Kuhitila Muli Luka 19:1-48
19 Kaha Yesu ua kovelele mu Yeliko, vunoni uakele lika na kuhita.
2 Mu mbonge yaco muakele umo yala lizina liendi Sangeo; uapuile mukuluntu ua vakua ku fuetesa lisimu kaha naua uapuile mpite.
3 Yala uaco ua tondele kumona Yesu, vunoni omo lia mbunga ka hasele, muomu uapuile ua muihi.
4 Ngeci ua tuntilile ku lutue naku ka londa ku munongo linga amone Yesu, muomu ikeyo njila yakele naku hitila.
5 Kaha Yesu mua hetele ha cize cihela, ua talele kuilu naku mu leka nguendi: “Sangeo, suluka vuasi; muomu lelo nja pande kuka kala ku ndzivo yove.”
6 Ngeci ua sulukile vuasi, kaha ua mu tambuile na ndzolela ya kama mu kupua ngendzi yendi.
7 Vamo mu va muene ngoco, va putukile kuningita nguavo: “Na ka tulila ku ndzivo ya mukua vupi.”
8 Vunoni Sangeo ua katukile kaha ua lekele Muangana nguendi: “Muangana, tala! Nji tepela mutamba ua vupite vuange ku vahutu. Kaha uose inja zangamenene vimo, njika mu hiluisilavio luuana.”
9 Ngeci Yesu ua handekele nguendi: “Lelo vuovoke vuneza mu ndzivo ino, muomu ou yala nendi muana Avilahama.
10 Muomu Muana muntu uezile mu kutonda vaze va na zimbala naku vovola.”
11 Ntsimbu va ci kele naku halakana evi viuma, Yesu uava telele naua cisimo cikuavo, muomu uakele ku hiehi na Yelusalema kaha vakevo va singaniekele nguavo Vuangana vua Njambi vu soloka haze vene.
12 Ngeci ua handekele nguendi: “Umo yala ua ku cikota ca vuangana, uaile ku cifuti ca ku lahako linga va ku mu puise muangana naku hiluka.
13 Kaha ua sanene vangamba vendi 10 naku va hana vimbongo 10, ngeci uava lekele nguendi, ‘Lingenu mingoso na vimbongo* viaco noho ha nji ka hilukila.’
14 Vunoni vakua cifuti cendi va mu zindile ngeci va tumine miluua va mu kave, linga vaka handeke nguavo, ‘Ka tu tondo ou yala apue muangana uetu.’
15 “Mua hilukile uze yala mu nima ya ku mu puisa muangana,* ua sanene vaze vangamba va silile vimbongo linga atantekeye vika va na uana mu mingoso iva lingile.
16 Kaha ua kulivanga uezile ua handekele nguendi, ‘Sukulu, ha vimbongo viove nja nganialelaho vikuavo 10.’
17 Sukuluendi ua mu kumbuluile nguendi, ‘Ua lingi vuino, u ngamba ua cili! Mu kulinga unonoka ku viuma via vindende, tuamenena vimbonge 10.’
18 Kaha ua mu civali nendi uezile ua handekele nguendi, ‘Sukulu, ku vimbongo viove, nja nganialelako vikuavo vitanu.’
19 Nou naua ua mu lekele nguendi, ‘Nove vene tuamenena vimbonge vitanu.’
20 Vunoni kuezile ngamba mukuavo, ua handekele nguendi, ‘Sukulu, vimbongo viove evi, nji na vi vungilile ha ntanga naku vi sueka.
21 Nji na kuivuilile liova muomu u muntu ua mukalu. Ue ku tambula vize ka ua tulikile kaha ue kutia vize ka ua kunine.’
22 Ngeci Sukuluendi ua mu lekele nguendi, ‘Yove u ngamba ua kuvihia, nji ku hisila ha mezi ove. Nkuma ua tantekeyele nguove nji muntu ua mukalu, nje ku tambula vize ka nja tulikile na kutia vize ka nja kunine?
23 Amba vika honi ka ua hakelele vimbongo viange mu cisete ca vimbongo? Kaha mu nji ne ku hiluka, nga nja vi tambula na kakondueso.’
24 “Ngeci ua lekele vaze vakele kuze nguendi, ‘Mu tambulenu evi vimbongo mu vi hane kuli uze ali na vimbongo 10.’
25 Vunoni vakevo va mu lekele nguavo, ‘Muangana, nguetu ali laza na vimbongo 10!’—
26 ‘Nji mi leka nguange, uose uze ali navio, vaka mu vuezelela vikuavo. Vunoni uze kesi navio, ambe vene vize viali navio, vaka mu tambulavio.
27 Cikuavo naua, nehenu kuno ovo vitozi vange ka va tondele nguavo njipue muangana uavo, mua ku va tsihile ha meso ange.’”
28 Yesu mua manusuile ku handeka evi viuma, ua tualeleho na vungendzi vuendi vua ku kanduka ku Yelusalema.
29 Mua hetele ku hiehi na Mbetefanje na Mbetaniya ku muncinda uva luka nguavo Muncinda ua Olivela, ua tumine vandongesi vendi vavali,
30 nguendi: “Yenu muimbo limuli na kumona, kaha mu muka kovelamo, muka uana umo muana cimulu ua kukuta, uze kanda va londeho ku muntu na umo uahi. Mu zitulenu naku mu neha kuno.
31 Vunoni nga kuka kala umo aka mihula nguendi, ‘Vika muli naku mu zituila?’ mu lekenu nguenu, ‘Muangana amu tonda.’”
32 Kaha vaze va a tumine vaile, vaka mu uanene ngue muze vene mua va lekele Yesu.
33 Vunoni mu vakele na kuzitula uze muana cimulu, vavenya vehuile nguavo: “Vika mu zituila ou muana cimulu?”
34 Kaha va kumbuluile nguavo: “Muangana amu tonda.”
35 Ngeci va tualele uze cimulu kuli Yesu kaha valeleho vizalo viavo via helu, ngeci Yesu ua londeleho.
36 Muakele na kuya, vantu vakele na kuala vizalo viavo via helu mu njila.
37 Mua hetele ku hiehi na kuze kua sikulukila njila itunda ku Muncinda ua Olivela, civunga cose ca vandongesi vendi, ca putukile ku viukilila naku sangaziala Njambi na lizi lia kama, omo lia vipangi viose via ku komouesa viva limuenenene.
38 Vakele na ku tambakana nguavo: “Na vezika Muangana uze eza mu lizina lia Yehova!* Muilu mu kale ciyulo na vumpahu kuli yove uakala muilu!”
39 Vunoni vamo vaFaliseu vakele ha mbunga va lekele Yesu nguavo: “Mulongisi, tenukila vandongesi vove.”
40 Vunoni uava kumbuluile nguendi: “Nji mi leka nguange, nga vakevo va holoka, kaha mavue atambeka.”
41 Kaha mua hetele ku hiehi, ua muene ize mbonge ngeci ua lilile.
42 Ua handekele nguendi: “Nga yove cili vene ha litangua lia lelo ua nongonuene viuma vize vie kuneha ciyulo; vunoni hano ka uvi mono muomu va naku suekelavio.
43 Muomu matangua akeza omo vitozi vove vaka tunga cimpaka ca viti via kucomotoka* kaha vaka ku zengeleka naku kuzikiliya ku mitamba yose.
44 Vaka ku uisila ha mavu hamolika na vana vove. Kaha ka vaka kusila ambe livue helu lia likuavo, muomu ka ua nongonuene ntsimbu ivakele naku ku hilula.”
45 Kaha Yesu ua kovelele mu tembele na kuputuka ku sekula vose vaze vakele na ku landesa,
46 uava lekele nguendi: “Va na soneka nguavo, ‘Ndzivo yange ikapua ndzivo ya vivundilo,’ vunoni yenu mua ipuisa ndzivo ya vezi.”
47 Kaha tangua na tangua ua tualeleho ku longesa vantu mu tembele. Vunoni vakuluntu va vasasendote, vakua kusoneka hamolika na vakua kusika vantu, va tondele ku mu tsiha.
48 Vunoni ka va uanene njila ya ku vi puisilamo, muomu vantu vose vakele naku mu halakana na mutima uose.
Matota
^ Mu ciNgelengu “mina.” Mina imo lika mu ciNgelengu ya puile vidrakima 100.
^ Ni “vialeka ha vuangana”
^ Talenu Mizimbu ya ku Vuezako
^ Ni “kusongoloka”
