelemo.
17 Mua vusunga, cacasi lilu na mavu vihite, kuhiana mutamba umo ua lisona lia Lisiko uhone ku lipuisamo.
18 “Uose a kondola mpueyendi na kuambata ueka, alinga vukoyi, kaha uose ambata mpuevo uaco uva na kondola, alinga vukoyi.
19 “Kua kele umo mpite, uakele na kuzala vuzalo vua ku venguluka na linyu, kaha tangua na tangua uakele naku litovalesa muono.
20 Vunoni ha mbelo yendi vakele naku nehaho umo yala cihutu mukua kupinga, lizina liendi Lazalu. Uakele na vimbandu muvila uose.
21 Uakele na kutonda mua kama kulia vuuiui vuakele naku lahuka ku mesa ya uze mpite. Kaha ambe vene tutali vakele na kuiza mu kuliasa ha vimbandu viendi.
22 Mu nima ya ntsimbu, uze mukua kupinga ua tsile, kaha tungelo va muambatele naku mu tuala kuli Avilahama.*
“Kaha naua uze mpite nendi ua tsile, kaha va mu tsindile.
23 Tele ali mu Cihilo* oku ali na kumona lamba, uanduile meso endi kaha ua muene Avilahama ha lahako, ali hamolika* na Lazalu.
24 Kaha ua tambakanene nguendi: ‘Tata Avilahama, nji vuileko nkeke. Tuma Lazalu ambuitike ntsongo ya munye uendi mumema, linga aku tontueseko ndaka yange. Muomu njili na kumona lamba ya kama muno mu milengi ya tuhia.’
25 Vunoni Avilahama ua mu kumbuluile nguendi: ‘Muanange, vuluka nguove mu uakele na muono, ua livuisile ndzolela na viuma via cili, vunoni Lazalu ua tambuile lika viuma via kuvihia. Ngeci hano honi, ikeye injili naku lembezieka kuno vunoni ove uli mulamba.
26 Cikuavo naua, hakati ketu nenu hali cina ca kama ca kulova, linga vose vali sinia lino nga va tonda kuiza oko va honoue. Kaha vose vali sinia olio nga vatonda kuiza sinia lino, navo va honoue.
27 Ngeci uze mpite ua handekele nguendi: ‘Tata, nga ngoco ni nji kulomba nguange, mutume ku ndzivo ya tata,
28 muomu njili na vamuanetu vatanu. Ngeci mukemuo, mutume aka va lungule linga navo kati veze kuno ku cihela ca kayando.’
29 Vunoni Avilahama ua mu kumbuluile nguendi: ‘Vali na Visoneka via Mosesa na via Vapolofeto. Vikevio viva na pande ku halakana.’
30 Mpite ua handekele nguendi: ‘Houe tata Avilahama. Nga umo atunda ku vatsi ayako, vaka aluluka.’
31 Vunoni Avilahama ua mu kumbuluile nguendi: ‘Nga ka veku halakana Visoneka via Mosesa na via Vapolofeto, kaha ka vaka halakana ambe vene muntu atunda ku vatsi.’”
Matota
^ Ni “kasongo; mukua kutala via ha ndzivo.”
^ Ni “viseteko via bati.” Bati imolika, ya puile matulu 22
^ Ni “azeite.”
^ Ni “viseteko 100 via viKore.” Kore imo, ya puile matulu 220
^ Ni “ku vantu va ku ntsimbu yavo”
^ Mu ciNgelengu “ku ntulo ya Avilahama.”
^ Ni “Hades.” Ya lomboloka vihilo via vantu vose.—Talenu Mezi ava Lombolola
^ Mu ciNgelengu “ku ntulo ya Avilahama”
