Kuhitila Muli Luka 2:1-52
2 Ku matangua aze, Sezale Angustu ua sikile nguendi vantu vose vaka lisonekese.
2 (Eci ku lisonekesa ca kulivanga, ca keleko tele Kiliniu ikeye nguvulu ua Silia.)
3 Kaha vantu vose vaile mu ku lisonekesa, muntu ku muntu mu mbonge yendi.
4 Na Yosefe nendi ua tundile ku Ngalileya, mu mbonge ya Nazaleta, uaile ku Yundeya mu mbonge ya Ndaviti ive kusana nguavo Mbetelema muomu uapuile ua ku ndzivo ya Ndaviti kaha naua ua ku vusoko vuendi.
5 Uaile mu ku lisonekesa na mpueyendi Maliya. Ha ntsimbu yaco, Maliya tele na kulisa.
6 Tele vacili kuze, ntsimbu yendi ya kusulumuna ya hetele.
7 Ngeci ua sulumuine muanendi ua ndala. Ua mu vungilile ha vintanga naku mu langeka mu cikasa ca kulila vimuna, muomu mu ndzivo ya kutulila vangendzi ka mua kele naua cihela.
8 Ku cihela cize, kua kele naua tuniungi vakele mu musenge mu kuniunga vutanga vuavo ku vutsiki.
9 Vatungumuke, kangelo ua Yehova* uava solokelele kaha vumpahu vua Yehova vua va zengelekele, naku va tuila ceke. Ngeci vavuile liova lia kama.
10 Vunoni kangelo uava lekele nguendi: “Kati muivue liova, muomu nji neza mu ku mi nehela muzimbu ua cili, ua ndzolela ya kama ivaka kala nayo vantu vose.
11 Muomu lelo mu mbonge ya Ndaviti, mua semuka muovole ikeye Kilistu Muangana.
12 Linga mu ka mu uane, citantekeyeso eci: Mu ka uana mbututu iva na zengela ha vintanga, kaha va na mu langeka mu cikasa ca kulila vimuna.”
13 Haze vene, kuli uze kangelo kua lipandakanene civunga* ca kama ca tungelo na kuputuka ku sangaziala Njambi nguavo:
14 “Vumpahu vuye kuli Njambi ua muilu, na ciyulo cikale ha mavu, hakati ka vantu va muya ku mutima.”
15 Tungelo mu va hilukile muilu, vaze tuniungi va lihandekesele hakati kavo nguavo: “Tuyenu ku Mbetelema tu ka mone viuma viliko via na tu soluela Yehova.”
16 Ngeci haze vene, vaile mu vuasi, vaka uanene Maliya na Yosefe, kaha mbututu va na mu langeka mu cikasa ca kulila vimuna.
17 Mu va mu muene, vambuluile muzimbu kutuala hali mbututu uaco.
18 Ngeci mu vavuile ou muzimbu uva va lekele tuniungi, va likomokelele mua kama.
19 Vunoni Maliya ua niungile aze mezi ose mu mutima uendi na kuputuka ku hilulaho.
20 Kaha vaze tuniungi va hilukilemo, oku va zumbangeya Njambi naku mu sangaziala omo lia viuma viose vi vavuile na kumona, ngue muze mu vava lekelevio.
21 Mua hitile matangua 8, kaha ntsimbu ya ku mu lovola ya hetele. Ngeci va mu lukile Yesu, lizina lia mu lukile kangelo naku muimita tele kanda.
22 Cikuavo naua, mu ya hetele ntsimbu yavo ya ku lilelesa kuliya na Masiko a Mosesa, va tualele Yesu ku Yelusalema linga vaka mu solole kuli Yehova,
23 ngue muze mu va soneka mu Masiko a Yehova nguavo: “Muana uose ua ku livanga* ua yala, va pande ku mu sana ua kulela kuli Yehova.
24 Ngeci va hanene cikombelo, ngue mu lia muesa Lisiko lia Yehova ngualio: “Mavembe vavali ni vana va tutele vavali.”
25 Mu Yelusalema mua kele umo yala, lizina liendi Simione. Uapuile mukua vuviuke kaha mukua kusingimika Njambi. Yala uaco, ua vandamenene litangua li ve ku nehele ku lembezieka ku vaIsaleli, na sipilitu santu ya kele hali ikeye.
26 Cikuavo naua, ku hitila mu sipilitu santu, Njambi ua mu lekele nguendi katsi, kuvanga na mono Kilistu ua Yehova.
27 Ngeci ngolo ya sipilitu santu ya mu tuamenenene, uaile mu tembele, kaha visemi mu va kovelelemo na mbututu Yesu linga va puisemo vi lia handeka Lisiko,
28 Simione ua tambuile mbututu na kuputuka ku sangaziala Njambi nguendi:
29 “A! Muangana ua Kuhiana, una tavesa honi ngamba yove aye mu ciyulo ngue mu ua handekele.
30 Muomu meso ange, ana mono njila yu kovuelamo vantu,
31 ize iuna viukisa linga vantu vose va imone.
32 Inapu ceke citundisa milima ya fuiki vakua vifuti, na vumpahu vua vantu vove vaIsaleli.
33 Vunoni vaise na naye, va likomokelele mu vavuile viakele na ku handeka Simione kutuala hali munavo.
34 Cikuavo naua, Simione ua vezikisile na kuleka Maliya naye ya muana nguendi: “Tala! Ou muana va na mu hanguila kuuisa na kuhindula vantu vavengi mu Isaleli kaha naua akapua citantekeyeso ci vaka handeka mua kuvihia.
35 (Vunoni ove, mukuale ua laha uka ku pulasiana), linga visinganieka via mu mitima ya vavengi vi lisolole.”
36 Kua kele naua kapolofeto ua mpuevo, lizina liendi Ana. Muana Fanuele, ua ku cikota ca Asele. Ou mpuevo tele na kulupa. Ua yoyele miaka 7 na yaliendi tunde ha va liambatelele,
37 kaha ntsimbu eyi, tele uapua ntuluue ua miaka 84. Ntsimbu yose uakele na kuiza ku tembele, mu kulinga cipanga ca kulela vutsiki na mutana, oku alivindika kulia kaha na ku lambelela Njambi.
38 Mu ntsimbu ize vene, Ana ua sueneneko, ua putukile ku santsela Njambi, kaha na ku handeka via kanike uaco ku vose vakele na kulavelela kupatuka ca Yelusalema.
39 Mu va manusuile ku puisamo viose vi a handekele Masiko a Yehova, Yosefe na Maliya va hilukile ku Ngalileya, ku mbonge yavo ya Nazaleta.
40 Uze kanike ua tualeleho kukola na kusula na mana, kaha Njambi ua tualeleho ku viukilila nendi.
41 Muaka ku muaka, visemi vendi, vakele na kuya ku Yelusalema ku cilika ca Paskua.
42 Kaha omo Yesu uakele na miaka 12, vaile ku Yelusalema ngue mu vakele na kulinga ha ntsimbu ya cilika.
43 Matangua a cilika mu ahuile, va kutile vungendzi vua kuhiluka. Vunoni Yesu ua salele mu Yelusalema, kaha visemi vendi vakele ku ndzimba.
44 Va singaniekele nguavo nendi uakele ha cendo, ngeci vendele vungendzi vua litangua limo, kaha va putukile ku mu tonda hakati ka vavusoko na vandambo.
45 Vunoni mu kulinga ku va mu uanene, va hilukile ku Yelusalema, naku putuka ku mu tonda meso ngengu.
46 Ngeci mu nima ya matangua atatu, vaka mu uanene mu tembele na tumama hakati ka valongisi, mu ku va halakana na ku valinga vihula.
47 Ngeci vose vakele naku mu halakana, va likomokelele mua kama vunongotima na vikumbululo viendi.
48 Visemi vendi mu va mu muene, va likomokelele mua kama. Ngeci naye ua muihuile nguendi: “Munange, vika una tu lingila ngeci? Nange na iso tu na kala naku kutonda meso ngengu.”
49 Vunoni ikeye ua va kumbuluile nguendi: “Vika mu na kala naku nji tondela? Ku mua zivukile nguenu nja pande kukala mu ndzivo ya Tata?
50 Vunoni ka vevuisisile viuma via va lekele.
51 Ngeci ua sikumukile navo na kuhiluka ku Nazaleta. Kaha ua ka tualeleho ku vononoka.* Cikuavo naua, naye ua niungile vuino aze mezi ose mu mutima uendi.
52 Kaha Yesu ua tualeleho kukola na ku livuezelela ku mana. Ngeci Njambi na vantu va tualeleho ku viukilila nendi.
Matota
^ Talenu Mizimbu ya ku Vuezako
^ Mu ciNgelengu “civunga ca kama ca masualale va muilu”
^ Ni “ndala”
^ Mu ciNgelengu “ku lihaka muintsi liavo”
