Kuhitila Muli Luka 18:1-43
18 Kaha Yesu ua telele naua vandongesi vendi cisimo ca muesa seho ya kuvundila ntsimbu yose ca kuhona kulikela.
2 Nguendi: “Mu mbonge imo mua kele umo ngazi ka singimikile Njambi, ni ambe muntu naumo uahi.
3 Mu mbonge yaco, muakele naua umo ntuluue uze uakele na kuya kuli ikeye ntsimbu yose mu ku mu leka nguendi: ‘Nji sompele mu vuoloke vimpande vi njili navio na mukuetu.’
4 Mu ntsimbu ya kama, uze ngazi ka tavele kulingamo. Vunoni mu nima yaco, ua lihandekesele mu mutima nguendi: ‘Vutuhu ka nje ku singimika Njambi ni muntu,
5 Vunoni, mu kulinga ou ntuluue na suile laza ku nji katiesa, nji mu sompela lika vimpande viendi mu vuoloke linga kati atualeleho ku nji katiesa, naku njivuisa cimpekete.’”
6 Kaha Muangana ua handekele nguendi: “Mu nevu via handekele ou ngazi vutuhu uapuile mukua vuhenge?
7 Nkuma Njambi, ka ka sompela mu vuoloke vantu vendi vaze va hangula, ve ku mulambelela vutsiki na mutana ntsimbu acili naku va muesa ntsintsa ni?
8 Nji mileka nguange, aka va sompela mu vuoloke vuasi-vuasi. Vunoni omo Muana muntu akeza, kasi aka uana vene lutsilielo lua cifua eci ha mavu ni?”
9 Uatele naua cisimo cikuavo kuli vaze vakele na kulimona nguavo vapuile cikuma vakua vuviuke vunoni vakuavo co vangoco. Nguendi:
10 “Vamala vavali vaile ku tembele mu kuvundila umo uapuile kaFaliseu, mukuavo uapuile mukua ku fuetesa lisimu.
11 Kaha kaFaliseu uemanene na kuputuka kuvundila mu mutima uendi nguendi: ‘A Njambi, nji ku santsela muomu ka nja fuile ngeci mua vantu vose, vapua vakua lizangamena,* vakua vuhenge, vakua vukoyi ni ngeci muou mukua ku fuetesa lisimu.
12 Simano ku simano, nje ku livindika kulia luvali, kaha nje kuhana cimo ku likumi ku viuma viange viose.’
13 Vunoni mukua ku fuetesa lisimu uemanene ha lahako, ka hasele ambe kutala meso endi muilu, ua tualeleho kuliveta ha ntulo oku a handeka nguendi: ‘A Njambi, nji vuileko nkeke, nji mukua vupi.’
14 Nji mileka nguange, ou yala ua hilukile ku ndzivo yendi oku napu mukua vuviuke ku hiana kaFaliseu. Muomu uose a lihaka ku vukama, vaka mu kehesa kaha uose a likehesa, vaka mu haka ku vukama.”
15 Kaha vantu va putukile ku mu nehela vanike* va vandende linga avakuate.* Vunoni vandongesi vendi mu va vimuene vaputukile ku va vindika.
16 Vunoni Yesu ua pingile va mu nehele vaze vanike. Ngeci ua handekele nguendi: “Ecelenu vanike va vandende veze kuli yange, kati mu va vindike muomu Vuangana vua Njambi vunapu vua vaze vafua ngeci muavo.
17 Nji mi leka vusunga nguange, uose katambula Vuangana vua Njambi ngeci mua kanike* ua mundende, ka ka kovelamo.”
18 Kaha umo mukua kusika ua muihuile nguendi: “Mulongisi ua cili, vika nja pande kulinga nji ka uane muono ka ue kuhua?”
19 Yesu ua mu kumbuluile nguendi: “Vika unji sanena ua cili? Na umo uahi ua cili kuvanga lika Njambi.
20 Utantekeya laza ano masiko nguavo: ‘Kati ulinge vukoyi,* kati utsihe muntu, kati upunde, kati uhane vukaleho vua visaki, singimika iso na noko.’”
21 Kaha ua mu kumbuluile nguendi: “Aa masiko ose nje ku aniunga tunde ku vunike vuange.”
22 Yesu mua vuile ngoco ua mu lekele nguendi: “Kuli lika cuma cimo ci naku kambela. Landesa viuma viove viose, na kuhana vimbongo viaco ku vihutu kaha uka kala na vupite muilu. Mu nima yaco tuaya ua ku nji kave.”
23 Uze mukua kusika mua vuile ngoco, uavuile vusiua vua kama, muomu uakele na vupite vuavuingi.
24 Ngeci Yesu ua mu talele naku muleka nguendi: “Mua vusunga ci kapua ca cikalu kuli vakua vimbongo ku kovela mu Vuangana vua Njambi!
25 Cili vene, ca casi kuli kamelu kuhita mu liso lia nguya kuhiana mpite akovele mu Vuangana vua Njambi.”
26 Vaze vavuile ano mezi va handekele nguavo: “Amba iya honi ahasa kuovoka?”
27 Kaha ua handekele nguendi: “Viuma via vikalu ku vantu, kuli Njambi viapua viaviasi.”
28 Vunoni Petulu ua mu lekele nguendi: “Tala! Yetu tu na seza viuma vietu naku kukava.”
29 Kaha Yesu uava kumbuluile nguendi: “Nji mi leka vusunga nguange, uose na seza ndzivo ni mpuevo ni vamuanaye ni visemi ni vana omo lia Vuanagana vua Njambi
30 aka tambula viuma viavingi mu kuhiana mu ntsimbu ino, kaha ku lutue muono ka ue kuhua.”
31 Kaha Yesu ua sanenene vapostolo vendi 12 ku mukulo naku valeka nguendi: “Halakanenu! Tuli naku kanduka ku Yelusalema, kaha viuma viose vi vasoneka ku hitila mu vapolofeto kutuala hali Muana muntu vika limpuisamo.
32 Ca ku muenako, vaka muhana mu mavoko a vakua vifuti, ku mu tsopa, ku mu yandesa naku mu zekuila mate.
33 Kaha mu nima ya ku muveta makote, vaka mu tsiha, vunoni ha litangua lia mu citatu aka sanguka.”
34 Vunoni vino viuma ka via va lumbunukile, muomu va va suekelele vulumbunuiso vua mezi aco, ngeci ka vevuisisile viuma via handekele.
35 Yesu tele endela mu hiehi na Yeliko, umo kapuputa ua tumamene ku mukulo ua njila mu kupinga viuma.
36 Mu kulinga uavuile mbunga ili na kuhita, ngeci uehuile vika vili na kusoloka.
37 Va mulekele nguavo: “Yesu Mukua Nazaleta ali na kuhita!”
38 Ngeci mua vuile ngoco, ua tambakanene nguendi: “Yesu Muana Ndaviti, nji vuileko cikeketima!”
39 Kaha vaze vakele ku lutue va putukile ku mu tenukila linga a holoke, vunoni ikeye ua vuezeleko lizi naku tambakana nguendi: “Muana Ndaviti, nji vuileko cikeketima!”
40 Yesu uemanene ngeci ua tumine va mu nehele uze yala. Kaha mua suenene mu hiehi, Yesu ua muihuile nguendi:
41 “Utonda nji ku lingile vika?” Uze kapuputa ua kumbuluile nguendi: “Muangana, tonesa meso ange.”
42 Ngeci Yesu ua mu lekele nguendi: “Meso ove atone; lutsilielo luove lua ku kanguisa.
43 Haze vene, uze kapuputa ua putukile kumona, ngeci ua putukile ku mu kava oku a zumbangeya Njambi. Kaha vantu vose vavi muene navo va sangazialele Njambi.
Matota
^ Ni “vakua milami”
^ Ni “vanike vaha mavoko”
^ Ni “ku va saleka mavoko.”
^ Ni “ngue mue ku tava viuma kanike”
^ Ni “kuenda vungungu mukua ndzivo yove”
