Kuhitila Muli Luka 17:1-37
17 Kaha ua lekele vandongesi vendi nguendi: “Viuma via ku suntsuisa ku vi kakala. Vunoni luvinda lua uze avi neha!
2 Cili ku lutue ku mu kutiya mu ntsingo livue lia kama lia kutuisa vunga, naku mumbila mu kalunga ndonga. Kuhiana a suntsuise umo uava vavandende.
3 Zangamenu! Nga muanoko na lingi vupi, mu handekele kaha nga aluluka mukonekele.
4 Ambe nga aku vulumuina lua kupua 7 mu litangua limo, kaha eza naua kuli yove lua kupua 7 naku handeka nguendi nji konekeleko, uapande ku mu konekela.”*
5 Ngeci vapostolo va lekele Muangana nguavo: “Tu vuezeleko lutsilielo.”
6 Kaha Muangana ua handekele nguendi: “Nga mukala na lutsilielo lua kupua ambe hambuto ya musalata, nga muhasa kuleka ou muti* nguenu, ‘Tukuka aha uka litombeke mu kalunga ndonga!’ Kaha u miononoka.
7 “Iya hakati kenu aleka ngamba* yendi atunda ku litemo ni mu kuniunga vutanga nguendi, ‘Iza ku mesa hano vene linga ua kulie?’
8 Nkuma ka muleka nguendi, zala vizalo via kupanga navio linga unji pangele viakulia via cinguezi noho ha nji ka manusuila kulia na kunua, amba vuose nove ulie na kunua?’
9 Vuno uze sukulu ka ka santsela ngamba yendi omo lia ku puisamo viuma via namu tumu ni?
10 Na vuno vene, nenu nga mu na puisamo viose viva na mi tumu kulinga, handekenu nguenu: ‘Tu vangamba va ngoco. Vi tua lingi, vikevio vene vi tua pande kulinga.’”
11 Kaha mua kele na kuya ku Yelusalema, ua hitile mu Samaliya na Ngalileya.
12 Kaha omo ua kovelele mulimo limbo, vamala 10 vakele na mbumba vezile kuli ikeye, vunoni vemanene ha lahako.
13 Ngeci va tambakanene nguavo: “Yesu, Mulongisi, tu vuileko nkeke!”
14 Omo Yesu uava muene, uava lekele nguendi: “Yenu mu ka lisolole kuli vasasendote.” Kaha mu vakele na kuya, va lelele ku mbumba.
15 Umo uavo mua muene nguendi na kanguka, ua hilukile, oku a sangaziala Njambi na lizi lia kama.
16 Ngeci ua tsikamene ku viliato via Yesu naku mu santsela. Yala uaco, uapuile mukua Samaliya.
17 Ngeci Yesu uehuile nguendi: “Vaze va na lelele kati va kupua 10, ni vati? Amba vakuavo 9 co vali kulihi?
18 Muomu na umo uahi uavo na hiluka linga aku zumbangeye Njambi, kuvanga lika ou yala ua ku cifuti ceka.”
19 Kaha ua lekele uze yala nguendi: “Katuka uye. Lutsilielo luove lua ku kanguisa.”
20 Kaha vaFaliseu va muhuile ntsimbu ika vue kuizile Vuangana vua Njambi. Ngeci uava kumbuluile nguendi: “Vuangana vua Njambi ku vukeza mu njila ya kulinga vantu vose vaka vu mona.
21 Ni vaka handeke nguavo, ‘Talenu! Vuno vuli kuno!’ ni ‘Vuze vuli kuze!’ Vunoni tantekeyenu nguenu Vuangana vua Njambi vuli hakati kenu.”
22 Kaha Yesu ua lekele vandongesi vendi nguendi: “Ntsimbu ikeza omo muka tonda kumona ambe litangua limo lia Muana muntu, vunoni ka muka limono.
23 Na vantu vaka mi leka nguavo, ‘Talenu! Uze ali kuze!’ ni ‘Talenu! Uno ali kuno!’ Kati mu kayeko ni ku vakava.
24 Muomu ngeci mua muhiato ue ku hiatula kutunda ku sinia limo lia lilu na kuya ku sinia likuavo, mukemuo mu ci kafua ha litangua lia Muana muntu.
25 Vunoni ha katete, na pande kuhita mu tuyando tua tuingi, naku mu viana ku muyati uno.
26 Cikuavo naua, ngue mu ca fuile ku matangua a Noa, mukemuo mu ci kafua naua naku matangua a Muana muntu:
27 Vantu valile, vanuine, vamala vambatele, vampuevo va sombokele, na ha litangua lia kovelele Noa mu vuato. Kaha Livazi liezile naku va nongesa vose.
28 Cikuavo naua, ngue mu ca puile ku matangua a Lote: Vantu valile, vanuine, va landele, va landesele, va tombekele na kutunga.
29 Vunoni ha litangua lia tundile Lote mu Sondoma, muilu mua nokele tuhia na ensofele* kaha via va nongesele vose.
30 Mukemuo naua mu ci kafua ha litangua li vaka solola Muana muntu.
31 “Ha litangua lize, uze ali helu lia ndzivo kaha vikuata viendi vili mukati, kati a sulukeho linga aka viambate. Mumolika naua na uze ali mulihia, kati a hilukile via na seza.
32 Vulukenu mpuevo ya Lote.
33 Uose a tonda ku niungiliya muono uendi a uzimbalesa, vunoni uose a uzimbalesa a uniungiliya.
34 Nji mi leka nguange, ku vutsiki vuze, vantu vavali vaka kala ha muhela* umo lika; umo va kaya nendi mukuavo vaka mu seza.
35 Ku kakala vampuevo vavali vaka tua vunga ha livue limo lika, umo va kaya nendi mukuavo vaka mu seza.”
36— —
37 Ngeci va muhuile nguavo: “Muangana, kuiko honi okuo?” Ua va kumbuluile nguendi: “Kuze ku ka kala civimbi,* kukekuo naua ku va ka likunguluila vihungu.”*
Matota
^ Mu ciNgelengu “nji na aluluka.”
^ Mu ciNgelengu “muti ua amora; murubeni”
^ Ni “ndungo”
^ Ni “fofo”
^ Ni “vulili”
^ Mu ciNgelengu “muvila”
^ Ni “vangonga.”
